نۇر-سۇلتان. قازاقپارات – قازاقستاندا الداعى ۋاقىتتا الەۋمەتتىك قىزمەتكە مۇقتاج ادامدارعا الەۋمەتتىك قىزمەتكەردى تاڭداۋ مۇمكىندىگى بەرىلمەك. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ قر-دا الەۋمەتتىك قىزمەت كورسەتۋ جۇيەسىن ودان ءارى جاڭعىرتۋدىڭ 2025 جىلعا دەيىنگى ۇلتتىق جوسپارىنىڭ جوباسىندا جازىلعان، دەپ حابارلايدى قازاقپارات.
«الەۋمەتتىك قىزمەت كورسەتۋگە مۇقتاج ادامدارعا ارنايى تاۋارلار مەن قىزمەتتەردى تاڭداۋمەن، قىزمەت كورسەتۋدى ۇيىمداستىرۋمەن قاتار، ولارعا قىزمەت كورسەتەتىن الەۋمەتتىك قىزمەتكەرلەردى تاڭداۋ مۇمكىندىگى ۇسىنىلاتىن بولادى. وسى ماقساتتا الەۋمەتتىك قىزمەتكەرلەردىڭ ءبىرىڭعاي بازاسى قۇرىلادى. وندا الەۋمەتتىك قىزمەتكەرلەردىڭ بىلىكتىلىگى، ولار كورسەتەتىن قىزمەتتەردىڭ تۇرلەرى مەن ساپاسى جانە جۇمىس ناتيجەلەرى تۋرالى اقپارات قامتىلادى»، - دەلىنگەن ۇلتتىق جوسپاردىڭ جوباسىندا.
ء
بىرىڭعاي بازا قىزمەت تۇتىنۋشىلارىنا باسەكەلەستىك ورتادا الەۋمەتتىك قىزمەتكەرلەردى تاڭداۋعا مۇمكىندىك بەرەدى. الەۋمەتتىك قىزمەتكەرلەرگە دەگەن سۇرانىس ولاردىڭ جالاقى دەڭگەيىندە كورىنىس تابادى. الەۋمەتتىك قىزمەتكەرلەردىڭ كاسىپتىك دەڭگەيىن ارتتىرۋ ءۇشىن ۇزدىكسىز ءبىلىم بەرۋ ەلەمەنتتەرىن پايدالانا وتىرىپ، كادرلار دايارلاۋدىڭ كوپ دەڭگەيلى جۇيەسى ەنگىزىلەدى.
ەسكە سالا كەتسەك قازاقستاندا الەۋمەتتىك قىزمەت كورسەتۋ جۇيەسى جاڭعىرتىلاتىنى وتكەن ايدا حابارلانعان ەدى. قازىرگى ۋاقىتتا ەلىمىزدە الەۋمەتتىك قىزمەتكەرلەر تەستتەن ءوتىپ جاتىر. وسى جىلدىڭ 5 جەلتوقسانىنا دەيىن شامامەن 12 مىڭ ادامدى سىناقتان وتكىزۋ جوسپارلانۋدا. تەست الەۋمەتتىك قىزمەتكەرلەردىڭ بازالىق ءبىلىم دەڭگەيىن انىقتاۋ ءۇشىن وتكىزىلەدى. سودان كەيىن ولار وقىتىلادى.
قۇجات جوباسى «اشىق دەرەكتەر» پورتالىندا ورنالاسقان.
ءتۇرى: قازاقپارات جاڭالىقتارى
جولدانعان ۋاقىتى: 22:06 - 2021/01/27
