ءتۇرى: Ult.kz ۇلىت تورابى
جولدانعان ۋاقىتى: 22:40 - 2021/01/27
اقپان ايىنىڭ باسىندا قازاقستانعا كوروناۆيرۋقسا قارسى رەسەيلىك «گام-كوۆيد-ۆاك» (سپۋتنيك V) ۆاكتسيناسىنىڭ 20 مىڭ دوزاسى، ياعني ءبىرىنشى پارتياسى جەتكىزىلەدى. بۇل تۋرالى وكق وتكەن ءباسپاسوز ءماسليحاتىندا دەنساۋلىق ساقتاۋ ءبىرىنشى ۆيتسە-مينيسترى مارات شورانوۆ ايتتى، دەپ حابارلايدى قازاقپارات.
ونىڭ ايتۋىنشا، اتالعان پارتيانى قازاقستان اۋماعىنا اكەلۋ تۋرالى رەسەي تاراپىمەن ءتيىستى كەلىسىمدەر بار.
«15 اقپاننان باستاپ قاراعاندى فارماتسەۆتيكالىق كەشەنى ءوندىرىسىنىڭ «سپۋتنيك V» ۆاكتسيناسى تىركەلەدى. ءقازىردىڭ وزىندە 90 مىڭ دوزا كولەمىندەگى ءبىرىنشى پارتيانىڭ ءوندىرىسى باستالدى. ول 26 اقپاننان باستاپ ءبىرىڭعاي ديستريبيۋتوردىڭ قويمالارىنا جانە ودان ءارى وڭىرلەرگە جونەلتۋگە قولجەتىمدى بولادى. كەيىننەن شىلدە ايىنا دەيىن ءوندىرىس كولەمى 2 ملن دوزاعا دەيىن جەتكىزىلەدى»، - دەدى ءبىرىنشى ۆيتسە-مينيستر.
الدىن الا مالىمەتتەر بويىنشا، بۇل ۆاكتسينانىڭ تيىمدىلىگى شامامەن 92% قۇرايدى.
ەسكە سالا كەتسەك بۇعان دەيىن مارات شورانوۆ ۆاكتسيناتسيا جۇرگىزەر الدىندا دەنە تەمپەراتۋراسى ولشەنىپ، ەپيدەميولوگيالىق انامنەزدى جيناۋ، ساتۋراتسيانى، جۇرەك جيىرىلۋىنىڭ جيىلىگىن، ارتەريالىق قىسىمدى ولشەۋ، تىنىس الۋ جانە جۇرەك-قانتامىر جۇيەسىن اۋسكۋلتاتسيالاۋ جانە جۇتقىنشاقتى تەكسەرۋ شارالارى جاسالاتىنىن ايتقان ەدى. ەگەر تەمپەراتۋرا 37°C-تان اسسا، ۆاكتسيناتسيا كەيىنگە قالدىرىلادى.
