اتاپ ايتساق، بۇل قاتاردا تەاترلاندىرىلعان قويىلىم، فەستيۆال، كورمە، لەكتسيا، عىلىمي كونفەرەنتسيا، شەبەرلىك ساباعى، ارنايى ونلاين پلاتفورما، چەللەندج، اكتسيا، فلەش-موب سىندى كوپتەگەن مادەني جوبالار بار. اتالعان ءىس-شارالار ۇلتتىق مادەنيەتتى ىلگەرىلەتۋگە، سالت-داستۇرلەردى جانداندىرۋعا، سالاماتتى ءومىر سالتىن ناسيحاتتاۋعا، بۇقارالىق سپورتتى، سونىڭ ىشىندە ۇلتتىق سپورت تۇرلەرىن دامىتۋعا باعىتتالعان.
بيىل، اسىرەسە، كوكتەمنىڭ العاشقى ايى، بەرەكە ماۋسىمى – ناۋرىز ايىنا ەرەكشە مارتەبە بەرىلدى. ياعني رەسپۋبليكالىق جالپى جوسپار بويىنشا ناۋرىز «قازاقتىڭ ۇلتتىق مادەنيەتى مەن ءداستۇرى» ايى رەتىندە بەلگىلەندى. بۇل ايدا ەلدىك مەرەيتويىنىڭ مازمۇنىن بايىتۋعا ارنالعان ءبىرقاتار مادەني ءىس-شارالار وتەدى دەپ جوسپارلانۋدا. ولاي بولۋى زاڭدى دا. ويتكەنى ناۋرىز − مەرەكەگە ەڭ باي ماۋسىمنىڭ ءبىرى. ماسەلەن، ايدىڭ العاشقى كۇنى العىس ايتۋ كۇنى بولسا، 8 ناۋرىز – حالىقارالىق ايەلدەر كۇنى، 22 ناۋرىز – شىعىس حالىقتارىنىڭ جاڭا جىلى. دەمەك، بۇل ايداعى ءتۇرلى ءىس-شارالار لەگى ناۋرىزدىڭ العاشقى كۇنىنەن باستاپ، سوڭىنا دەيىن جالعاسادى.
سونىمەن ايتۋلى شارالاردىڭ ءبىرقاتارىنا توقتالىپ وتسەك، ناۋرىزدىڭ ەڭ ەرەك مەرەكەسى − 1 ناۋرىز العىس ايتۋ كۇنىنە وراي ەلىمىزدە 250-گە جۋىق ارنايى جوبا ءوتتى. ونىڭ 60-تان استامى رەسپۋبليكالىق ۇيىمدار ەنشىسىندە. ماسەلەن، «استانا بالەت» مەملەكەتتىك وپەرا جانە بالەت تەاترى دارىگەرلەردى «شىمىلدىق قۇپياسى» جوباسىمەن قۋانتسا، «قازاقكونتسەرت» ۇجىمى مۇعالىمدەر مەن دارىگەرلەرگە «مەيىرىمدى بولايىقشى، باۋىرلار» كونتسەرتىن ۇسىندى. ال الماتىداعى ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى ۇستازدارعا ارناپ ء«مۇعالىم» قويىلىمىن، ەلوردالىق مۋزىكالىق جاس كورەرمەندەر تەاترى ء«شامشى» ميۋزيكلىن، ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترى دارىگەرلەر، مۇعالىمدەر مەن ەكولوگتارعا ارنالعان «تىڭدا» اتتى مۋزىكالىق كەشىن تارتۋ ەتتى. سونىمەن قاتار م.لەرمونتوۆ اتىنداعى مەملەكەتتىك اكادەميالىق ورىس دراما تەاترى «ادال ايەل» («ۆەرنايا جەنا») سپەكتاكلىن، ۇلتتىق كىتاپحانا №1 بالالار ءۇيىن قولداۋ ماقساتىندا «ايالى الاقان» قايىرىمدىلىق اكتسياسىن، «بوزوق» مەملەكەتتىك تاريحي-مادەني مۋزەي-قورىعى قازاقستان حالقى اسسامبلەياسى وكىلدەرىنىڭ قاتىسۋىمەن «وتانىم بولعان قازاق جەرىنە العىس ايتامىن!» دوڭگەلەك ۇستەلىن وتكىزدى.
مادەنيەت جانە سپورت مينيسترلىگىنىڭ 8 ناۋرىز حالىقارالىق ايەلدەر كۇنىنە جوسپارلاعان جوبالارى دا كوڭىل قۋانتادى. اتاپ ايتساق، «بەينەلەۋ ونەرى تۋىندىلارىنداعى ايەل بەينەسى» كورمەسى، ش.ايمانوۆ اتىنداعى «قازاقفيلم» قورىنداعى ۇلتتىق فيلمدەر كورسەتىلىمى، «ادەبيەتتەگى ايەل جازۋشىلار» دوڭگەلەك ۇستەلى، «استانا وپەرا» مەملەكەتتىك وپەرا جانە بالەت تەاترىندا وتەتىن پ.چايكوۆسكيدىڭ «اققۋ كولى» بالەتى، «استانا بالەت» تەاترىنىڭ «گالا جۇلدىز» گالا-كونتسەرتى، ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ «زەرە» قويىلىمى، قۇدىس قوجامياروۆ اتىنداعى مەملەكەتتىك ۇيعىر مۋزىكالىق كومەديا تەاترىنىڭ «تاباسسۋم» مەرەكەلىك باعدارلاماسى، الماتى قالاسى اكىمىنىڭ ەسترادالىق-سيمفونيالىق وركەسترىنىڭ كونتسەرتى سىندى ءبىرقاتار مەرەكەلىك ءىس-شارا لەگى ايەلدەرگە ارنالعان مەيرامدى ودان ءارى كورىكتەندىرە تۇسەرى ءسوزسىز.
سونداي-اق 14 ناۋرىز كورىسۋ كۇنى قارساڭىندا ەلورداداعى ق.قۋانىشباەۆ اتىنداعى مەملەكەتتىك اكادەميالىق قازاق مۋزىكا دراما تەاترى ۇجىم ارداگەرلەرىمەن كەزدەسۋ، «بوزوق» مەملەكەتتىك تاريحي-مادەني مۋزەي-قورىعى «امال-كورىسۋ مەرەكەسى قازاقستاننىڭ ەجەلگى گەوگرافياسى مەن قازىرگى مادەنيەتى اياسىندا» اتتى ءدارىس ۇيىمداستىرسا، م.اۋەزوۆ اتىنداعى قازاق ۇلتتىق دراما تەاترى ء«جۇز جىلدىق ماحاببات»، «وڭ قول» درامالارىنىڭ كورسەتىلىمىن، عازيزا جۇبانوۆا اتىنداعى اقتوبە وبلىستىق فيلارمونياسى «كورىسەيىك، اعايىن!» كونتسەرتىن، اسقار توقپانوۆ اتىنداعى جامبىل وبلىستىق قازاق دراما تەاترى «كورىسۋ ءداستۇرى» سپەكتاكلىن كورەرمەن نازارىنا ۇسىنادى.
ال كۇللى تۇركى حالقى ءۇشىن جاڭارۋدىڭ سيمۆولىنا اينالعان ناۋرىز مەرەكەسىنىڭ ورنى ۇلتىمىز ءۇشىن تىپتەن ەرەك. ۇلىستىڭ ۇلى كۇنى قارساڭىندا، ياعني 21 مەن 23 ناۋرىز ارالىعىندا ەلىمىزدە 500-دەي ءىس-شارا ۇيىمداستىرۋ جوسپارلانۋدا. ولاردىڭ قاتارىندا ۇلتتىق تاعام تۇرلەرىنىڭ جارمەڭكەسى، ولكەتانۋ ەكسكۋرسيالارى، كونتسەرت، كۆەست، ەتنوكورمە، تەاترلاندىرىلعان قويىلىمدار بار.
«حالقىمىز ءۇشىن تاۋەلسىزدىك ۇعىمىنىڭ ءمانى نەدە؟»، «قازاقستان عاسىرلار بويى ارمانداعان ازاتتىققا قالاي قول جەتكىزدى؟». مىنە، وسى تەكتەس سان ساۋالدى ارقاۋ ەتكەن دوڭگەلەك ۇستەل، ءدارىس پەن سىنىپ ساعاتتارى، ۇلتتىق مۋزىكا اسپاپتارىنىڭ فەستيۆالى ۇيىمداستىرىلادى. سونىمەن قاتار رەسپۋبليكالىق كىتاپحانا زاعيپ جانە ناشار كورەتىن ازاماتتارعا ارنالعان زاعيپ جانە ناشار كورەتىن اقىنداردىڭ «تۇعىرى بيىك تاۋەلسىزدىك» اتتى اۋديو فورماتتاعى جىر جيناعىنىڭ تۇساۋكەسەرىن وتكىزەدى. بۇدان بولەك، رەسپۋبليكالىق نەمىس دراما تەاترى «قاراگوز» سپەكتاكلىن، «ۇلىتاۋ» ۇلتتىق تاريحي-مادەني جانە تابيعي قورىق-مۇراجايى «ماڭگىلىك ەلدىڭ مارتەبەلى ناۋرىزى» اتتى كورمە مەن ەكسكۋرسياسىن، ءسۇيىنباي اتىنداعى الماتى وبلىسىنىڭ فيلارمونياسى «حوش كەلدىڭ، ءاز-ناۋرىز» ءان كەشىن، الماتى قالاسىنىڭ «سازگەن سازى» فولكلورلى-ەتنوگرافيالىق ءانسامبلى «ۇلىستىڭ ۇلى كۇنى» كونتسەرتىن ۇسىنادى. بۇل جيىنداردىڭ ۇلتتىق سالت-داستۇرلەردى جاڭعىرتۋعا، ەكولوگيا مادەنيەتىن قالىپتاستىرۋعا، حالىق اراسىنداعى دوستىق بايلانىستى نىعايتۋعا وڭ ىقپال ەتەرى ءسوزسىز. اتالعان ءىس-شارانىڭ بارلىعى ء«از ناۋرىز – ۇلتتىق سانانىڭ، ۇلتتىق بىرلىكتىڭ جارقىن كورىنىسى» دەگەن ۇرانمەن وتەدى.
جالپى، تاۋەلسىزدىكتىڭ 30 جىلدىعىن اتاپ وتۋگە باعىتتالعان ءىس-شارالار جوسپارى قوعامنىڭ تۇراقتى دامۋىنا جاعداي جاسايتىن جوعارى ءبىلىمدى، ينتەللەكتۋالدى جانە رۋحاني جان دۇنيەسى باي ۇلت قالىپتاستىرۋعا سەرپىن بەرەدى دەپ كۇتىلۋدە.
ءتۇرى: ەگەمەن قازاقستان ماقالالارى مەن جاڭالىقتارى
جولدانعان ۋاقىتى: 09:27 - 2021/03/04
