نۇر-مۇباراك ۋنيۆەرسيتەتىندە كوپتەن كۇتكەن ءسۇيىنشى جاڭالىقتىڭ تۇساۋى كەسىلدى. ۋنيۆەرسيتەت جانىنان ستۋدەنت قىز-كەلىنشەكتەردى شەبەرلىككە، تىگىنگە باۋليتىن كاسىبي جابدىقتالعان «NM collection» شەبەرحاناسى اشىلدى.

– قۇلشىلىق اۋرەتتى جابۋدان باستالادى. ال تىگىنشىلىكپەن اينالىسۋ – ءۋاجىپ. سوندىقتان بيىل وقۋ ورنىمىزدىڭ 20 جىلدىعىنا وراي ۋنيۆەرسيتەتتىڭ تاربيە جانە الەۋمەتتىك دامۋ دەپارتامەنتى، باس مامان گۇلۆيرا زاۋربەكوۆا ۇستاز ۇيىتقى بولىپ، تۇساۋى كەسىلىپ جاتقان تىگىن تسەحى قىز بالالاردىڭ بولاشاعىنا ۇلكەن ۇلەس قوساتىن شەبەرحانا بولادى دەپ سەنەمىز. ءبىزدىڭ ءبىلىم الۋشى قىز-كەلىنشەكتەرىمىز تەك ءبىلىم الۋمەن شەكتەلمەي، ون ساۋساعىنان ونەرى تامعان شەبەر بولسا دەگەن نيەتىمىز بار ەدى. سول ماقساتتى ىسكە اسىرۋعا قولداۋ كورسەتكەن بەلسەندى قازاق قىزدارىنا العىس ايتامىن، – دەدى پرورەكتور، دوتسەنت قايرات قۇرمانباەۆ ءالعىسوز بارىسىندا.

ال شەبەرحاناعا شاشۋ شاشا كەلگەن ءبىلىم بەرۋ ءىسىنىڭ ۇزدىگى، «التىن ارقاۋ» مادەني-ەتنوگرافيالىق قوعامدىق بىرلەستىگىنىڭ ءتورايىمى، قازاق كيمەشەگىنىڭ ناسيحاتشىسى عاليا قايداۋىلقىزى شەكسىز ريزالىعىن ءبىلدىردى.

–اڭساعان ارمانداعان نارسەگە قولىمىز جەتكەندە باعالاي الماي جاتامىز. ءوزى بولا قالعانداي، بۇرىننان قازىپ قويعان قازىنا، كومىپ قويعان كومبەنى اشىپ الا سالعان سياقتى بولىپ، ونىڭ ارتىنداعى ۇلكەن ەڭبەكتىڭ بارى انىق. اقيقاتىندا، قازاقتىڭ كەڭ پەيىلى، تازا كوڭىلى ءۇشىن دە بولار، اللا تاعالا دىنىمىزبەن قاۋىشتىرىپ، وسىنداي نۇر-مۇباراك ۋنيۆەرسيتەتىنىڭ ەلىمىزدە بولۋى ۇلكەن نىعمەت. شەبەرحانا قىزدارىمىزدىڭ شەبەر، ونەرلى بولۋىنا باستايتىن بەرەكەلى شاڭىراق بولسىن! – دەپ باتاسىن جاۋدىردى.

ۋنيۆەرسيتەت باسشىلىعى تىگىن شەبەرحاناسىنىڭ اشىلۋىنا اتسالىسقان اياۋلى جاندارعا العىس حات بەرىپ، سىيكادە جاسادى. ءقادىرلى قوناقتار اتىنان ءسوز سويلەگەن بەلگىلى پسيحولوگ بالقيا بالتاباي وسىنداي قايىرىمدى ىسكە جۇمىلا كىرىسكەن جاندارعا العىس ءبىلدىرىپ، جاڭا شەبەرحاناعا ساتتىلىك تىلەدى.

قازاقتىڭ كۇمبىر كۇيى اۋەلەگەن اپپاق تىگىن شەبەرحانانىڭ تىزگىنىن قولعا العان شەبەر تىگىنشى ساندۋعاش جولدۋباەۆا العاشقى تاپسىرىستاردى دا قابىلداپ ۇلگەردى.

نۇر-مۇباراك ۋنيۆەرسيتەتىنىڭ ءباسپاسوز قىزمەتى