بۇگىن اتىراۋ قالاسىندا باس ءمۇفتي ناۋرىزباي قاجى تاعانۇلىنىڭ توراعالىعىمەن عۇلامالار كەڭەسىنىڭ كەزەكتى ءححىح ءماجىلىسى باستالدى.

كەڭەس جۇمىسىن اشقان باس ءمۇفتي ناۋرىزباي قاجى تاعانۇلى: «عۇلامالار كەڭەسى شاريعاتىمىزدىڭ نەگىزدەرىنە سۇيەنە وتىرىپ، قوعامدا مۇسىلمان قاۋىمى اراسىندا تۋىنداپ وتىرعان كوكەيكەستى، تۇيتكىلدى ماسەلەلەردى تالقىلاپ، دەر كەزىندە شەشىمدەر شىعارىپ، ءپاتۋالار مەن كونتسەپتۋالدى قۇجاتتار قابىلدايدى.

بىز وتكەن جىلى 14 ءپاتۋا، 4 قۇجات، 4 ەرەجە، ال ونلاين رەجيمدە 11 مالىمدەمە، 7 ۇندەۋ، 2 ءپاتۋا قابىلدادىق. پاندەميا كەزىندە الەمنىڭ ءدىن كوشباسشىلارىن ءبىر مەزەتتە دۇعا جاساۋعا ۇندەدىك. كارانتين جاعدايىندا ناماز وقۋ، جەرلەۋ راسىمدەرىنە قاتىستى ءپاتۋا شىعاردىق. اللاعا شۇكىر، جاماعات ءپاتۋالارىمىزعا مويىنسۇنىپ، ۇندەۋىمىزگە ءۇن قوستى. مۇنىڭ ءبارى عۇلامالار كەڭەسىنىڭ بەلسەندى جۇمىسىنىڭ ناتيجەسىندە جۇزەگە استى. عۇلامالارىمىزعا تاعى دا ايرىقشا العىس ايتامىن» دەدى.

ايتا كەتسەك، عۇلامالار كەڭەسىنىڭ ءححىح ءماجىلىسىنىڭ كۇن تارتىبىندە 4 كونتسەپتۋالدى قۇجات پەن 5 ءپاتۋا تالقىلانباق. اتاپ ايتقاندا، «ۇزدىكسىز ءبىلىم بەرۋ» تۇجىرىمداماسى، «مۇسىلماننىڭ عالامتورداعى كەلبەتى»، «يسلامداعى جاستاردىڭ تۇلعالىق بەينەسى»، «زەكەت جيناۋ مادەنيەتى» سىندى قۇجاتتار مەن «ەكپە ەگۋ ۇكىمى»، «تولەم كارتالارىن قولدانۋ ۇكىمى»، «ساقتاندىرۋ قىزمەتى ۇكىمى»، «بالانى قامقورلىققا الۋ ۇكىمى» سەكىلدى ءپاتۋالاردىڭ جوباسى قارالىپ، قابىلدانباق.

كەڭەس جۇمىسى ەرتەڭ دە جالعاسادى.