ال ءقاۋىپتى دەرتتى جۇقتىرعاندار سانى 62 ميلليوننان اسادى. ازىرگە كوروناۆيرۋستى جويۋ مۇمكىن بولماي تۇر.
جەر بەتىندەگى جاعداي جانتۇرشىگەرلىك. ءقازىر الەمدەگى احۋالدى تەك وسىلاي عانا سيپاتتاۋعا بولادى. وكىنىشتىسى، مۇنداي جاعداي ۇزاققا سوزىلاتىن ءتۇرى بار. ءبىر عانا مىسال. كوروناۆيرۋس ىندەتى مەن الەمدە بولىپ جاتقان وزگە دە قيىندىقتارعا بايلانىستى 2021 جىلى الەمدە 235 ميلليون ادام كومەككە مۇقتاج بولادى. بۇل – بىرىككەن ۇلتتار ۇيىمىنا قاراستى گۋمانيتارلىق باسقارما وكىلدەرىنىڭ ءسوزى.
مارك لوۋكوك، بۇۇ باس حاتشىسىنىڭ گۋمانيتارلىق كومەك جونىندەگى ورىنباسارى:
– بيىل الەم بويىنشا 170 ميلليونداي ادام كومەككە مۇقتاج بولادى دەپ ويلادىق. ال 2021 جىلى وسى كورسەتكىش 235 ميلليونعا ارتادى دەپ وتىرمىز. بۇل بيىلمەن سالىستىرعاندا 40 پروتسەنتكە كوپ. جانە ونىڭ ءبارى كوروناۆيرۋسپەن بايلانىستى.
بۇعان سەنبەۋگە سەبەپ جوق. ويتكەنى ەۋروپانىڭ ەڭ دامىعان ەلى گەرمانيانىڭ وزىندە ءقازىر كوروناۆيرۋس ىندەتى ءورشىر تۇر. جاعدايدىڭ كۇردەلى بولعانى سونشا، جەرگىلىكتى اۋرۋحانالاردا ورىن جەتىسپەي جاتىر. بەرليندەگى كەيبىر جانساقتاۋ بولىمدەرى ءتىپتى ناۋقاستاردى قابىلداۋدى توقتاتقان. وزگە وڭىرلەردەگى جاعداي دا وسىعان ۇقساس. دارىگەرلەر ناۋقاستار اعىنىنا توتەپ بەرە الماي، وزدەرى دە ۆيرۋس جۇقتىرعاندار قاتارىنا قوسىلىپ جاتىر.
انگەلا مەركەل، گەرمانيا كانتسلەرى:
– بەرلين مەن تاعى 62 اۋداندا ورتا ەسەپپەن 100 مىڭ ادامعا شاققاندا 200 تۇرعىننان ۆيرۋس انىقتالىپ جاتىر. ەلدىڭ دەنساۋلىق ساقتاۋ مينيسترلىگى جاعدايدى باقىلاۋدا ۇستاۋ ءۇشىن بۇل كورسەتكىشتى بارىنشا قىسقارتۋ كەرەك. پاندەميانى توقتاتۋ ءۇشىن ءار ادام ءوز ۇلەسىن قوسا الادى.
بولگار دارىگەرلەرى دە وسى ءبىر دەرت الدىندا دارمەنسىز كۇي كەشىپ وتىر. قاراشا ايىندا ەلدە ۆيرۋس جۇقتىرعانداردىڭ سانى 3 ەسەگە ارتىپ كەتكەن. ال 100 مىڭ تۇرعىنعا شاققانداعى ءولىم-جىتىم سانى بۇكىل ەۋرووداق بويىنشا ەڭ جوعارى كورسەتكىش بولىپ تۇر.
الەكساندر ستانوەۆسكي، انەستەزيولوگ:
– مەديتسينا ماماندارى ابدەن شارشاپ، ەموتسيالىق تۇرعىدا السىرەي باستادى. سوعان قاراماستان، جۇمىسىمىزدى ءارى قاراي جالعاستىرۋىمىز كەرەك.
ال دۇنيەجۇزىلىك دەنساۋلىق ساقتاۋ ۇيىمىنىڭ باسشىسى بولسا، برازيلياداعى احۋالعا قاتتى الاڭداپ وتىر. ايتۋىنشا، بۇل ەلدەگى جاعداي وتە-موتە كۇردەلى.
تەدروس ادحانوم گەبرەيەسۋس، ددسۇ باس ديرەكتورى:
– ەكى اپتا ىشىندە ەلدەگى ءولىم-جىتىم كورسەتكىشى ايتارلىقتاي ءوسىپ كەتتى. ماسەلەن، قاراشانىڭ باسىندا ءبىر اپتادا 2 جارىم مىڭداي ادام كوروناۆيرۋستان كوز جۇمسا، ءقازىر بۇل كورسەتكىش 4 مىڭ توڭىرەگىندە.
بۇدان بولەك، اتالعان ۇيىم باسشىسى ىندەتتىڭ قالاي جانە قايدا پايدا بولعانىن انىقتاۋ كەرەك دەيدى. ايتۋىنشا، بۇل الداعى ۋاقىتتا بولۋى مۇمكىن ۆيرۋس وشاقتارىنىڭ الدىن الۋعا كومەكتەسەدى. ءوز كەزەگىندە قىتايلىق باق وكىلدەرى كوروناۆيرۋس ۋحان قالاسىندا تابىلعانعا دەيىن ءقاۋىپتى ينفەكتسيا شەتەلدە مۇزداتىلعان تاماق ونىمدەرىندە كەزدەسكەنىن جەتكىزدى.