ءتۇرى: قازاقستان مۇفتيات جاڭالىقتارى
جولدانعان ۋاقىتى: 13:30 - 2021/02/22
ەل تاۋەلسىزدىگىنىڭ 30 جىلدىعىنا وراي اتىراۋ وبلىسى، يساتاي اۋدانىنا قاراستى جانباي اۋىلىندا ايتەكە بي اتىنداعى جاڭا مەشىت اشىلدى.
عيبادات ءۇيىنىڭ اشىلۋىنا اتىراۋ وبلىسىنىڭ باس يمامى التىنبەك ۇتىسحانۇلى ارنايى قاتىستى. زامان تالاپتارىنا ساي سالىنعان مەشىت جانىندا ءتورت بولمەلى يمام ءۇيى قوسا تۇرعىزىلدى. قازاق تاريحىندا ايرىقشا ءىز قالدىرعان ايتەكە بي اتىنداعى مەشىتتىڭ سىيىمدىلىعى –300 ورىندىق.
وسىلايشا، اتىراۋ وبلىسىنداعى مەشىتتەر سانى 34-كە تولىعىپ وتىر.
«قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعانۇلىنىڭ باستاماسىمەن ەلىمىزدەگى مەشىتتەرگە قازاق دالاسىندا ءىز قالدىرعان بي-شەشەندەرىمىزدىڭ، حان -سۇلتاندار، باتىر تۇلعالاردىڭ اتى بەرىلە باستادى. بىلتىر ماحامبەت اۋدانىنا قاراستى بەيبارىس اۋىلىندا ەسىگىن ايقارا اشقان مەشىتكە قاسىم حاننىڭ ەسىمى بەرىلگەن بولاتىن. وسىناۋ يگى ءداستۇر بۇگىن يساتاي اۋدانىنا قاراستى جانباي اۋىلىندا جالعاسىن تاۋىپ وتىر.
بىزدىڭ ماقساتىمىز – حالقىمىزدىڭ تاريحىن، وتكەنىن، دارا تۇلعالارىن ناسيحاتتاۋ ارقىلى، جاس ۇرپاققا ۇلتتىق نەگىزدە تاربيە بەرۋ» دەدى التىنبەك ۇتىسحانۇلى.
قۇلشىلىق ءۇيىنىڭ اشىلۋ ءراسىمى بارىسىندا جەرگىلىكتى جۇرتشىلىققا باس ءمۇفتي ناۋرىزباي قاجى تاعانۇلىنىڭ بۇيرىعىمەن تاعايىندالعان جانباي اۋىلدىق ايتەكە بي مەشىتىنىڭ يمامى جەنيش سيسەنباەۆ تانىستىرىلدى.
2013 جىلى وڭتۇستىك قازاقستان وبلىسى، شىمكەنت مەدرەسەسىن يسلامتانۋشى ماماندىعىمەن اياقتاعان جەنيش سيسەنباەۆ – ءار جىلدارى ماڭعىستاۋ وبلىسىنداعى قاراقيا اۋداندىق مەشىتىنىڭ باس يمامى، اتالعان وڭىردەگى ءتۇپقاراعان اۋدانىندا سايىن شاپاعاتوۆ مەشىتىنىڭ باس يمامى قىزمەتتەرىن اتقارعان تاجىريبەلى مامان.
