كورشى مەملەكەتتەگى قازاقتارعا جاسالعان تارتۋ قازاقستان رەسپۋبليكاسىنىڭ تۇڭعىش پرەزيدەنتى كۇنى جانە ەل تاۋەلسىزدىگىنىڭ 29 جىلدىعىنا ورايلاستىرىلعان. حالىق دانالىعىن جيناقتاعان 300 ەلەكتروندى كىتاپ ىرگەدەگى ەلدىڭ قازاق مەكتەپتەرىنە تاراتىلدى. «دانالىق الىپپەسى» دەپ اتالاتىن تۋىندى وسكەلەڭ ۇرپاقتى ۇلتتىق داستۇردە تاربيەلەي وتىرىپ، بالا بويىنا حالىق دانالىعىن سىڭىرۋگە ىقپال ەتەدى. مۇندا بەسىك جىرىنان باستاپ، بابالار باتاسىنا دەيىن جازىلعان. وعان قوسا الىپپەنىڭ ىشىندە دومبىرا مەن قوبىز ءۇنىن شەرتىپ، حالىق ەرتەگىلەرىن، اڭىزدار مەن جىرلار جايلى «سويلەيتىن» قالامى دا بار. مەرەكە قارساڭىندا جاسالعان مۇنداي سىيلىققا قيىرداعى قازاقتار ءدان ريزا.

رۋسلان دۇيسەنوۆ، قازاقستاننىڭ وزبەكستانداعى ەلشىلىگىنىڭ كەڭەسشىسى:

– قر تۇڭعىش پرەزيدەنتى جانە تاۋەلسىزدىك كۇندەرى قارساڭىندا وزبەكستاندا تۇراتىن قازاق باۋىرلارىمىزعا ۇلكەن سىي جاساپ وتىرمىز. مۇنداعى قانداستارىمىزعا «دانالىق الىپپەسى» دەگەن تۋىندىنى تارتۋ ەتتىك. وزبەكستاندا قايماعى بۇزىلماعان 1،5 ملن استام قازاق ءومىر سۇرەدى. ولار جىراقتا جۇرسە دە، ۇلتىمىزدىڭ مادەنيەتىن، ءسالت-داستۇرىن، ادەت-عۇرپىن بەرىك ۇستانىپ كەلەدى. وسى ورايدا ءبىزدىڭ تۋىندىلاردىڭ پايداسى تيمەك. ويتكەنى مۇندا اتادان قالعان ناقىل سوزدەر، بابادان قالعان باتالار، حالىق اڭىزدارى مەن جىرلار بار.

ازيزا تىلەۋوۆا، مەكتەپ ديرەكتورى:

– بۇل «دانالىق الىپپەسى» كەلەشەكتە وقۋشىلارىمىزعا كىتاپقا دەگەن سۇيىسپەنشىلىگىن، قۇرمەتىن تۋدىرادى. وزدەرى ءسۇيىپ وقيتىن ادەبيەتكە اينالادى دەگەنگە ۇمىتتەمىز. كەلەشەكتە جاستارىمىزدىڭ حالقىمىزدىڭ سالت-داستۇرلەرىن ەستەن شىعارماي، بارىنشا ءسالت-داستۇرىمىزدىڭ قادىرىنە جەتىپ، اتا-بابالارىمىزدىڭ ءسالت-داستۇرىن ءارى قاراي دامىتادى دەگەن ۇمىتتەمىز.