«كوپتەگەن مىسالدار كورسەتىپ وتىرعانىنداي، ادامزات دامۋىنداعى جاڭا مەملەكەتتەر قۇرۋدىڭ شەشۋشى كەزەڭدەرىندە ەرەكشە پاسسيونارلىق باسشىلار پايدا بولىپ، تاريحقا ەنىپ جاتادى. ولار جاڭا ەلدەر تاۋەلسىزدىگىنىڭ سيمۆولى عانا ەمەس، سونىمەن قاتار بەدەلى جوعارى، رۋحاني، زياتكەر كوشباسشى رەتىندە دە تانىلۋدا. ولاردىڭ ىقپالى جەكەلەگەن مەملەكەت شەڭبەرىنەن شىعىپ، وركەنيەتتىڭ دامۋىنا دا جۇيەلى تۇردە ىقپالدىق ەتىپ جاتادى. ولار – دجوردج ۆاشينگتون، ماحاتما گاندي، نەلسون ماندەلا، مۇستافا كەمال اتاتۇرىك، ماحاتحير موحاماد جانە باسقا دا كوشباسشىلار. وسىنداي پاسسيونارلىق تۇلعالاردىڭ قاتارىنا، ءسوزسىز، قازاقستان حالقىنىڭ الەم تانىعان كوشباسشىسى نۇرسۇلتان ءابىشۇلى نازارباەۆ تا جاتادى»، - دەدى جۇماعلوۆ.

ءوز سوزىندە ول ادامزاتقا مۇلدەم جاڭا تاجىريبە الىپ كەلگەن حح عاسىردىڭ سوڭى، كسرو-نىڭ كۇيرەۋى جانە ەۋرازياداعى جاڭا مەملەكەتتەردىڭ قۇرىلۋى ۋاقىتىندا توتاليتارلىق بيلىكتەن دەموكراتيالىق مەملەكەتشىلدىككە اۋىسۋ سەكىلدى كۇردەلى مىندەتتەردى شەشۋدى قاجەت ەتكەندىگىن اتاپ ءوتتى. ونىڭ ايتۋىنشا، ءدال وسى كەزدە، نۇرسۇلتان نازارباەۆتىڭ تۇبەگەيلى نەگىزدەپ، ىسكە اسىرعان مودەلى ەڭ ءتيىمدى دەپ تانىلدى.

«قازىرگى تاڭدا بۇل جالپىعا تانىلعان «نازارباەۆ فەنومەنى» حاقىنادا ايتىلىپ تا، جازىلىپ تا ءجۇر. الەمگە تانىلعان مەملەكەت باسشىلارى، ساراپشىلار مەن ەكونوميستەر، حالىقارالىق ۇيىمدار مەن ءىرى كومپانيالاردىڭ باسشىلارى قازاقستان مەن ونىڭ باسشىسىن ەرەكشە قۇرمەتپەن جانە تاڭدانىسپەن تىلگە تيەك ەتەدى. اقش پرەزيدەنتى باراك وباما نازارباەۆتى «الەم باسشىلارىنا ۇلگى بولارلىق تۇلعا» دەپ اتادى. پان گي مۋن، ۆلاديمير پۋتين، حۋ تسزينتاو، مارگارەت تەتچەر، ەنتوني بلەر دە، دۇنيە ءجۇزىنىڭ باسقا دا كوپتەگەن بەلگىلى ساياساتكەرلەرى وسىنداي پىكىردە»، - دەپ تولىقتىردى ءبىلىم جانە عىلىم ءمينيسترى.