بۇل تۇرعىدا ەڭ الدىمەن كىتاپحاناشىلاردىڭ مارتەبەسىن كوتەرۋ ماسەلەسى قولعا الىنادى. سونىمەن قاتار كىتاپحانانى تسيفرلاندىرىپ، ەڭ باستىسى ونداعى قوردى جىل سايىن 20 پروتسەنتكە جاڭارتۋ كوزدەلىپ وتىر. 

ساندىق ءداۋىر كوز ىلەسپەس جىلدامدىقپەن دامىپ جاتسا دا ءداستۇرلى كىتاپحانانىڭ ماڭىزدىلىعى جويىلمايدى. شىعىس قازاقستاندا مەكتەپ جانە كوللەدج كىتاپحانالارىنىڭ سانى جالپى 700-دەن اسادى. وندا 10 مىڭنان اسا كىتاپ قورى بار. الايدا سونىڭ كوبى – وقۋلىقتار. ەندى وسى ولقىلىق وڭالادى. ءسويتىپ وقۋشىلاردىڭ دا، اتا-انالاردىڭ دا كىتاپ وقۋعا دەگەن قۇمارلىعىن وياتۋعا دەن قويىلادى.

سايرانگۇل ءجۇمادىلوۆا، ءبىلىم باسقارماسىنىڭ باسشىسى:

– بۇل جوبانىڭ باستى ماقساتى – وقۋشىلار مەن اتا-انالار اراسىندا كىتاپ وقۋعا قۇمارلىقتى ارتتىرۋ. سونىمەن قاتار وسى جوبا اياسىندا بارلىق مەكتەپ كىتاپحانالارىن ادەبي كوركەم كىتاپتارمەن تولىقتىرۋ. ونىڭ ىشىندە شەتەل ادەبيەتتەرىمەن تولىقتىرۋ ماقساتى بار.

تاۆريا اۋىلىنداعى مەكتەپ كىتاپحاناشىسى ناتاليا اندرەەۆانى كىتاپحانا جۇيەسىنە بايلانىستى بۇل جاڭالىقتار قاتتى قۋانتتى. ويتكەنى ءوز ماماندىعىنىڭ ستاتۋسى جوعارىلاسا، بۇل رۋحاني دا ماتەريالدىق دا وسىمگە جەتەلەيدى. ءقازىر مۇنداعى كىتاپحانانى تسيفرلاندىرۋ قارقىندى ءجۇرىپ جاتىر.

ناتاليا اندرەەۆا، كىتاپحاناشى:

– ءبىز كىتاپ وقيتىن مەكتەپ جوباسىنا بەلسەندى قاتىسىپ جاتىرمىز. كىتاپ قورىن جاڭالاۋدامىز. سونداي اق QR-كود ارقىلى سيرەك كەزدەسەتىن ادەبيەتتەردى قولجەتىمدى ەتىپ وتىرمىز. وقۋشىلار دا، مۇعالىمدەر دە ەمىن-ەركىن قولدانا الادى.

وسىلايشا تاۆريالىق كىتاپقۇمارلارعا ەسكى ادەبي تۋىندىلار مەن دەرەكتەر تابۋ اسا قيىن ەمەس. ەلباسىنىڭ بالالىق شاعىنان باستاپ كورەگەن كوشباسشىعا اينالعان جولىنا دەيىنگى مالىمەتتەر دە مولىنان. ۇجىم «بۋككروسسينگ»، ياعني ءوزارا كىتاپ الماسۋ اكتسياسىنا دا بەلسەنە قاتىسادى.

اۆتورلارى: ەلميرا.احمەتوۆا، جىگەر باباحانوۆ