پەتروپاۆل. قازاقپارات – سولتۇستىك قازاقستان وبلىسىندا 21 مىڭنان استام ادام سالىقتىق راقىمشىلىققا ىلىگىپ، ولاردىڭ قارىزىنىڭ ءبىر بولىگى كەشىرىلەدى، دەپ حابارلايدى قازاقپارات ءتىلشىسى.

مەملەكەت باسشىسىنىڭ سالىقتىق راقىمشىلىق تۋرالى جارلىعىنا سايكەس، ەل تۇرعىندارىنىڭ 2019 جىلدىڭ 1-قاڭتارىنا دەيىنگى سالىقتارى بويىنشا ءوسىماقىلارى ەسەپتەن شىعارىلادى. 13-تامىزدان باستاپ ءوسىماقى سوماسىن ەسەپتەن شىعارۋ ەرەجەلەرى قولدانىسقا ەنگىزىلدى.

سقو بويىنشا مەملەكەتتىك كىرىستەر دەپارتامەنتىنىڭ مالىمەتىنشە، اكتسيا جىل سوڭىنا دەيىن جۇزەگە اسادى. سالىق بويىنشا قارىزى بار كەز-كەلگەن قازاقستاندىقتىڭ ءوسىمپۇلى ەسەپتەن شىعارىلادى.

قازىرگى ۋاقىتتا 21 مىڭنان استام سولتۇستىكقازاقستاندىقتىڭ 2019 جىلدىڭ 1 قاڭتارىنا دەيىنگى كەزەڭ ءۇشىن سالىق بويىنشا بەرەشەگى بار. جالپى بەرەشەك - 449،2 ملن تەڭگە. ونىڭ 340،9 ملن تەڭگەسى نەگىزگى قارىز بولسا، ءوسىم - 108،3 ملن تەڭگەنى قۇرايدى. ەسەپتەن شىعارۋعا جاتاتىن ءوسىمپۇلدىڭ سوماسى دا وسى 108،3 ملن تەڭگە.

بيۋدجەتكە بەرەشەك جەكە تۇلعالاردىڭ باسىم بولىگى، ياعني 92،8% كولىك سالىعىن ۋاقتىلى تولەمەگەن اۆتوكولىك يەلەرى. ولاردىڭ جالپى قارىزى - 416،8 ملن تەڭگە.

الايدا اكتسياعا قاتىسىپ، ءوسىمپۇلدى ەسەپتەن شىعارۋ ءۇشىن الدىمەن نەگىزگى بورىشتى وتەۋ قاجەت. نەگىزگى جانە جالعىز تالاپ – وسى.

قازىرگى ۋاقىتتا مەملەكەتتىك كىرىستەر ورگاندارى كۇن سايىن جەكە تۇلعالاردىڭ جەكە شوتتارىنا مونيتورينگ جۇرگىزۋدە. ولار نەگىزگى قارىزدى تولەگەن جاعدايدا 3 جۇمىس كۇنى ىشىندە ءوسىمپۇلدى ەسەپتەن شىعارۋ تۋرالى ءتيىستى شەشىم شىعارىلادى. سالىق تولەۋشىلەرگە ول ءۇشىن ءبىر جەرگە بارۋ قاجەتى جوق.

ەستەرىڭىزگە سالا كەتەيىك، وسى جىلدىڭ 1 قاڭتارىندا سالىق بويىنشا بورىش 1،4 ملن-عا جۋىق قازاقستاندىقتا بولعان. بەرەشەكتىڭ جالپى سوماسى 20،9 ملرد تەڭگە. ونىڭ 6،6 ملرد تەڭگەسى – ءوسىماقى.

قارىز تۋرالى قر قم مكك www.kgd.gov.kz سايتىندا «سالىق بەرەشەگىنىڭ جوق/بار ەكەندىگى تۋرالى مالىمەتتەر» بولىمىنەن بىلۋگە بولادى.