ءتۇرى: قازاقستان مۇفتيات جاڭالىقتارى
جولدانعان ۋاقىتى: 10:15 - 2021/04/08
قمدب «زەكەت جانە قايىرىمدىلىق» قورىنىڭ وڭىرلەردەگى ون توعىز وكىلدىگىمەن قاسيەتتى رامازان ايىندا اتقارىلاتىن قايىرىمدىلىق ءىس-شارالارىن پىسىقتاۋ ماقساتىندا ونلاين جينالىسى ءوتتى.
«زەكەت جانە قايىرىمدىلىق» قورىنىڭ ديرەكتورى تالعات وماروۆ زەكەت وكىلدەرىنىڭ وتكەن ءۇش ايدا اتقارعان جۇمىستارىن جوعارى باعالاپ، العىسىن ءبىلدىردى.
«بارشاڭىزدى الداعى ۋاقىتتا دا حالىقتىڭ يگىلىگى ءۇشىن بەلسەندى تۇردە جۇمىس ىستەۋگە شاقىرامىن. كەلىپ قالعان ون ەكى ايدىڭ سۇلتانى رامازان ايىندا وتەتىن اۋقىمدى «رامازان كەرۋەنى» اكتسياسى اياسىندا قمدب ءتوراعاسى باس ءمۇفتي ناۋرىزباي قاجى تاعانۇلىنىڭ باستاماسىمەن اسىرەسە، اۋىلدىق ايماقتاردا الەۋمەتتىك جاعدايى تومەن وتباسىلارعا ازىق-تۇلىك سەبەتتەرىن تاراتۋعا باسىمدىق بەرۋىمىز قاجەت. سونداي-اق، پاندەمياعا بايلانىستى ورازا تۇتقان ادامدارعا اۋىزاشار سەبەتتەرىن ۇلەستىرۋ، كارانتين تالاپتارىن ساقتاي وتىرىپ، مۇقتاج وتباسىلارعا ارنايى اۋىزاشار قورجىنى دايىندالادى» دەدى تالعات سەيىتكارىمۇلى.
بۇدان بولەك زەكەتتى قابىلداۋ ماقساتىندا رەسپۋبليكا بويىنشا بارلىق مەشىتتەردە «زەكەت قابىلداۋ بۇرىشىن» اشۋ جايىندا جانە باسقا دا ءبىرقاتار ماسەلەلەر تالقىلاندى. اشىقتىق پرينتسيپتەرىن ساقتاي وتىرىپ، سونىمەن قاتار، زەكەت جانە ساداقانى بەرۋدى جەڭىلدەتۋ ماقساتىندا ارنايى «Kaspi» ءموبيلدى قوسىمشاسىنىڭ QR-كودى ارقىلى قايىرىمدىلىق جاساۋعا بولاتىنى ايتىلدى.
