شىمكەنت. قازاقپارات - شىمكەنتتە ساۋلەت جانە قۇرىلىس باسقارماسىنىڭ بۇرىنعى باسشىسى ون جىلعا سوتتالدى. جەڭىس بايىمبەتوۆ جارتى ميلليارد تەڭگەگە جۋىق بيۋدجەت قاراجاتىن تالان تاراجعا سالعان دەپ ايىپتالىپ وتىر، دەپ حابارلايدى قازاقپارات ءتىلشىسى.
ايتا كەتەيىك، قوماقتى قاراجات 2019 جىلى قالاداعى قۇرىلىس جۇمىستارى جۇرگىزىلگەن جەرلەرگە توپوگرافيالىق ءتۇسىرىلىم جاساۋعا بولىنگەن بولاتىن. شەنەۋنىك مەملەكەتتىك ساتىپ الۋ بارىسىندا ارنايى ليتسەنزياسى جوق مەردىگەرمەن ءسوز بايلاسىپ، قاراجاتتى سول كومپانياعا اۋدارتىپ جىبەرگەن. الايدا اتقارىلعان جۇمىس جارامسىز دەپ تانىلعان. تەرگەۋ بارىسىندا ايىپتالۋشىلار بيۋدجەت قاراجاتىن قولما-قول اقشاعا اۋدارىپ، ءوز پايداسىنا جاراتىپ جۇرگەنى دالەلدەندى. وسى قىلمىسى ءۇشىن كاسىپكەر 8 جىلعا باس بوستاندىعىنان ايىرىلدى.
«مەملەكتەتتىك ساتىپ الۋدى جۇرگىزۋ بارىسندا زاڭ تالابى بۇزىلعان. ونىڭ توپوگرافيالىق ءتۇسىرىلىم تۇسىرۋگە ول زاڭدى تۇلعانىڭ مەملەكەتتىك ليتسەنزياسى بولماعان. سوعان قاراماي ول جەڭىمپاز دەپ تانىلعان جانە كەلىسىمشارت تۇزىلگەن. مىنە، وسىلاي ءارى قاراي ولاردىڭ ارەكەتتەرى جالعاسىپ، ناتيجەسىندە مەملەكەتپەن وسى جۇمىستاردى اتقارۋعا بولىنگەن 498 ملن تەڭگە تالان تاراجعا سالىنىپ، اتقارىلۋى ءتيىس جۇمىستاردىڭ بارلىعى تيىسىنشە ورىندالماعان. سول سەبەپتى ولاردىڭ ارەكەتتەرىن سوت وزدەرىنە سەنىپ تاپسىرىلعان بوتەننىڭ مۇلكىن تالان-تاراجعا سالۋ، جىمقىرۋ دەپ باعالادى. جانە سول بويىنشا تيىسىنشە جازا بەلگىلەندى. تۇپكىلىكتى وسى ەكى قىلمىستاردىڭ جيىندىعىمەن بايىمبەتوۆكە 10 جىلعا باس بوستاندىعىنان ايىرۋ جازاسىن قىلمىستىق-اتقارۋ جۇيەسىنىڭ قاۋىپسىزدىگى ورتاشا مەكەمەسىندە وتەۋ بەلگىلەندى. ودان باسقا ول ءومىر بويىنا مەملەكەتتىك قىزمەتتە جانە مەملەكەتتىك ۇيىمجاردا باسشىلىق قىزمەتتەردى اتقارۋ قۇقىعىنان ايرىلدى»، - دەدى سۋديا ماريار ابدراسيلوۆ.