فۋتزال
فۋتزالدان ارداگەرلەر چەمپيوناتىنىڭ جەڭىمپازى انىقتالدى
تارازدا فۋتزالدان ارداگەرلەر اراسىنداعى رەسپۋبليكالىق چەمپيوناتتىڭ فينالدىق ويىندارى ءوتتى. 6 كۇنگە سوزىلعان دوپ دوداسىندا 40 پەن 50 جاستان جوعارى ارداگەرلەردىڭ كوماندالارى سىنعا ءتۇستى.
قازاقستان ارداگەرلەر فۋتبول ليگاسى ۇيىمداستىرعان دودا «تاراز ارەنا» سپورت كەشەنىندە ءوتتى. وعان قازاق فۋتبولىنىڭ اڭىزى سەيىلدا يكرامۇلى بايشاقوۆ كەلىپ قاتىسىپ، جارىستىڭ جوعارعى دەڭگەيدە وتۋىنە مۇرىندىق بولعانىن ايتا كەتەيىك.
40 جاستان جوعارى توپتا 11 ۇجىم سىنعا ءتۇستى. اقتىق ويىندا اقتاۋدان كەلگەن «بس» ۇجىمى «سوزاق» كومانداسىنا جول بەردى. كيەلى تۇركىستاننان كەلگەن كوماندا قارسىلاستارىن 4:0 ەسەبىمەن ويسىراتا ۇتتى. ال كوماندا كاپيتانى قارسىلاستارعا قارسى جاۋاپسىز 4 گول سوقسا دا، ويىن وڭايعا سوققان جوق دەيدى. 50 جاستان جوعارى توپتاعى كوماندالار سانى 12-گە جەتتى. فينالدا اۋليەاتا نامىسىن قورعاعان «جەڭىس» پەن «نامىس» دوداعا ءتۇستى. شەشۋشى ماتچتا «نامىس» كومانداسى قارسىلاسىن 3:1 ەسەبىمەن جەڭىپ، جارىس چەمپيونى اتاندى. چەمپيوناتتىڭ سۇرمەرگەنى قۋاتبەك قوقانۇلى بولسا «بۇگىنگى چەمپيوندىق وتكەن جارىستا جىبەرگەن وقىلىقتىڭ ورنىن تولتىرعان تىڭعىلىقتى دايىندىقتىڭ ناتيجەسى» دەيدى.
جارىستى ۇيىمداستىرۋشىلار «وتكەن جىلمەن سالىستىرعان چەمپيوناتقا قاتىسۋشىلاردىڭ قاتارى كوبەيىپ، قىزىعى ودان بەتەر ارتا تۇسۋدە» دەيدى. ارداگەرلەر ليگاسىنىڭ باس حاتشىسى ينايات قىرىقباەۆ جارىستىڭ ابىرويى جىل سايىن ارتىپ كەلە جاتقانىن تىلگە تيەك ەتتى.
"بىلتىر چەمپيوناتتى وتكىزگەندە 50-دەن جوعارى 9 كوماندا قاتىسقان، 40-تان جوعارى 10 كوماندا قاتىسقان. جالپى سانى 19 كوماندا بولعان. ءبىر جىلدىڭ ىشىندە ءبىزدىڭ چەمپيوناتىمىزدىڭ رەيتىنگى جوعارى كوتەرىلدى دەپ ەسەپتەسە بولادى. كارانتينگە قاراماستان قازاقستاننىڭ تۇكپىر-تۇكپىرىنەن بىرنەشە كوماندالار كەلدى"، دەيدى ي.قىرىقباەۆ.
جەڭىسكە جەتكەن ويىنشىلاردىڭ موينىنا مەدال تاعىلىپ، كوماندالارعا كۋبوك تاپسىرىلدى. ودان وزگە ويىندا ۇزدىك بولعان ويىنشىلاردىڭ دا ەڭبەگى ەلەۋسىز قالمادى. «ۇزدىك قورعاۋشى»، «ۇزدىك سۇرمەرگەن» سىندى بەس ءتۇرلى نوميناتسيالار بويىنشا ماراپاتتالدى. 50 جاستان جوعارى كوماندالار اراسىندا «ۇزدىك قاقپاشى» قانات شەرتاەۆ اتاندى. دەگەنىمەن، «جەڭىس» كومانداسىنىڭ قاقپاشىسى مارات تۋعانباەۆتىڭ دا ونەرى جانكۇيەرلەردى ءتانتى ەتتى. 100 پايىز گولعا اينالىپ تۇرعان ساتتەردىڭ وزىندە ول عالامات سەيۆتەر جاساپ، قاقپاسىن امان الىپ قالىپ جاتتى. ال 40 جاستان جوعارى ۇجىمدار اراسىندا «ۇزدىك ويىنشى» اتاعىن تالعات قويشىباەۆ جەڭىپ الدى.
ءتۇرى: الامان سپورت جاڭالىقتارى
جولدانعان ۋاقىتى: 02:00 - 2021/04/09
پىكىرلەر
0