ورال. قازاقپارات – تۇڭعىش پرەزيدەنت كۇنىنە وراي اقجايىق اۋدانى ورتالىعى چاپاەۆ اۋىلىندا اباي اتىنداعى مەكتەپ گيمنازياسىنىڭ جاڭا عيماراتى پايدالانۋعا بەرىلدى، دەپ حابارلايدى قازاقپارات ءتىلشىسى.
اۋدان تۇرعىندارىن مەرەكەمەن قۇتتىقتاعان وبلىس اكىمى عالي ەسقاليەۆ وڭىردە وسىنداي جاڭالىق-وزگەرىستەردىڭ جالعاسىپ كەلە جاتقاندىعىن جەتكىزدى.
وسى اقجايىق اۋدانىنىڭ وزىندە اۋىلدارعا «كوگىلدىر وتىن»، اۋىز سۋ قۇبىرى تارتىلىپ، قاتقىل تاباندى جول سالىنۋدا.
شيرەك عاسىردان استام تاريحى بار، ۇلى اقىن ەسىمىن يەلەنگەن مەكتەپ گيمنازيا شاكىرتتەرى ەندى ءىشى-سىرتى بىردەي سىڭعىرلاعان جاڭا عيماراتتا ءبىلىم الاتىن بولادى.
«قازاقستان پرەزدەنتى قاسىم-جومارت توقاەۆ «اباي جانە ءححى عاسىرداعى قازاقستان» اتتى ماقالاسىندا ءبىزدىڭ ەلدى، ۇلتتى ابايشا ءسۇيۋدى ۇيرەنۋىمىز، قازاقتىڭ ءار بالاسىن ۇلتجاندى ەتىپ تاربيەلەۋ ءۇشىن ابايدىڭ سارا جولىن جالعاۋىمىز كەرەكتىگىن اتاپ كورسەتكەن بولاتىن. سوندىقتان ۇلى اقىن اتىنداعى مەكتەپ گيمنازيا وسى بيىك ماقسات ۇدەسىنەن كورىنىپ، دارىندى دا ءبىلىمدى شاكىرتتەرىمەن دارالانادى دەپ سەنەمىز»، دەدى ءوڭىر باسشىسى.
«التيم» جشس سالعان ءۇش قاباتتى مەكتەپ قۇرىلىسىنا 1275،05 ملن تەڭگە جۇمسالدى. جاڭا عيماراتتا 102 ورىندىق اسحانا، وقىرمان زالى، ءماجىلىس زالى، سپورت زالى جانە باسقا بولمەلەر ورىن تەپكەن، ءتۇرلى كابينەتتەر زاماناۋي جابدىقتارمەن جاساقتالعان. قىرىقتان استام ءمۇعالىم ساباق بەرەتىن 300 ورىندىق مەكتەپتە 341 وقۋشى ءبىلىم الادى. 100 ورىندىق ينتەرناتتا اۋىلداردان كەلىپ وقيتىن شاكىرتتەر ورنالاسپاقشى.
ەسكە سالا كەتەيىك، بۇدان بۇرىن ورالدا مەكتەپ-ليتسەيدىڭ جاڭا عيماراتقا كوشكەنىن، 200-گە جۋىق وتباسى باسپانالى بولعانىن جازعان ەدىك.
ءتۇرى: قازاقپارات جاڭالىقتارى
جولدانعان ۋاقىتى: 23:42 - 2020/12/01
