ءتۇرى: قازاقستان مۇفتيات جاڭالىقتارى
جولدانعان ۋاقىتى: 19:15 - 2021/04/08
بۇل تۋرالى ەلوردادا پرەزيدەنت جانىنداعى ورتالىق كوممۋنيكاتسيالار قىزمەتىندە تىكەلەي ەفيردە وتكەن بريفينگتە قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعانۇلى مالىمدەدى.
باس ءمۇفتي جۇرتشىلىقتى پاندەميا كەزىندە بارىنشا ساقتانىپ جۇرۋگە، ادام كوپ شوعىرلانعان ورىندارعا بارماۋعا، اۋىز بەكىتكەن جاعدايدا دۇرىس تاماقتانۋعا، مۇمكىندىگىنشە جۇمىس كەستەسىن ىڭعايلاپ، دەنساۋلىقتى كۇتۋگە شاقىردى.
«قاسيەتتى ايدا قايىرىمدىلىق جاساپ، ساۋاپ الۋدى نيەت ەتكەن جاندارعا ايتارىم: اۋىزاشار قوراپتارىن ەرىكتىلەر نەمەسە مەشىت قىزمەتكەرلەرى ارقىلى كومەككە مۇقتاج ازاماتتارعا جەتكىزۋگە بولاتىنىن قاپەرلەرىڭىزگە سالامىن. ءدىني باسقارما رامازان ايىندا سانيتارلىق تالاپتاردى ساقتاي وتىرىپ، قايىرىمدىلىق ءىس-شارالارىن جوسپارلى تۇردە جۇزەگە اسىرادى. بارشاڭىزدى يگى ىسكە ۇلەس قوسۋعا شاقىرامىن» دەدى باس ءمۇفتي.
