ەل-ارنا قولفون نۇسقاسىنا ەنۋ Еларна қолфон нұсқасына ену


ەل-ارنا قولفون نۇسقاسى | "قولفون نۇسقاسىن ءتۇسىرۋ (Android)

Кірілше
جۇكتەۋ-البومىم-البومدار-جەلى
وسى توردى ساقتايمىن! | وسى توردى باس بەت ەتەمىن!

ءبىزدىڭ بايلانىس: elarna2012@gmail.com

Үш күнгы келушылер санағыКелген адам саны (IP)Көрілген бет саны (PWs)КомпйутерҚолфон
2019-09-2010832600477 %23 %
2019-09-21812349637 %63 %
2019-09-22850323838 %62 %


تىركەلىڭىزدەر كىتاپحانا قوجالار تورابى البومدار قازاقتىڭ 1001 ەرتەگىسى

ءتۇرى: جۇلدىز جۋرنالى

جولدانعان ۋاقىتى: 11:00 - 2019/09/12



اڭگىمە

«اللا وتە شاپاعاتتى، وتە مەيىرىمدى، زور راقىم يەسى»

(قۇران-كارىم، حاشر سۇرەسى، 22 ايات)

1.

جانايدار قاتتى نالىدى. نالىتقان جانىنا باتقان اۋرۋ ەمەس، سوناۋ-سوناۋ تاۋ قۋىسىنداعى ءبىر قورا قويدىڭ يەسى، بىلايشا ايتقاندا قوجايىنى – تاڭاتار. دارىگەر جازىپ بەرگەن دارى-دارمەككە ءبىراز قاراجاتى كەتكەن سوڭ، ايلىعىن سۇرايىن دەگەن نيەتپەن كەڭسەگە كەلگەن.

- جۇگى جەڭىل ەسەك جاتاعان كەلەدى دەۋشى ەدى. قاقاعان قىستىڭ ءتۇرى مىناۋ؟!. سىرقاتىڭدى سىلتاۋراتىپ قالاشىل بوپ الدىڭ، پۇل سۇراۋدان وزگە نە بىلەسىڭ سەن، ايتشى؟!.

- ءقانت-شاي الۋعا از-مۇز تيىن-تەبەن عانا...

- كاسسادا اقشا جوق، بەس مىڭ تەڭگە جەتە مە؟!.

قىسىق كوزدەرى ادامنىڭ وڭمەنىنەن وتە قارايتىن، ۇرلەگەن قارىنداي دومالانعان قوجايىن جان قالتاسىنان قىزىل قۇلاق بەسمىڭدىق شىعارىپ، ستولعا تاستاي سالدى.

- راحمەت!

- ەڭبەگىڭدى جەمەيمىن، ونداي ويدان اۋلاق بول!.. – دەدى قالتا تەلەفونىنا جارماسىپ. – تەزىرەك قايت، كوپ ۇزاماي مەن دە بارىپ قالارمىن.

زاڭكيگەن ەكى قاباتتى كوتتەدجدەن ۇزاڭقىراعان جانايدار اشۋ-ىزاسىن تەجەي الساشى.

- بۇيتكەن تىرلىگى قۇرىسىن! – دەدى جەرگە ءبىر تۇكىرىپ. - ءتىس بەرگەن اللا، تىسكە باسارىن دا بەرەر. ءاي-ي، بولمادى-اۋ، بۇل تىىرلىك؟!.

قىستىعا جوتەلگەن جىگىت بۋلىقتى. ءجۇرىسى قيىنداعان سوڭ شوكەلەي وتىرا كەتكەن. كەۋدە تۇسى سىرىلداپ، قالا شەتىندەگى اۆتوبەكەتكە زورعا جەتتى.

2.

اقشۇناق اياز شاقىلداپ تۇر، كەش باتۋعا تاقاۋ. مانار تاۋ ەتەگىنەدەگى جالعىز ءۇي مۇرجاسىنان بولار-بولماس ءتۇتىن شىعۋدا. قورشاۋ شارباقتاعى قويلاردى كەڭ بازعا قاماپ، جاسى وتىزدارداعى جاس كەلىنشەك ءابجىل قيمىلمەن زىر جۇگىرىپ ءجۇر. «ماياداعى ءشوپتى قار باسىپ قالادى-اۋ! بارىنەن دە، وتاعاسىنىڭ جاتىپ قالعانى قيىن بولدى. قۋ تىرشىلىككە الدانىپ، اسقىندىرىپ الدى اۋرۋىن. بىرەۋدىڭ مالىن باعىپ جەر ارقاسى قياندا وتىرمىز. سونداعى تولەيتىنى ءشاي-سۋدان اسپايدى. جاز شىعا ازاپتان قۇتىلارمىز، قالاعا كوشەمىز دەگەن كۇيەۋى. الداعى ءومىردى كىم بولجاعان؟!. بەس-التى كۇنگە سۇرانىپ كەتكەن كومەكشى شوپان جولامان دا كەشىكتى. قايىرشىعا جەل دە قارسى سوعا ما، قالاي ءوزى؟!. قالتا تەلەفون دا ۇستامايدى بۇ جەردە...»

كەشەلى بەرى دەرتى اسقىنعان سياقتى جانايداردىڭ. مازاسى قاشىپ، ايقايلاپ ويانىپ ءجۇر كوزى ىلىنسە. ولاي-پىلاي بولىپ كەتسە نە ىستەيدى، قايدا بارادى؟!.

استافيراللا! ءتىلىم تاسقا، جاقسىلىققا جوريىنشى، ءباتىر-اۋ؟!.

قاراسى جەتى جۇزدەي قويدى قاماعان جاس ايەل مال قورانىڭ ايقارما ەسىگىن مىقتاپ جاۋىپ، كۇرەڭ اتتى شاناعا جەگىپ، قىستاۋ شەتىندەگى ماياعا بارىپ ءشوپ تيەدى. ونى اكەلىپ دەندىكتەگى ۇزىنشا وتتىقتارعا توعىتتى. نەشە مارتە قاتىناپ، تىستاعى جۇمىستاردى تاپ-تۇيناقتاي ەتتى.

3.

تورگى ۇيدەگى توسەكتە شالقاسىنان جاتقان قارا تورى جىگىت جوتەلە الماي بۋلىقتى.

- اللا-اي!.. جانىم-اي!.. – دەدى وڭ قىرىنا اۋدارىلىپ. - باتپانداپ كىرگەن اۋرۋ، مىسقالداپ شىعۋشى ەدى؟!. مەندەگى دەرتتىڭ شيپاسى جوق-اۋ، وسى؟!.

السىزدىك مەڭدەگەن سىرقاتىن ءاۋ باستا ادەتتەگىدەي تۇماۋ شىعار دەپ ونشا ەلەمەگەن. كۇندە تاڭەرتەڭ اشقارىنعا قويدىڭ قۇيرىق مايىن ىسىتىپ ءىشىپ، جاتار الدىندا اياعىن ىستىق سۋعا سالدى، كەۋدەسىنە قىشا قاعازىن جاپسىردى. ەشبىرەۋى ەم بولماعاسىن اۋداندىق اۋرۋحاناعا ات باسىن تىرەگەن. قاتتى سۋىق تيگەن، مىنا دارىلەردى قاداعالاپ ىشسەڭىز، قۇلان-تازا جازىلىپ كەتەسىز دەدى دارىگەر. كەلە سالا سەمىز توقتى سويىپ، سورپالاندى، دارىلەردى دە ىقتياتتاپ ءىشىپ باقتى. ءبارىبىر اۋرۋى اسقىنىپ بارادى.

العاشقى كۇندەرى كەسپە كوجە سوراپتاپ، ەكى-ۇشى كەسە ءشاي ىشەتىن. جارتى ايدان بەرگى تالشىعى – قارا سۋ.

- ءىھى!.. ءىھى!..

تەكەمەت ۇستىندە ويناپ وتىرعان ەكى بالانىڭ جان داۋىسى شىقتى:

- اكە!.. اكە-ە!..

التى جاسار تاڭاتار قارىنداسىنا قامقورلىق تانىتىپ بايەك:

- اينۇر، جىلاما! اكەمىز كوپ-كوپ ءدارى ىشسە تەز جازىلادى.

-تۇلا ما؟! لاس ايتاسىڭ با، اعا؟!.

شىناشاقتاي قىز اعاسىنىڭ سوزىنە يلاندى. جىلاۋىن قويىپ، كوزدەرىن ۋقالادى.

- قالنىم اشتى...

- ءقازىر تاماق بەرەمىن. - تاڭاتار تايپاق ۇستەل شەتىندەگى تۇستەن قالعان ەت پەن تۋرالعان ناندى ورتاعا قويدى. اق شاۋگىمدە قايناعان ءشايدان كەسەگە تولتىرا قۇيدى.

- اينۇر، جاقىن وتىر.

اعايىندى ەكەۋ اس ءىشىپ وتىرعان كەزدە، سىرتقى ەسىك سىقىرلاي اشىلدى، انالارى ەكەن. اينۇر ايىرىقشا قۋاندى.

- و-و، اناشىم كەلدى، - دەپ تۇرا جۇگىردى.

- بالاپاندىرىم-اۋ، قارىندارىڭ اشتى ما؟! توڭدىڭدار ما؟!. پەشكە كومىر سالايىن، جىلىناسىڭدار. ىستىق تاماق ىستەيمىن ءقازىر... اكەلەرىڭ قالاي؟!.

- اكەم كوپ جوتەلدى، - دەدى تاڭاتار مۇڭايىپ.

- مەن جىلادىم، - دەدى اينۇر بۇرتيىپ.

- نەگە التىنىم؟!.

- اكەم قاشان تۇلادى؟ – جۇرەگى نازىك اينۇردىڭ جانارى بوتالادى.

- ۇرەيلەرىڭ ۇشپاسىن قارعالارىم! اكەلەرىڭ ەرتەڭ-اق ورنىنان تۇرار! كۇن اشىلىپ، بوران دا تولاستار! دالاعا شىعىپ، وينايسىڭدار، ءالى-اق!..

ۇمىت وتىن جاققان ايەل ءوز سوزىنە ءوزى دە سەنگەندەي.

- سولاي ما، اناشىم؟!

- راس، قۇلىندارىم.

4.

ىستىق تاماق ءىشىپ، بويلارى جىلىنعان بالالاردىڭ كوزدەرى كىلەگەيلەنىپ، ماۋجىراي باستاعان. انالارى ءوز بولمەلەرىنە اپارىپ توسەكتەرىن سالىپ جاتقىزدى. ەشنارسەدەن بەيحابار سابيلەر ازدان سوڭ ءتاتتى ۇيقى قۇشاعىنا ەندى.

اۋىر تىنىستاپ، كەۋدەسى سىرىلداعان ەركەك ءۇنسىز. «ات ارىسا – تۋلاق، ەر ارىسا – ارۋاق» دەگەن وسى-اۋ، ايعا جەتپەي تۇرالاۋىن-اي، - دەدى ىشىنەن قانشا ويلاسا دا، دەنى ساۋ كۇندەگى قىزىل شىرايلى، قاپساعاي دەنەلى جانايدارىن ەلەستەتە الماي.

وتاعاسى ويلى جانارىن ءبىر نۇكتەگە قاداپ، تىستەنىپ جاتىر. ايەلدىڭ جۇرەگى اتقاقتاي سوقتى. كۇيەۋىنىڭ ماڭدايىن قولىمەن ۇستاپ ەدى، ىستىعى كوتەرىلىپ جاتىر. ۇشىپ تۇرەگەلىپ، تازا سۇلگىنى سۋىق سۋعا شىلاپ، قىزىپ-جانعان اۋرۋدىڭ ماڭدايىنا باستى.

- قاراقورا قورعانىم-اي، قايتەيىن...

ۋا، ءتاڭىرىم، جار بولا گور ءبىر ءوزىڭ!

ساۋىعىپ كەتۋىن ءناسىپ ەت،

جاقسىلىقتى ءناسىپ ەت! – دەدى كۇبىرلەي سويلەپ.

وتاعاسى اۋىزىن جىبىرلاتىپ، بىردەڭە ايتقىسى كەلگەندەي ۇمسىنعان. قانشايىم ەڭكەيىپ، قۇلاعىن توستى.

- تۇنگە قاراي اسقىناتىن ادەتى ەمەس پە اۋرۋدىڭ؟!. مىقتى بول وزىڭە!..

- جانىم-اۋ، سىبىرلاساڭ دا... ءوستىپ تىرلىگىڭدى ءبىلدىرشى، زارەم ۇشتى عوي.

- ارتىق اۋىز رەنجىتسەم كەشىر!.. كەش-ش!..

- نە دەپ كەتتىڭ، وتاعاسى-اۋ!.. ولاي دەمەشى...

كەنەت ەركەكتىڭ وتسىز جانارى ءبىر نۇكتەگە تەسىلە قادالدى دا، وڭ جاعىنا قاراي باسى سىلق ەتە ءتۇستى.

- جانايدار-ر!.. جانايدار-ر!.. باسىڭدى بۇرشى بەر قاراي؟!. ءتىل قاتىپ ەدىڭ الگىندە؟!. نە بولدى ساعان جانىم-اۋ؟!. اللا-اي!.. كەڭشىلىگىڭدى بەرە گور؟!.

ادام قازاسىن كورمەگەن جاس كەلىنشەكتىڭ دەگبىرى قاشتى. ايقايلاپ جىلاسا شيەتتەي بالالارىنىڭ ۇرەيى ۇشپاي ما؟! بويىنا توسىننان كۇش-قۋات ەنگەندەي قاتايىپ العان. كۇيەۋىنىڭ اشىق قالعان كوزىن جاۋىپ، مەدەت تىلەدى تاڭىردەن. ءمايىتتى وڭ قىرىنا اقىرىن جانتايتىپ، جان-جاعىن كورپەمەن قىمتادى، ۇيقىداعى بالالارىن وياتتى.

- التىندارىم، بىلەسىڭدەر عوي اكەلەرىڭنىڭ اۋىرىپ جاتقانىن. كوزى جاڭا عانا ءىلىندى، مازاسىن الماڭدار، - دەدى ۇرەيى ۇشىپ تۇرسا دا، باتىل-باتىل سويلەپ.

- ءسىز ۇيىقتامايسىز با؟!

- مەن كورشى اۋىلعا بارىپ كەلەمىن، قورىقپايسىڭدار ما؟!

- اكەمىز جاتىر عوي، نەدەن قورقامىز.

- سويتىڭدەر بالاپاندارىم! اۋىزعى بولمەنىڭ جارىعىن جاعىپ، ەسىكتى سىرتىنان بەكىتىپ كەتەمىن.

قانشايىم قالىڭ كيىندى، تور توبەل اتتى تەزدەتە ەرتتەپ، كورشى قىستاققا بەت تۇزەدى.

5.

شۇبار ءتوس ارلان ءبىرىنىڭ سوڭىنان ءبىرى شۇبىرعان ءۇش قاسقىردان كوز ايىرمايدى. توپ باسىندا ەكى ءالجۋازداۋ قاسقىر. ولار جول تاپتاپ، سونىعا ءىز سالىپ كەلەدى. وتيار تاۋىنان تاڭەرتەڭ شىققان ءتۇز تاعىلارى تالاي جەردى شارلادى. انشەيىندە كەزىگە قوياتىن قويان مەن قارساقتار دا كورىنبەيدى. قار قالىڭ بولعاسىن باسقا جاققا اۋا كوشكەن بە، ءتايىرى؟! بوران دا ادىمدارىن اشتىرماي جولدارىنا بوگەت بولۋدا.

شۇبار ءتوس كەنەت تۇرا قالدى. ادام ءيىسى... ىزىڭداعان جەل ەشنارسەنى ەستىرتەر ەمەس. كوك ءبورى تۇيسىگى جاڭىلىپ كورمەگەن. انانداي جەردە قاراڭداپ، قالىڭ قاردى ومبىلاپ، سالت اتتى كىسى كەلە جاتىر.

تورتوبەل قۇلاقتارىن قايشىلاپ وسقىرىندى. ەر ۇستىندەگى اققۇباشا ايەلدىڭ جۇرەگى زۋ ەتتى. ءتۇز تاعىلارى سوستيىپ-سوستيىپ تۇرا قالعان.

- ءيا، اللام!.. ءبىر ءوزىڭ جار بول!.. – ايەل اتىن قامشىلادى.

- كەتىڭدەر دەيمىن، كەتىڭدەر،

جاقىنداپ كورىڭدەر وسىدان!..

ايقاي – كورسەتكەن سەسى، قۋات العانداي ءوزى. ورەكپىگەن جۇرەگىن باسىپ، سابىر ساقتاۋعا تىرىستى.

-كەتىڭدەر دەيمىن، كەتىڭدەر!..

جاقىنداپ كورىڭدەر وسىدان!..

تورتوبەل جەر تارپىدى. توپ باسشىسى - شۇبار ءتوس ارلان ەسىك پەن توردەي العا وزعان. كوزدەرى وت شاشقان بورىلەر اراسى بىر-بىرىنەن الشاقتاپ شەڭبەر قۇراعان.

- كەتىڭدەر دەيمىن، كەتىڭدەر،

تاقاپ كورىڭدەر وسىدان!..

تۇز تاعىلارى قۋلىققا كوشتى. دوعاشا ءيىلىپ، سالت اتتى ايەلدى الىستان قورشاپ قاتارلاسا ەرىپ كەلەدى. ۇرىمتال تۇستا تۇرا شاپپاق.

«سويىلدان وزگە دانەڭەسى جوق ايەلدىڭ قانداي قاۋقارى بار؟!.»

بۇل شۇبار ءتوس ارلاننىڭ ىشكى ويى بولاتىن.

- اعا-ا؟!.

تۇسىنەن شوشىدى ما، الدە اناسىن ىزدەدى مە اينۇر كوزىن اشىپ الدى. تاڭاتار تەرەڭ ۇيقى قۇشاعىندا.

- اعا-ا؟!. اعا دەيمىن، تۇلشى؟!

سەلك ەتە باسىن كوتەرگەن تاڭاتار باستاپقىدا ەشتەڭەنىڭ بايىبىنا بارعان جوق. ۇرەيى ۇشقان، كوزدەرى باقىرايعان قارىنداسى دىرىلدەي، ءبۇرىسىپ وتىر.

- نە بولدى اينۇر؟

- انام قايدا؟

- باعانا ايتتى ەمەس پە، كەشىكپەي كەلەدى.

- كەلە مە؟

- قورىقپا، جاتا عوي.

- توڭدىم.

- ۇستىڭە تاعى ءبىر كورپە جابايىن، جىلىناسىڭ.

- اعا-ا!.. اكەمنىڭ قاسىنا بالىپ جاتايىنشى.

- مامام ايتتى عوي، مازاسىن الماڭدار دەپ.

- اكەمنىڭ قاسىنا بالايىقشى؟!.

- مامام ۇرسادى! بارۋعا بولمايدى!..

- بالامىن... اكەمە!..

اينۇر ەڭىرەپ قويا بەردى. اعاسى قارىنداسىن قانشا الداپ-سۋلاسا دا كوندىرە الماعان سوڭ، جاپسارلاس بولمەدەگى اكەلەرىنىڭ قاسىنا كەلدى. وتاعاسى قوزعالار ەمەس. ايەلى جاتقىزعان ورىندا سول قالپى جاتىر.

تاڭاتار كورپەنى اشىپ، ءوزى سول جاعىنا، اينۇر وڭ جاعىنا اكەلەرىن تارس قۇشاقتاپ جابىسا جاتتى. كوڭىلدەرى جايلانىپ، سالدەن سوڭ كوزدەرىنىڭ قالاي ءىلىنىپ كەتكەندەرىن بىلمەي قالدى.

دالادا الاي-تۇلەي، ۇلىعان بوران...

7.

قايدان بىتكەن قايرات-جىگەر؟! ۇرەيى ۇشقان، كوزدەرى باقىرايعان قانشايىمدى تانۋ قيىن. وڭ قولىنداعى ۇزىن سويىلدى وڭدى-سولدى سىلتەپ، جاتتاندى سوزىنەن جاڭىلار ەمەس:

- كەتىڭدەر دەيمىن، كەتىڭدەر،

تاقاپ كورىڭدەر وسىدان!..

كەنەت ات ۇستىندەگى ايەل داۋىستاپ، سويلەپ جونەلدى:

- تورتوبەل، ماعان رەنجىمە سەن؟!. جاعدايدى ءتۇسىندىڭ عوي! بۇلاي ەتپەسەم استە بولماس. اتتەگەن-اي!.. مىلتىق الا شىققاندا، قاسقىرلار باسىنباس ەدى ءبۇيتىپ... تارس ەتكىزىپ باسىپ سالمايمىن با؟!. امبە ءبورى اتاۋلى ءوق-دارىنىڭ ءيىسىن سوناۋ-سوناۋ جەردەن سەزىپ بىلەدى... اشتىقتان كوزدەرى قارايعان جىرتقىشقا كەرەگى اس. قاسارىسىپ قارسى تۇرار قاۋقار جوق ەكەۋمىزدە. كوزدەرى جاۋدىرەپ ەكى بالام قالدى ۇيدە، كۇيەۋىم قايتىس بولدى. ءتىرى ادام تىرشىلىك ەتپەك، وتاعاسىنىڭ و دۇنيەگە وزعانىن ايتۋعا شىقتىم عوي امالسىز، سول ءۇشىن سەنى بوس قويا بەرەمىن.

اي، قاسكويلەر! جاقىنداپ كورىڭدەر وسىدان!.

ايقايلاي سويلەپ، سويىلدى وڭدى-سولدى بۇلعاعان ايەلدىڭ داۋىسى قارلىقتى. اتىن تەبىنىپ، ەر ۇستىندە قوپاڭداپ، كوتەرىلىپ-كوتەرىلىپ قويادى.

تۇسىنەمىسىڭ تورتوبەل،

ماعان بوساڭسۋعا بولمايدى.

وپىنعانمەن نە پايدا؟

وكىنىش ورنى تولمايدى. ولاي ەتسەم، بوق باسىندا ءولىپ قالمايمىن با؟!. ولگىم كەلمەيدى مەنىڭ! ءتاڭىرىم، قۇتقارا گور؟!. جاردەم بەر!..

تورتوبەل، مەن سەنى بوس قويا بەرەمىن. انا ارلاندارمەن ايقاسىپ، الدىڭا كەلگەنىن تىستەپ، ارتىڭا كەلگەنىن تەۋىپ قۇتىلىپ تا كەتەرسىڭ بالكىم؟!. ءبارى ءتاڭىردىڭ قولىندا عوي؟!. مەنىڭ قالايدا ءتىرى قالۋىم كەرەك!.. بالالارىم جەتىم قالماۋى ءۇشىن!.. كۇيەۋىمدى اقتىق ساپارعا ارۋلاپ جونەلتۋ ءۇشىن!..

تورتوبەل دەيمىن، ءاي تورتوبەل؟!.

سەن ماعان رەنجىمە؟!

وزگە ايلا قالمادى؟!.

ۋا، ءتاڭىرىم، كۇش-قۋات بەرە گور!

وزىڭنەن عانا تىلەيمىن،

وزىڭنەن عانا سۇرايمىن،

وزىڭە ءوتىنىش جاسايمىن!

قالدىرما مەنى دالادا؟!

قاسقىرلارعا تالاتپا!

كەتىڭدەر دەيمىن، كەتىڭدەر!..

جاقىنداپ كورىڭدەر وسىدان!..

8.

اسپان الەمىندە تۇتاسقان قاراقوشقىل بۇلتتار ىدىراپ، جارىق اي ساۋلەسى قيعاشتاي تۇسەدى. جەل ەكپىنى باسەڭسىپتى. كوپ ۇزاماي بوران دا باسىلار، ءتۇن پەردەسى دە تۇرىلەر. اش قاسقىرلار قۇرساۋىنان شىعا الا ما قانشايىم؟!. سابىت ءتۇستى-اۋ باسىنا!.. تاعدىر تالقىسى ما ءدوپ كەلگەن؟!. نە كۇتىپ تۇر ونى الدا؟!. سورماڭداي ما سونشاما؟!. مەحنات كوردى-اۋ قانشاما؟!.

ات ۇستىندەگى ايەلدى قورشاعان اش بورىلەر ءبىرتىن-بىرتىن جاقىنداي تۇسكەن. جاسىل كوزدەرى وت شاشادى. ىرعىپ-سەكىرىپ تورتوبەلدىڭ شابىنان الا تۇسۋگە ادام مىسى باساتىنداي ما، قالاي ءوزى؟! اڭىسىن اڭدىعان ءلازىم، سابىر ساقتايىق!.. ءوز اياعىمەن كەلگەن ولجادان ايىرىلا قويماسپىز.

ايەل ءالى تىڭ. اتىن تەبىنە ءتۇسىپ، وڭ قولىنداعى اعاش سويىلدى اينالدىرا ايقايعا باسىپ ءجۇر:

- كەتىڭدەر دەيمىن، كەتىڭدەر!..

جاقىنداپ كورىڭدەر وسىدان!..

بىر-بىرلەپ جايراتىپ سالامىن!..

اككى شۇبار ءتوس ارلان ايەلدىڭ انشەيىن قوقان-لوققىسى ەكەنىن بىلەدى. قاشانعا جەتەر قايراتى، داۋىسى دا قارلىعار، زورىعىپ، شارشار دەپ ويلادى ازۋ تىستەرىن اقسيتا ىرىلداپ.

قانشايىم بايقايدى، ىلكىدە الىستاۋ جۇرگەن بورىلەر شەڭبەرى تارىلا تۇسكەندەي. قۇر ايقايدان، سويىل سىلتەۋدەن ەشتەڭە ونبەسىن سەزگەن ايەل تىزگىن تارتىپ، جەرگە ءتۇستى. كەدەرگى بولار دەپ قوس ايىلدى بوساتىپ، ەر توقىمىن الدى. اتتى موينىنان قۇشاقتاپ، باسىنداعى جۇگەندى سىپىرىپ ەدى، كىسىنەپ شابا جونەلدى جانۋار.

- شاپ جانۋار، سىلتە!.. الاڭداما ارتىڭا!..

ايەل داۋىسى تارعىلدانىپ ايقايلادى.

مۇنداي وقىس جاعدايدى كۇتپەگەن قاسقىرلار تاڭ-توسىن. ءالى بولدىرا قويماعان تورتوبەل كەلگەن ىزىمەن قىستاقتى بەتكە الا تارتا جونەلگەندە، بورىلەر دە شۇبىرا ىلەستى سوڭىنان.

قىستىعىپ زورعا كەلە جاتقان ايەل ۇستاي المادى ءوز-وزىن. تۇرعان جەرىندە وتىرا قالىپ، ەبىل-دەبىل جىلادى. مانادان بەرگى اشۋ-ىزا قوس جانارىنان جاس بولىپ پارلادى-اي!.. ءبىراق ەسىن تەز جيدى. بۇلاي ەتۋگە بولمايدى! ارەكەت كەرەك!.. جوبالاۋىنشا ءبىراز جول ءجۇرىپ وتكەن سياقتى. شالبارىنان ىزعار ءوتىپ بارادى. ورنىنان شيراق تۇرەگەلدى، اي جارىعى سەبەزدەپ، اينالا توڭىرەك ايقىندالعانداي. ابىرويى - بوران سايابىرلاعان، كەلە جاتقان باعىتى دا ءتۇزۋ سياقتى.

- يا، اللا، وڭعارتا گور جولىمدى، – دەدى جىگەرلەنىپ. سويىلىن سۇيرەتىپ العا تارتتى.

...تاڭ اعاراڭداي باستاعاندا ون بەس ءتۇتىنى بار اقتاس ەلدى مەكەنى كوزىنە وتتاي باسىلدى. اۋىل ادامدارى تۇرا قويماعان سەكىلدى. شەتتەگى ۇلكەن بازدىڭ الدىنداعى بيىك باعانا باسىندا ەلەكتر شامى جارقىراي ساۋلە شاشادى. وزىنە تانىس شەت جاقتاعى كوك شاتىرلى ۇيگە بۇرىلدى.

9.

قاتتى شارشاعان، توڭىپ-جاۋراعان قانشايىم جاماعايىنى ماعزوم ۇيىندە ىستىق ءشاي ءىشىپ، ورازاسىن اشقان سوڭ كيىمشەڭ كۇيدە توسەككە قيسايدى.

- سوڭىنىڭ قايىرىن بەرسىن، - دەدى تۋىسى جاعدايدى ەستىپ بىلگەن سوڭ. – سەن بىر-ەكى ساعات دەم ال، وعان دەيىن مەن جىگىتتەرگە حابار ايتىپ، ءجۇرۋدىڭ قامىن جاسايىق.

قانشا ۇيىقتاعانى بەلگىسىز، قانشايىم تىڭايىپ قالىپتى. تۇرا سالا جينالا باستادى.

ات شانا مەن ءۇش سالت اتقا مىنگەن ادامدار جانايدارلار وتىرعان قىستاۋعا كۇن تۇساۋ بويى كوتەرىلگەندە كەلىپ جەتتى. سىرتقى ەسىكتى اشىپ ىشكە ەنگەندە، دالىزدەگى تىقىردى ەستىگەن بالالار الدارىنان شىقتى.

- اناشىم، كەلدىڭ بە؟ – دەدى اينۇر شەشەسىن قۇشاقتاپ.

- كەلدىم جاندارىم، كەلدىم... قورىققان جوقسىڭدار ما؟!

- قورىققان جوقپىز، - دەدى ەرەسەكتەۋ تاڭاتار.

-توڭدىق، - دەدى اينۇر تاقىلداپ. – اكەم دە توڭدى، ول ءالى ۇيىقتاپ جاتىر. ەندى وياناتىن شىعار...

- اكەڭدى ويلاعان، اكەڭدى ساعىنعان جۇرەگىڭنەن اينالدىم!

قانشايىم كىشكەنتاي قىزىن قۇشاقتاپ، بەتىنەن ءسۇيدى.



ماتەريالدى كوشىرىپ جاريالاۋ ءۇشىن رەداكتسيانىڭ نەمەسە اۆتوردىڭ جازباشا، اۋىزشا رۇقساتى قاجەت جانە Adebiportal.kz پورتالىنا گيپەرسىلتەمە بەرىلۋى ءتيىس. اۆتورلىق قۇقىق ساقتالماعان جاعدايدا قر اۆتورلىق قۇقىق جانە ساباقتاس قۇقىقتار تۋرالى زاڭىمەن قورعالادى. Adebiportal@gmail.com 8(7172) 79 82 12 (ىشكى – 112)

ماقالا اۆتورىنىڭ كوزقاراسى رەداكتسيانىڭ كوزقاراسىن بىلدىرمەيدى.




كەلۋ قاينارى: http://www.elarna.net/koru.php?tur=30&id=1046981

پىكىرلەر:


جازعان لەبىزىڭىز300 ارىپتەن اسپاسىن!
ادام نەمەسە ۋيروس ەكەندىگىڭىزدى تۇراقتاندىرۋ سۇراعى، كاتەكشەگە ءجۇز دەپ سيفىرمەن جازىڭىز، راحىمەت!

ەل-ارنا ءوز گازەتى

ەڭ جاڭا ماقالالار


زاعيپ ۆەلومارافونشىلار 4 مينوت
"ۇلى دالا تاريحى&q 9 مينوت
قۋاندىق تۇمەنباي. اشىلى 19 مينوت
中国哈萨克语广播网 19 مينوت
قپل: «استانا» سىرت الاڭ 1 ساعات
گولوۆكين-دەرەۆيانچەنكو 1 ساعات
中国哈萨克语广播网 1 ساعات
عالىمدار شايدىڭ ميعا جا 1 ساعات
ەلوردادا 23 قىركۇيەكتە 1 ساعات
中国哈萨克语广播网 1 ساعات
ۇلتتىق سپورت تۇرلەرىنەن 2 ساعات
中国哈萨克语广播网 2 ساعات
شاي ميعا جاقسى اسەر ەتە 2 ساعات
نۇر-سۇلتانداعى كوشە ساۋ 2 ساعات
قازگيدرومەت ءبىرقاتار و 2 ساعات
اقش-تا تۋريستىك اۆتوبۋس 2 ساعات
中国哈萨克语广播网 2 ساعات
شقو-دا «تۋعان جەر» باعد 2 ساعات
نۇر-سۇلتانداعى جارمەڭكە 3 ساعات
ەلوردادا ءار كۇنى ەكى م 3 ساعات
中国哈萨克语广播网 3 ساعات
ەلوردادا رەسپۋبليكالىق 3 ساعات
تەننيس: رىباكينا ۋحان ء 3 ساعات
وسى ارانى باسىپ كورىڭىز 3 ساعات
اش قارىنعا شەشىم قابىلد 3 ساعات
وسى ارانى باسىپ كورىڭىز 3 ساعات
يوردانيا قازاقستاننىڭ ت 3 ساعات
ديدار امانتاي. كوركەم و 3 ساعات
中国哈萨克语广播网 3 ساعات
قىتايلىق تاراپپەن قازاق 3 ساعات