ءتۇرى: قازاقستان مۇفتيات جاڭالىقتارى
جولدانعان ۋاقىتى: 12:45 - 2021/04/08
اقتاۋ قالالىق بەكەت اتا مەشىتىنىڭ ەسكى عيماراتىنىڭ ورنىنا جاڭا مەشىت بوي كوتەرەدى. زاماناۋي ۇلگىدەگى مەشىت 900 شارشى مەتر اۋماقتى الىپ، 1 مىڭ ادامعا ارنالادى.
يماندىلىق ورداسىنىڭ قۇرىلىسى قاسيەتتى رامازان ايىنان سوڭ باستالىپ، ءبىر جىلعا سوزىلادى. بۇل تۋرالى بۇگىن اقتاۋ قالالىق بەكەت اتا مەشىتىندە ماڭعىستاۋ وبلىسى اكىمىنىڭ ورىنباسارى ابزال مەڭدىباەۆ، اقتاۋ قالاسىنىڭ اكىمى نۇرداۋلەت قيلىباي، ماڭعىستاۋ وبلىسىنىڭ باس يمامى ءانۋار ەلجانوۆ، اقتاۋ قالالىق بەكەت اتا مەشىتىنىڭ باس يمامى قۇربانبەك ابداليەۆ، وبلىستىق جانە اقتاۋ قالالىق ءماسليحاتتار دەپۋتاتتارى، سونداي-اق مەشىت جاماعاتى مەن قوعام بەلسەندىلەرىنىڭ قاتىسۋىمەن وتكەن باسقوسۋدا ايتىلدى.
جيىندا العاش بولىپ ءسوز العان ماڭعىستاۋ وبلىسىنىڭ باس يمامى ءانۋار ەلجانوۆتىڭ ايتۋىنشا، جاڭا وبلىس ورتالىعىنداعى 17 شاعىناۋدانداعى ەسكى مەشىتتىڭ ورنىنا جاڭا عيمارات تۇرعىزۋ ماسەلەسى كوپتەن ءسوز بولىپ كەلەدى. اللا ءۇيىنىڭ قۇرىلىسىنا جەرگىلىكتى بيلىك تە، جاماعات تا، مەشىت يمامدارى دا قارسى ەمەس، تەك جاڭا مەشىت ءۇيىنىڭ ورنىنا قاتىستى تۇسىنبەۋشىلىك بار.
«جاماعاتتىڭ ءبىرقاتارى جاڭا عيماراتتى قازىرگى ەسكى مەشىتتى قۇلاتىپ، سونىڭ ورنىنا سالۋ كەرەك دەپ سانايدى. ال ءبىرقاتار ازاماتتار كۇمبەزدى عيبادات ءۇيىن قازىرگى اۆتوتۇراقتىڭ ورنىنا، كوشەنىڭ بويىنا تۇرعىزۋدى ۇسىنادى. بۇگىن ەكى جاق ءبىر كەلىسىمگە كەلىپ، اكىمدەر مەن جاماعات الدىندا وسى ماسەلەنىڭ نۇكتەسى قويىلدى» دەدى ءانۋار ءىزىمبايۇلى.
باسقوسۋعا زاماناۋي جوباسىمەن نۇر-سۇلتان قالاسىنان ارنايى كەلگەن كاسىپكەر ساپار يگىلىكۇلى دا قاتىستى. اقتاۋدىڭ 39 شاعىناۋدانىندا بوي كوتەرىپ جاتقان ەرجان حازىرەت مەشىتىنىڭ قۇرىلىسىن جۇرگىزىپ جاتقان كاسىپكەر سىيىمدىلىعى 1 مىڭ ادامدىق، 130 كولىككە ارنالعان تۇراعى بار، ەسىگى كىتاپ سياقتى اشىلاتىن اق ءتۇستى مەشىت ءۇيىنىڭ قۇرىلىسىن رامازان ايى بىتكەن سوڭ باستاۋعا دايىن ەكەنىن ايتتى. زاماناۋي ەسكيزدىك جوبا كوپشىلىك تاراپىنان قولداۋ تاپتى.
«مەشىتتىڭ جوباسى وتە ەرەكشە ەكەن. كوڭىلىمە قونىپ تۇر، الىپ قوساتىن ەشتەڭەسى جوق. ءبىز ءوز تاراپىمىزدان قولداۋ كورسەتەمىز، باستاما وڭ بولعاي!» دەدى وبلىس اكىمىنىڭ ورىنباسارى ابزال مەڭدىباەۆ.
ال اقتاۋ قالاسىنىڭ اكىمى نۇرداۋلەت قيلىباي: «جوبادا مەشىتتىڭ جانىنان فۋتبول الاڭى، قۇران وقۋ بولمەلەرى، مەدرەسە قاراستىرىلعان. تەك اسحانا جوق ەكەن. مەنىڭشە، ءتۇرلى اس پەن ساداقا وتكىزۋگە ارنالعان اسحانا سالىنۋى ءتيىس»، – دەدى اقتاۋ قالاسىنىڭ اكىمى نۇرداۋلەت قيلىباي. يمامدار ءوز كەزەگىندە مەشىت جانىنان اسحانا، قىزمەتكەرلەر ءۇيىن سالۋ كەرەكتىگىن اتاپ ءوتتى. مەشىت جاماعاتى اتىنان ءسوز العان بەكبەرگەن ەسەۋوۆ مەشىت قۇرىلىسىنىڭ باستالۋىن كوپتەن كۇتىپ جۇرگەنىن ايتسا، سۇلەيمەن بوقانوۆ كوپشىلىكپەن بىرگە يگىلىكتى باستامانى قولدايتىنىن جەتكىزدى.
