ەل-ارنا قولفون نۇسقاسىنا ەنۋ Еларна қолфон нұсқасына ену


ەل-ارنا قولفون نۇسقاسى | "قولفون نۇسقاسىن ءتۇسىرۋ (Android)

Кірілше
جۇكتەۋ-البومىم-البومدار-جەلى
وسى توردى ساقتايمىن! | وسى توردى باس بەت ەتەمىن!

ءبىزدىڭ بايلانىس: elarna2012@gmail.com

Үш күнгы келушылер санағыКелген адам саны (IP)Көрілген бет саны (PWs)КомпйутерҚолфон
2019-08-21580410755 %45 %
2019-08-22656264749 %51 %
2019-08-23457310656 %44 %


تىركەلىڭىزدەر كىتاپحانا قوجالار تورابى البومدار قازاقتىڭ 1001 ەرتەگىسى

ءتۇرى: جۇلدىز جۋرنالى

جولدانعان ۋاقىتى: 10:30 - 2019/08/14



(اڭگىمە)

ۇزىن ارقان، كەڭ تۇساۋمەن ءۇش جىل ءجۇرىپ، اۋدان پمك-سى جوسالىنىڭ مادەنيەت ءۇيىن ءولىپ-تالىپ زورعا ءبىتىردى. وسى قىزىل كوزدەن قۇتىلدىق پا، قۇتىلمادىق پا دەگەندەي اناۋ-مىناۋ اقاۋ-ساقاۋدى بۇتىندەر-بۇتىندەمەستەن اككى قۇرىلىسشىلار باسقا وبەكتىگە ۇدەرە كوشتى. قابىلداۋ اكتىسىنە الدىن الا قول قويىپ جىبەرگەن كولحوز ءدات دەدى دە قالدى. ءبىراق ەل سوعان دا رازى. ولارعا نە كەرەك – سىرت ءپىشىنى كەلىسسە بولعانى، قاۋقيىپ تۇرسا جەتتى دە. قوي مىنەزدى ەل ەمەس پە، ايتەۋىر، بارعا توق. كولحوز باسقارماسى دا كەڭپەيىل. دۇنيە-مۇلىك، كەرەك-جاراقتان، مۋزىكا اسپابىنان، رەكۆيزيتتەن قارجى اياپ جاتقان ول جوق. تاپقانىڭدى ساتىپ الا بەر. ءتىپتى ەسكى كينواپپاراتتاردى مەنسىنبەي جاڭاسىن تالاپ ەتىپ ەدى، ول دا ورىندالدى. ونى-مۇنى ەمەس، كەڭ ەكراندى فيلم كورسەتۋگە قاۋقارى بار سۋ جاڭا ءتورت قوندىرعىنى اۋدان كينوفيكاتسياسىنىڭ ديرەكتورى ءوز ماشيناسىمەن الىپ كەلىپ تاستادى. جوعارى وقۋ ورنىنا كەتكەن ۇرپەك باستىڭ ورنىنا جاڭا كينومەحانيك قابىلداندى. قىسقاسى، ءبارى جاڭالانىپ شىعا كەلدى. تۇسىنگەن ادامعا وسى سياپاتتىڭ ءوزى نەگە تاتيدى؟! ءوزىڭىز ويلاڭىزشى، تەلەۆيزوردىڭ شاپ-شاعىن ەكرانىنان اتام زامانعى ءفيلمدى تالشىق ەتكەن قانداي، يا كۇن سايىن جۇمساق ورىندىقتا شالقايا وتىرىپ ءتۇرلى-تۇستى جاڭا كارتينا كورگەن قانداي. ونىڭ ۇستىنە حالىقارالىق فەستيۆالداردا بايگە العان كارتينا بولسا. ونى تەلەۆيزوردان جۋىقپاندا كورە المايسىڭ. كەيبىر كينونى قايتالاپ كورگىڭ كەلەدى، ونىڭا دا قۇلدىق. كوپ بولىپ جاز ءوتىنىشىڭدى، اۋداندىق كينوپروكات ەكى-ۇش جەتىنىڭ ىشىندە ورىنداپ تىنادى.

راس، جيىنبەك ايتپاقشى، ارمسترونگ ايعا قونعانداي ءدۇمپۋلى وقيعا بولماسا دا، تۇيمەدەيدى وقتا-تەكتە تۇيەدەي قىلۋعا نە بولماسىن، ابدەن بولادى. مىنە-مىنە، ءجون ءسوز. عالاماتيزم ءبارىمىزدى ابدەن تويدىرىپ ءبىتتى، جۇرت بايقۇستىڭ ەتى ءولىپ كەتتى. داق ءقازىر ۇشپالى تاباق كەڭسە الدىنا قونىپتى دەسەڭ دە ەشكىم تۇرا جۇگىرمەيدى. بارعىسى كەلسە، ءشاي-سۋىن ءىشىپ، اسىقپاي-اپتىقپاي، سابىر ساقتاي بارادى. وندا دا كەجەگەسى كەيىن تارتپاسا. ال، قۇمىرسقانىڭ ءجۇرىپ كەتكەنىندەي ۇساق-تۇيەككە قۇلاقتارىن ەلەڭدەتىپ، قۇمارتىپ وتىرعاندارى. پيگمەيلەر ۇلىعا، الىپتار الاساعا باس يەدى. سول نەلىكتەن ەكەن، ءا؟ بارىنە جەر شالعايلىعى، جىلى قولتىقتان الىستىق كىنالى شىعار. ءوزىڭنىڭ وتتى ورتادان اۋلاقتىعىڭ جانە بار. الىستاعى اسىلدان ىرگەدەگى مىس ارتىق. وعان قوسا الاقان ۇرار ءدوي شارۋا ەسالىدان تىم جىراقتا تىنىپ جاتادى. وعان سەنىڭ – بارىڭنان دا جوعىڭ. ال، مىنالار ما، مىنالار – بۇيىرىڭدە، ءوز قاسىڭنان ۇزامايدى. ءوز تۋىسىڭداي، ءىش تارتىپ، باۋىرىمداپ تۇرعانىڭ. سوندىقتان ءبىزدىڭ جاماعات «جوسالىنىڭ جامان ءيتى جەڭىلىپ جاتسا دا قان قىسىمىڭ كوتەرىلەدى» جەگەن جيىنبەكتىڭ دۋالى ءسوزىن ءمارمار تاقتاعا قاشاپ قويۋعا دا بەيىل.

وسى كۇنى جوسالىدا نە جوق دەيسىڭ. كىرسە شىققىسىز كىتاپحاناسى، تاياۋدا تەحنيكۋم تاۋىسىپ كەلگەن سونىڭ مەڭگەرۋشىسى – ۇلپەرشەكتەي قىز قانداي! اق حالاتتاي ەمحانا مەن ءۇرىپ اۋىزعا سالعانداي دارىگەر پەرىشتە شە؟ ءبارىن ايت تا ءبىرىن ايت، اسىرەسە اۋىل ورتاسىنا زاكىر تاستاعان اق كەمەدەي سۋ جاڭا مادەنيەت ءۇيىن ايت...

كەشەلى-بۇگىن ءبىر توپ جىگىتتى سونىڭ قاسىنا بايلاپ قويعان با دەرسىڭ. شىمىلدىق قۇرىسىپ، اپپاراتتاردى ورناتىسىپ، كەرەگەدەن پروەكتسيالىق تەسىك ويىپ – جاندارى قالماي جۇرگەنى. اسكەر كينومەحانيك قارا جۇمىسقا ارالاسپاي، نۇسقاۋلارىن شەتتە تۇرىپ بەرەدى. قول استىنداعىلار ونىڭ ءار ءسوزىن بۇلجىتپاي ورىنداپ، لىپىڭ قاعادى. اسىرماي ايتساق، اسكەر تاپ ءقازىر كونە پاريجدەگى اعايىندى ليۋمەرلەردىڭ كۇيىن كەشىپ تۇر. چارلي چاپلينشە زىر قاققان جىگىتتەر انانى اپەر، مىنانى تارتپەن اپ-ساتتە اپپارات بولمەسىن اكتەپ، ەلەكتروپريبورلاردى ورىن-ورنىنا قويىپ شىقتى. وزدەرىنىڭ ىسىنە وزدەرى سۇيسىنە قارادى. سەرپانتيندەي شۇباتىلعان ون تاباق پلەنكانى مىنا مىلقاۋ قوندىرعىلار زىر اينالدىراتىنىن جاقسى بىلسە دە ازىرگە سەنىمى بوساڭ. جازاتايىم جۇرمەي قالار، بىردەڭەسىن بىردەڭە كلەمماعا دۇرىس جالعاماعان شىعارمىز دەپ ىشتەي كۇماندانادى. كەيبىرەۋلەر وسى كۇدىكتى سەيىلتۋ ءۇشىن ينە-جىپتەن جاڭا شىققان اپپاراتتاردى بۇراپ كوردى. ءبىراق ءبارى ورنىندا، ءبارى سىزبا بويىنشا جاسالعان. سىزبادان قاتە ىزدەپ نە كورىنىپتى بۇلارعا.

جىگىت-جەلەڭ كويلەك-كونشەگىن شەرتىپ-قاعىپ تۇرعان اسكەرگە جالتاقتاي قارادى. بىر-بىرىنە سايما-ساي سياقتى. كينوقوندىرعى اسكەر ءۇشىن، اسكەر كينو قويۋ ءۇشىن جارالعان دەرسىڭ. ءبارى وسى ويدى ىشتەي قۇپ الدى. ءبارى تەمەكىلەرىن سىرتقا شىعىپ تارتتى. الگىندە عانا ساندەلگەن اپپاراتحانانى ىستاپ ءقايتسىن. مادەنيەتتەن ءبىزدىڭ دە حابارىمىز بار دەگەندەي «دۇرىس قوي، ءيا-يالاپ» شىقتى. انا-مىنانى ءسوز قىلدى، اۋا رايىنىڭ جايسىز ەكەنىنە دە ءبىرى قالماي قاپالانىپ الدى. وسىنداي قىسىر اڭگىمەنىڭ ارتى جۇرتتىڭ كوكەيىندەگىسىمەن بىتەتىندىگىن سەزگەن جىگىتتەردىڭ ءبىرى:

- اتاپ وتپەيمىز بە؟ بۇل دا ءبىر شاڭىراقتىڭ ءتۇتىن تۇتەتۋى، بىلە-بىلسەڭدەر! – دەپ تار جاعاسىنان سۇڭگۋىر قايىق پەريسكوپىنداي شىعىپ تۇرعان موينىن شايقاقتاتتى.

- قوي، ءارى، ەسىڭ دۇرىس پا؟ بۇل مادەنيەت وشاعى، اشىلىپ جاتقان رەستوران ەمەس قوي، ءتۇسىنۋ كەرەك! – ونىڭ ۇسىنىسىن كوپشىلىك جاراتپاي تاستادى. ۇسىنىس ايتۋ مەنىڭ پارىزىم، قابىلداۋ-قابىلداماۋ سەندەردىڭ مىندەتىڭ دەپ، الگى جىگىت ۋنيۆەرماگ قۇرىلىسىن جۇرگىزىۋشىلەرگە قاراي تارتتى. قالعاندارى ءتۇرلى-تۇستى سلايدتاردى، جارناما پلاكاتتارىن، سان-سانىمەن تۇسىرىلگەن سۋرەتتەردى قولدان قولعا كوشىردى. ءومىر بويى الپەشتەپ وتەرلىك كينواكتريسالاردىڭ بەينەلەرىنە تاڭداي قاقتى. مىنا، قاستارىندا تۇرعان اسكەر سول قىز-كەلىنشەكتەرمەن توننىڭ ىشكى باۋىنداي بولعانداي قىزعانا دا سۇيسىنە قارادى. كوزدى الا بەرە ءاشىمحان قۋىڭ بىرەر سۋرەتتى جىمقىرىپ كەتپەكشى ەدى، اسكەرىڭ قىراعى ەكەن، تۇستەپ ساناپ تەمىر قوبديشاعا سالىپ قويدى. ۇرپەك باس كينومەحانيكتە بۇنىڭ ءبىرى جوق بولاتىن، ءۇزىپ-جىرىپ كينوسىن قويۋدان، سونان سوڭ ماگازين جاعالاۋدان اسا المايتىن.

بىرازدان كەيىن بىتكەن ءىستىڭ قاسىنا ساۋلەتقان بريگادير كەلدى. ءوز ءقادىرىن ءدال بىلەتىن ادام ەمەس پە، الشاڭ-الشاڭ باسىپ ارلى-بەرلى ءجۇردى. پلاستماسسا ساپتى بۇراۋىشپەن ەلەكتر پريبورلارىن، پلەنكاوراعىش ۇرشىقتى ءتۇرتىپ كوردى. كەشكى سەانسقا كەلسەم بە ەكەن، كەلمەسەم بە ەكەن دەپ جىگىتتەرگە قارادى.

- قىزىل لەنتا مەن قايشى، وركەستر كەرەك ەمەس پە؟ – دەدى اسكەر تۇرىپ.

- نيەتىڭ تۇزىك بولسا، بەيىلىڭە قۇلدىق. ءبىراق دارىلداق سالتاناتقا ەجەلدەن جانىم قاس.

ادەت ادەت ەمەس، ادەپ – ادەت. – ساۋلەتحان بوبيگىنە قارعىپ ءمىندى، كابينا ەسىگىن جاپپاي تۇرىپ: - انە كۇنى سايلاۋدا جيىنبەكتەن باسقالارىڭ مەنىڭ كانديداتۋراما قارسى بوپ ەڭدەر. ءالى ءبارىن جاڭارتام. تاياۋ كۇندەرى شاشتاراز بەن ەتىكشى، ىسمەر تىگىنشى اكەلەمىز. الەۋمەتتىك جاڭعىرۋدى تۇرمىس قاجەتىن وتەۋدەن باستايمىز. ديرەكتيۆالىق قۇجاتتاردا حالىقتىڭ ءال-اۋقاتىن ارتتىرۋ شارالارى ناقتىلى كورسەتىلگەن، سولاي، جىگىتتەر! – دەدى.

- سىزگە ورىندى الدىڭعى قاتاردان سايلايىق پا؟ – اسكەر جانە سۇيكەنىپ كورىپ ەدى، كوشەلى باسشى ونداي ۇساق-تۇيەكتى ءقايتسىن، ساۋلەتحان بۇرىلىپ تا قارامادى.

- قاپ، انەۋ كۇنى وسىعان يتتىك جاساپپىز. ءوزى ءبىر التىن اسىقتاي جىگىت. جيىنبەكتەردىڭ كوزى كورگىش-اق. اتتەڭ، جيىنبەكتەرگە تىزگىن تيسە، اسىعىمىز الشىسىنان اينىماس ەدى. ساۋلەتحان دا ادامىم-اق! ايتپاقشى، وسى سەن ەمەس پە ەڭ، بۇل دوڭىزدىڭ توڭىنا قانجار بويلامايدى دەگەن.

- ال، ايتتىم! ءوز ءرولىن قاتىرىپ ورىندايتىن تيپ دەگەن سەن بە، مەن بە، ا؟ قۇلاتايىق دەپ قۇلشىنىپ شىققان كىم ەكەن؟

- سولاي-اق بولسىن، دوستىم، دوعارايىق قىسىر اڭگىمەنى. – جاناحمەت ىمىراعا كوشتى.

- كوزقاراسىمىزدىڭ ءارقالاي بولۋىنا بايلانىستى ايتىستى ءارى قاراي جالعاستىرۋدىڭ ەش رەتى جوق. – ءاشىمحان دا بەيبىت راي تانىتتى.

- ويباي، ءارى قاراي، ءارى قاراي! توقتاماڭدار! تابيعي، تاستاي! كەشەگى رەپەتيتسيادا سويلەتە الماي قور بوپ ەم. تاپ ءقازىر ۇستىنەن تۇستىڭدەر! وبرازعا كىردىڭدەر!

ەكى جىگىت مارسەل پانولدىڭ «توپازىنداعى» رەپليكالاردى دالمە-دال قايتالاپ تۇرعانىن ەندى اڭعاردى، اپىرماۋ، مىنا ءوزىمىزدىڭ تىرشىلىك تە اينا-قاتەسىز دراما ەكەن-اۋ دەپ جاعالارىن ۇستادى. رەجيسسەر جىگىت ريزا بولعانىن جاسىرا الماي كوكقۇتانشا قالباڭداي بەردى.

- كەشە تۇك شىقپايدى دەگەن كىم؟ ايدالاداعى فرانتسۋزدى قايتەمىز دەپ شۋلاعان كىم؟

ويناي المايمىز دەپ قيعىلىق سالعان كىم؟ ءالى-اق باعالارىڭ شانەلدەي اسپانعا اتىلىپ شىعادى. فرانتسۋزدار سىن-سيپاتىن ءبىلۋ ءۇشىن فرانتسۋز ءومىرىن كورۋ كەرەك، زەرتتەۋ كەرەك. سول ءۇشىن مەن فرانتسۋز فيلمىنە تاپسىرىس بەرگەم. «فاڭفاڭ-قىزعالداق». ەسكى فيلم بوسا قايتەدى، تاپ وسى كارتينادان فرانتسۋز ءيىسى شىعادى، فرانتسيا رۋحى انىق سەزىلەدى. ءبىرىڭ قالماي كەڭدەر. بۇگىنگى كۇندى وتكەننەن ىزدەيىك. سودان باستايىق. نەسىن ايتا بەرەم، مەنىڭ فلوبەرىم ايتقانداي، ءارقاشان ونەرگە باس يەيىك، ول حالىقتان دا، ءتاج كيگەن پاتشادان دا جوعارى. مەن دۇنيەنى وزگەرتەر كۇش ونەر دەپ بىلەم. ال، ونەرلى ادام – رومانتيك! قوعامنىڭ قوزعاۋشى تەتىگى، ءتىپتى رەۆوليۋتسيونەر!

اسكەر گۋاش اكەلىپ، ۇستەلدىڭ بەتىندەي كەنەپكە بۇگىنگى كينونىڭ ءاتى-جونىن جازۋعا كىرىستى. ونىسى ليكبەز شاكىرتتەرىنىڭ شيمايىنداي ءبىرى ويعا، ءبىرى قىرعا كەتتى.

- وسى قانشا تىرىسسام دا ادەمى جازۋدى ۇيرەنە الماي-اق قويدىم. كالليگرافيام ناشار! – دەپ قولىنداعى قىلقالامدى بوياۋلى شەلەككە اتىپ ۇردى. – ءوندىرىس مادەنيەتى دەگەن بولۋ كەرەك. كەيبىر بىلگىشتەر ادامنىڭ مىنەز-قۇلقىن جازۋىنا قاراي اجىراتادى ەكەن. سۇلۋ جازۋ دا – ونەر.

- وندا قايتا جازايىق. وسى اۋىلدىڭ مەيرام ۇراندارىن مەن جازىپ ءجۇرمىن، - دەپ ءاشىمحان مۇرتىن جىبىرلاتتى. بىلەگىن سىبانىپ جىبەرىپ ماشىقتى قارىپتەردى قوڭىر كەنەپكە تىزە باستادى.

- ءاي، توقتا-توقتا. بۇل ساعان جاساسىن جازۋ ەمەس. مۇنىڭ ءستيلى باسقا. سەن ءمۇسىندى قىزداردى تالاي كورگەن شىعارسىڭ؟ كورسەڭ، تاپ سولاردىڭ جۇرىسىندەي ەتىپ جاز. ال، مىنا كەردەڭباي قارىپتەرىڭنىڭ كوزىن قۇرت! – دەپ اسكەر بەس ساۋساعىمەن جاڭا جازۋدىڭ نوبايىن سىزدى. جاناحمەت تە «پەگاس» سيگارەتىمەن وزىنشە بىردەڭەنى بولەكتەگەنسىدى. ءاشىمحان ونى دا كوپ-كورىم مەڭگەرگەن بوپ شىقتى. سامارقان ورنەكتەرىندەي ۇزىلگەن ارىپتەرگە بارلىعى جابىلا قارادى. ءاشىمحان قولىنان شىققان كەنەپكە رەنۋار پولوتنوسىنداي سۇقتانا قارادى.

- سوڭىنان بي بولادى دەپ جاز. قايسىڭدا «باككارا»، «اببا»، «ۋاقىت ماشيناسى»، «شىڭعىس حان»، نەمەسە جاپون، فرانتسۋز ەستراداسى بار. كارەل گوتتىڭ دا جاراپ جاتىر. ازىرگە بۇل شىركىندى باستاۋ قيىن. سونان سوڭ مەن ديسكوتەكا ۇيىمداستىرامىن. ۆەنانى سىزىلتامىز، لاتىن امەريكاسىن ازىناتامىز، روكتىڭ اۋىرىن دا، جەڭىلىن دە بوزداتامىز. ءقازىر پوشتاعا بارىپ، اۋدانعا حابارلايىن. بارلىعى ساقاداي ساي دەپ باستىقتارعا باياندايىن، - دەپ اسكەر قيا تارتىپ كەتتى. قىزىل فەسكاسىن تۇزەپ كيگەن ءاشىمحان قالعاندارىنا قاراپ:

- مىنا مۇعالىمدەرگە بىردەڭە كورىنەيىن دەگەن شىعار. وقۋشىلاردى كەشكى سەانسقا جىبەرمەيتىن بوپتى. جات جۇرتتىڭ ءفيلمى جاس جەتكىنشەككە دۇرىس تاربيە بەرمەيتىن كورىنەدى. تەك كومسومول مۇشەلەرىنىڭ ىشىندەگى ۇستامدىلارىن جىبەرەمىز دەپ پەدكەڭەس شەشىم قابىلداپتى، - دەدى.

- ە-ە، ونى قايدان ءبىلدىڭ؟ جىبەرمەسە جىبەرمەسىن. وعان كىمنىڭ قاي جەرى قيسايادى! – دەپ جاناحمەت شىرت تۇكىردى.

- ءاي، وسى ەكى اتتام جەردى كورمەيسىزدەر. «بولاشاق – جاستاردىكى» دەپ كۇندە قاقسايمىز. وسى اۋىلدىڭ تەڭ جارتىسى وقۋشى. ولار كەلمەسە، جوسپار قالاي ورىندالادى؟ بۇل، البەتتە، اياقتان شالۋ. سابوتاج. زارلاپ ءجۇرىپ مادەنيەت ءۇيىن سالعىزدىق، ەندى ونى تولتىرا الماساق، جوعارى جاقتىڭ بەتىنە قالاي قارايمىز؟ مەن گازەتكە فەلەتون جازامىن. ءوزىڭ وبلىستىق كەڭەستىڭ دەپۋتاتىسىڭ، سەن دە قولىڭدى قوي. ءوتىمدى بولسىن، سالماقتىراق شىقسىن. قولىڭدى تاپ ءقازىر قوي، ايتپەسە سەن اۋىلدا بۇگىن بارسىڭ – ەرتەڭ جوقسىڭ. – ءاشىمحان قالتاسىنان ءتورت بۇكتەلگەن تازا قاعاز الىپ جاناحمەتكە ادەيى ۇسىندى.

- قوي ارى، بۇل ءباتۋاڭدا مەن جوقپىن. كەشە عانا وزىمە «ا» مەن «ب» ۇيرەتكەن، كوزىمدى اشقان ۇستازدارىمدى كايتىپ جەرەگە قاراتامىن. – جاناحمەت ات-تونىن الا قاشتى. ءاشىمحان يىعىن قوزعادى دا قويدى. جاناحمەتتى قولتىقتاي ايالداماعا قاراي تارتتى. وسى ءقازىر اۋداننان اۆتوبۋس كەلمەك. ءاشىمحان قالتاسىنان بارباريس كامپيتىن شىعارىپ جاناحمەتكە ۇسىنىپ ەدى، ول تاتتىگە جوقپىن دەپ باسىن شايقادى. ءاشىمحاننىڭ وسىمەن ەكىنشى قابات مەسەلى قايتتى، ءبىراق ونى ەلەپ-ەسكەرگەن ول ما. جاناحمەت «پەگاسىن» تۇتاتىپ جان-جاعىنا ۇرلەنە، سەرگەك كوز تاستادى. وسى كەز توبەدەن «پاز» اۆتوبۋسىنىڭ توبەسى قىلت ەتە قالدى، بۋداق-بۋداق شاڭ سۇيرەتىپ مەكتەپ قاشاسىنا سۇيكەنە توقتاي قالدى. كەمپىر-سامپىر، شال-شاۋقان «اھلاپ-ۇھلەپ» ءتۇسىپ بەردى. ەلدىڭ سوڭىن الا جيىنبەك قارا جەرگە تابانىن تيگىزدى بىلعارى ديپلوماتىن قوس ساۋساعىمەن ۇستاي. ءاشىمحان ورنىنان تۇرا بەرە جاناحمەتتىڭ اياعىن باستى.

- كوڭىلىڭىز ءوسىپ قايتقان سياقتى استانادان، جيەكە، ودان ارتىق مەن نە دەيىن... وسى انەۋكۇنگىنىڭ ءدامىن تاتار مەزگىل جەتكەن سەكىلدى. اقىرىپ تۇرعان شىعار جايلاۋدىڭ قىمىزى قۇساپ. ءدال كىندىگىنەن ەكى شپريتس ارميان كونياگىن جىبەردىم، - دەدى ءاشىمحان جيىنبەكتىڭ ءزىلاۋىر ديپلوماتىن قولىنا الىپ جاتىپ.

ۇشەۋى گاراج قاسىنداعى باۋ-باقشالى، تسينك شاتىرلى ەڭسەلى ۇيگە بەتتەدى. ءاشىمحان ۇراسىنا ءتۇسىپ كەتتى دە كىشى-گىرىم كەسپەكتەي قاربىزدى ارەڭ كوتەرىپ شىقتى. جالتىلداعان اق پىشاقپەن الا قاربىزدىڭ دوڭگەلەك قالپاعىن ۇشىرىپ ءتۇسىردى. تاناۋدى جارار سۇيىقتىقتى اق مەسكەيگە كوتەرە قوتاردى. تۇپ-تۋرا ءبىر ءىنى بولدى.

- جيەكە، ءبىز – ءبارىمىز ەلىم-جۇرتىم دەپ جۇرگەن ازاماتپىز. جىگىرماسىنشى عاسىر پەرزەنتىمىز. وسى قالبالاقتاپ قايدا كەتىپ بارا جاتىرمىز؟ مىنا ورىستار قىمس ەتسە گوگولدەرىن العا تارتا قويادى. ونىڭ ءۇش ارعىماعى دا، زامانى دا باسقا ەمەس پە؟ ولاردىڭ الاياق چيچيكوۆى مىنگەن ترويكاسى بىزگە ءدارى مە؟ – ءدامدى كريۋشوندى سۇيسىنە جۇتا وتىرا ءاشىمحان كوپتەن كوكەيىندە جۇرگە اڭگىمەسىن قوزعادى. – مىنا مەنىڭ الىسقا سەرمەپ، جاقىندى قارمايتىنىمنىڭ سەبەبى نە؟ سونى تاراتىپ بەرىڭىزشى. قيسايعان بۇتا كورسەم، تۇزەپ جىبەرۋگە تىرىسام. ايتقانىم – ءبىرىنشى سورت شىندىق. قىستا مال قىرىلدى، ونى جاسىرماي جازدىم. ءبىر ادام قىڭ دەگەن جوق، قايتا ءوزىم جاماناتتى بولدىم. ەگىستىكتەن ءتۇسىم از دەدىم، شابىندىقتىڭ بەرەرى شامالى، سۋارمالى جەر جوق ەكەنىن كوزگە شۇقىپ كورسەتتىم. ءۇن جوق! ءبىر جامان جەرىم – ءلاپپايلاپ، قول قۋسىرىپ جۇرە المايمىن. مىنا جاناحمەت ءىنىڭىز، وبلدەپۋتات جولداس تۇيەقۇس سىقىلدى باسىن قۇمعا تىعىپ، تۇك كورمەگەندەي بولادى. بۇل – بۇگىنگى كۇندى عانا ەمەس، كەلەشەكتى دە الداۋ. مەن مانا كينونىڭ جوسپارى تۋرالى ايتتىم با، ايتتىم. ونى قويشى، مىنا جيەكەڭدەر كەلگەن اۆتوبۋس ماسەلەسىن الايىق. وسى جۇرت اقشاسىن تولەيدى، بيلەت المايدى. وزدەرىنشە شوپىرعا جاساعان مىرزالىقتارى. اۆتوستانسا قوجايىندارى جولاۋشى قاتىناسىن، جوسپار ورىندالۋىن بيلەتكە قاراپ ەسپەتەيدى، كەي-كەيدە اۆتوبۋس جەتپەي جاتقاندا، ە-ە ەسالىعا ەشكىم بارمايدى، سوندىقتان باسقا جاققا جىبەرەيىك دەپ وتىرعانى. ءوستىپ ۇلكەننەن دە، كىشىدەن دە ۇتىلىپ جاتقانىمىز. مىنە، اعا، ناۋمەزدىكتىڭ، سەن تيمەسەڭ، مەن تيمەنىڭ قايدا اپارىپ سوعاتىنىن قاراڭىز. ءبىزدىڭ ەلگە قونعان قاسيەتتىڭ سۇرقى وسى ما؟..

- ايتقانىڭنىڭ ءبارى كوكەيگە قونادى. باسىمىزدان باقايشىعىمىزعا شەيىن مالتىعىپ جاتىرمىز. نەلىكتەن؟ بىرىنشىدەن، انا جاق تا، مىنا جاق تا ەكونوميكا زاڭدىلىعىنان مۇلدە ماقۇرىم. موكەڭنىڭ تەك يدەولوگياسىن عانا ءپىر تۇتادى. اۆتونوميا بەرۋ كەرەك ءار شارۋاشىلىققا. ەكىنشىدەن، سەن تۇر، مەن اتايىنداردان قورقامىز. حالىق كىمنىڭ سوڭىنان ەرەدى؟ ۇراننىڭ با، ۇلاننىڭ با؟ بوس ءسوزدىڭ بە، ءجون ءسوزدىڭ بە؟ ءبىزدىڭ اۋىل ۇلكەن دۇنيەنىڭ شاپ-شاعىن مودەلى عانا. سەنىڭ شىرىلداعانىڭنان نە پايدا، كوپشىلىك جەر شۇقىسا. سىن ايتۋعا ءبارىمىز جۇيرىكپىز. مىنا مەن جاساعان شارۋاشىلىق ەسەپكە قاراپ ال ەڭ الدىمەن. سونان سوڭ جازار بوساڭ، كەڭەيتىپ جاز. بىتىرگەننەن كەيىن ماعان كورسەتىپ ال. مادەنيەت ءۇيىنىڭ جۇمىسى اقساپ، كينوقوندىرعى جوسپارىن ورىنداماي، اۆتوبۋس ءجوندى قاتىناماي جاتقان جەر از با؟ ارينە، بۇعان دا ۇساق-تۇيەك دەپ قاراي الماسپىز. سوندا دا بوسا، ول كىمگە تاڭ، تيتانىڭ تىلاعىنداي نارسەگە بولا ويبايعا اتتان قوسىپ نە ابۇيىر تابامىز. ەكونوميكالىق جۇيە مەن رۋحاني جۇيە مايلانعان موتورداي بولعانى ءجون. قول ۇستاسا، جۇمىلا جۇمىس ىستەۋى كەرەك. سوندا وز-وزىنەن اۋىل ارحيتەكتۋراسىنا دا كوڭىل بولىنەدى، جەر قۇنارلىعى دا ارتادى، مال تۇقىمى دا اسىلدانادى، ماشينا-تراكتور پاركى دە جاڭالانادى. سەندەر ايتىپ جۇرگەن، مۋزىكا، سپورت مەكتەبى دە اۋىلدى جەردە تاڭسىق بولۋدان قالادى. قالىڭ كوپشىلىكتىڭ ساياسي-الەۋمەتتىك بەلسەندىلىگى ارتادى. ەلدى ەل باسقارادى، ەل اراسىنان سۋىرىلىپ شىققان ەر باسقارادى. بۇل – ۇلكەن ونەر. ول، بىلسىن-بىلمەسىن، قاسىڭا ءسوزىڭدى سويلەر اعايىن-تۋعانىڭدى توپىرلاتۋ ەمەس. جانە ءبىر فاكتور بار. ءبىز سىرتتىڭ سوزىنە اۋەسپىز. وزىمىزدىكىنىڭ وكپەسى قابىنعانداي. ولارعا نە كەرەك؟ ىشەدى-جەيدى، ودان كەيىن كوستروما مەن ۆولوگداسىنا تايىپ وتىرادى. ءوز ارامىزدا «ۆولگا» مىنەر ءبىر قازاق جوق پا؟ الدە اقىلدان كەندەمىز بە؟ مەن كىشى-گىرىم لەكتسيامدى وسىمەن اياقتايىن... قۇي ءتۇسىن، قۇي تۇسىنبە؟ ايتاقشى، وسى سەندەر كىمنىڭ دراماسىن قويعالى جاتىرسىڭدار. «توپاز» دەيسىڭدەر مە، توپاس دەيسىڭدەر مە، وندا مەنىڭ شاتاعىم شامالى. ءبىراق بۇگىنگى كۇن پروبلەماسىنان ىرگەنى اۋلاق سالعاندارىڭا مەن تۇسىنبەدىم. سولاي، شىراقتارىم. ءوزىمىزدىڭ توپىراققا ءسىڭىستى ءتول شىعارما قاجەت. جات جۇرت ءبىزدىڭ نە تەڭىمىز؟ ولار دا كىرمە. ازعانا شىققان بوزعا ورتاق قىپ قايتەمىز. ال، دەپۋتات جولداس، وتكىر دە يكەمدى بول. ارتىڭدا حالقىڭ تۇر. الدا، قۇداي بۇيىرتسا، تالاي اسۋ، تالاي وزگەرىس بار. ديالەكتيكا زاڭى ماسكەۋگە دە، الماتىعا دا باعىنبايدى...

- ايتقانىڭىز راس، انا شاڭىراقتىڭ مىسى باسادى دا تۇرادى. سەسسيادا سويلەيىن دەپ تالاي وقتالدىم. يمەنە بەرەم. كوڭىلدەگى كورىكتى ويدىڭ اۋىزدان شىققاندا قۇتى قاشادى، - دەپ جاناحمەت اعىنان جارىلدى. – الدە مەن سەكىلدى شورقاقتاردى سول جەرگە ادەيى وتىرعىزىپ قويا ما قوقىرايتىپ، جيەكە...

اق مەسكەيدىڭ ءتۇبى كورىنە بارىپ ۇشەۋى دە تىسقا شىقتى. جەيدەلەرىنىڭ جاعالارىن تۇزەپ، تەمەكىلەرىن بۇرقىراتىپ ءبىراز تۇردى. جيىنبەك كەشكىسىن تاۋداعى كومباينشىلارعا ءجۇرىپ كەتەتىنىن ايتتى. جاناحمەتتىڭ بۇگىن تۇنگى كەزەكشىلىگى بار ەكەن. جۇمىسى جوق، ازىرگە قولى بوس ءاشىمحان عانا. كينو باستالعانشا ول پوشتاعا ايالداۋدى قۇپ كوردى.

وسى اۋىل بايلانىسىنىڭ ءنانى قامبالاي ەكى-ۇش پەنسيونەرگە اقشا ۇلەستىرىپ، قارىق قىلىپ جاتىر ەكەن.

- وۋ، اقساقالدار، ۇساق جوق دەيمىن، مىنە، كوزدەرىڭ كورسىن. بۇيىرماسىن. سىزدەردەن اياعانىمدى يت جەسىن! – تەمىر سەيفتىڭ ەسىگىن سارت ەتكىزىپ اشىپ، سارت ەتكىزىپ قايتا جابادى. قيمىلىنا كوز ىلەسپەيدى. تەمىر قوبديدىڭ ىشىندە نە جاتقانىن اڭداپ ۇلگەرمەيسىڭ. قارتتار سەندىك-سەندىك، بەس-ون تيىندا تۇرعان نە بار دەپ، ساقالدارىن ساۋمالاپ، العاندارىن شىتتارىنا وراپ جاتىر.

باعاناعى اسكەرگە قولقابىس ەتكەندەردىڭ ءبىرلى-جارىمى وسىندا بوپ شىقتى. قامبالاي پەنسيونەرلەرمەن ءىسىن بىتىرگەن سوڭ سولارعا كوشتى. سەيف تۇبىندە جاتقان «زەنيت» فوتواپپاراتىن شىعارىپ الىپ الاي كورسەتتى، بۇلاي كورسەتتى. فوتوگرافيامەن اينالىسقانىنا، قۇداي بار بولسا، ون جىلدان اسىپ كەتىپتى. قارا باقىر پايدا كورمەپتى. قاپتاعان زيان. باستابىندا ەلدىڭ سۋرەتىن ءتۇسىرىپ، اقشانىڭ استىندا قالام با دەپتى. ونىسى بەكەرشىلىك ەكەن. وسى حارەكەتىمىزدىڭ ءبارى بەكەرشىلىك بوپ جۇرمەسىن دەپ پاپيروسىن بۋداقتاتتى.

- جىگىتتەر، قولدارىڭ بوس بوسا، تاك، ەرتەڭدەر مە ەكەن، بۇرسۇگىندەر مە ەكەن، سەپتەسىپ جىبەرسەڭدەر. ەڭبەكتەرىڭدى جەمەسپىن. مىنا يەك استىنداعى قوساعاشتان ەكى دايمان سابان-مابان الىپ قايتپاقشىمىن. تابان استىندا تاسىپ الماساڭ، ماياعا ءيىرتىپ قويام دەپ ساۋلەتقان قوقاڭداپ كەتتى. – دەپ ورىندىققا شالقايا ءتۇستى.

يىرىلىپ تۇرعانداردىڭ ەشقايسى دا مۇنىڭ سابانىن تاسۋعا جالانىپ تۇرعان جوق، ءبىراق ەرتەڭ كەرەك ادامنىڭ كوڭىلىن جىعىپ ءقايتسىن. تارىعا قالسا، اقشانى وسىدان قارىز الماعاندا، كىمنەن الادى. ءجىپسىز بايلاۋلى بارلىعى. ونى قامبالاي دا سەزەدى، تىزەگە سالمايدى. مايدالاپ، جىڭىشكەلەپ جەتكىزەدى. ۋاق-تۇيەككە دە ۇلكەن ساياسات، اسقان اكتەرلىك شەبەرلىك كەرەك ەكەنىن ونەر ينستيتۋتىندا سىرتتاي وقىپ جۇرگەن رەجيسسەر جىگىتتەن كەم بىلمەيدى. انە، سۇق ساۋساعى مەن ورتان قولىنىڭ اراسىنا قىستىرىلعان تەمەكىنى كۇلسالعىشقا شەرتىپ قويىپ، بەزەكتەگەن تەلەفون ترۋبكاسىن مانەرلەي الۋىنىڭ ءوزى قانداي. كورەر كوز كەرەك. قۇلاعىنا جەتەر-جەتپەس ۇستاپ:

- الە! ءيا، مەن، قامبالايمىن. ءيا، جوسالى بايلانىس ءبولىمىنىڭ باستىعى. تيىشتىق دەيىم. نە جاڭالىق دەيسىز بە؟ جاڭالىق پا، جاڭالىقتىڭ كوكەسى گازەت بەتىندە عوي، ھە-ھە... ءاۋ، بۇ كىم ءوزى؟ شۋلاماڭدار، تۇگە! ادامنىڭ ءاتى-جونىن ەستي الماي قالدىم. امانشىلىق. ءشوپ شابۋ اياقتالعان جوق. شات-شاتتىڭ، قاباق-قاباقتىڭ دىمىن قالدىرماي، تازدىڭ باسىنداي قىرىپ جاتىرمىز. وراق پا، وراق بىتۋگە ءسال قالدى. كومباين بىتكەن تاۋعا شىقتى، جازدىققا كىرىستىك. ءبارى ورنىندا. كولحوز باسشىلارىنىڭ ءبارى ورنىندا، كىم، كىم، جيىنبەك پە؟.. سلۋشاي، ونى مەن كۇزەتىپ وتىر دەيمىسىڭ؟ ءاي، تەرگەۋشىدەي تىقاقتايتىن كىمسىڭ-ەي ءوزىڭ، ءا-ا؟ – دەي ترۋبكانى سارت ەتكىزدى.

- ەسالاڭ با ءوزى، ءىشىپ العان با؟ ءاتى-جونىن سۇراساڭ قىر-قىر ەتەدى. سەندەر دە ءبىر جاعىنان ءبورىنىڭ كوتىندەي شۋلاپ. دىم ەستىمەدىم. الگى كوكەزۋ رەفوماتورسىماق جيىنبەكتى سۇرايدى، ونىڭ قاي قامىنا كەرەك بولا قالعانىن ءيتىم ءبىلسىن! كولحوز باسشىلارى ورنىندا ما دەپ جەپ بارا جاتىر. كەرەك بوسا، كەڭسەگە تليپون سوقپاي ما؟ ءاي، ءبىراق ناۋقان كەزىندە وندا كىم وتىرار دەيسىڭ. اگى اۋدان، وبلىس، استانا دەپ ەكى اياعى جەرگە تيمەي جۇرگەن جيىنبەك اگرونوم قاي قاق شەكەسىنە كەرەك بولا قالعانىن بىلمەيىم...

- ءيا-اۋ دەسەڭشى، - قالعاندارى دا ەرسىلىككە جورىدى. وسى تۇرعانىمىز دا جەتەر دەپ ءبارى تازا اۋا جۇتۋعا سىرتقا بەتتەدى. قامبالاي دا تەمىر ەسىگىن سالدىر-گۇلدىر جابا باستادى. كىلتىن وڭعا قاراي ءبىر بۇراعاندا، وقىس ويدان ءدىر ەتە ءتۇستى. جاڭا تەلەفونمەن سويلەسكەن ادام كەمى اۋداننان، ءارى كەتسە وبلىستان. ءسوز جوق، سول جاقتان. اۋدان باسشىلارىنىڭ ءبىرى بوپ جۇرمەسىن. باسقا پالە تىلدەن دەگەن وسى، اۋزىنا كەلگەنىن وتتاپ نەسى بار ەدى. انا جيىنبەك وسەتىن بولدى. باس اگرونوم باسقارمانىڭ ورىندىعىنا ءبىر-اق ىرعىماق. وبلىس، استانا دەپ سابىلۋى تەگىن ەمەس ەدى وراقتىڭ قىزىپ تۇرعان شاعىندا. انا شەگىركوز باستىقتىڭ ساۋداسى بىتكەن ەكەن. باعانا ويىنا كەلسەشى. قاپ!

- ءاي، جىگىتتەر، بۇرالقى ءسوز كۇلگەنگە جاقسى. بەكەر كۇلەمىز. جيەكەڭدەر دە ويناپ جۇرگەن جوق شىعار. ەل قامىن جەر ازامات بولسا، جيەكەڭدەردەي-اق بوسىن. جاتسا-تۇرسا ويلاعانى – شارۋاشىلىقتى ورگە سۇيرەۋ! – دەپ ماناعى اتتەگەنايىن لەزدە تۇزەپ الدى.

مادەنيەت ءۇيىنىڭ الدى قارا-عۇرىم. تاۋدان تۇسكەن كومباينشىلار، ەتەكتەن كوتەرىلىپ شوپشىلەر كەلىپتى. وسى اۋىل بويجەتكەندەرىنىڭ ءوزى ءبىر شوعىر. كۇلارا، التىنجامال، ءماپىش. جىگىت بەيشارالاردىڭ كوزى وسى جاقتا. ول كوزدەردى ەلەپ جاتقان بۇلار جوق.

- اسكەر بۇگىن كەرەمەت باتنيك كيىپ كەپتى، - دەدى كۇلارا مۇعالىم كۇلىمسىرەپ. – قۇيىپ قويعانداي. «ارشين مال الانداعى» اسكەردىڭ تاپ ءوزى ەمەس پە؟

- جاراساتىن ادامعا كەبەنەك كيگىزسەڭ دە قونا كەتپەي مە! – ءماپىش كىتاپحاناشى دا قوستاي كەتتى. – ءبىزدىڭ دورباۋىزدارعا اتلاس كيگىزسەڭ دە مىجىرايىپ تۇرادى. رادج كاپۋر دەسەڭشى.

- جازۋىنا قارامايسىڭدار ما. افيشانى ورنەكتەپ جىبەرىپتى. قاس سۋرەتشىنىڭ قولىنان شىققانى كورىنىپ تۇر. – دەدى كۇلارا ءمۇعالىم تاعى دا.

- باسقاسىن بىلاي قويىپ، اپپاراتحانانى قاراڭدارشى. جارقىراپ تۇرعان جوق پا؟ – التىنجامال دارىگەر دە ءوز ويىن ايتىپ قالدى.

- ءيا، دراما ۇيىرمەسىنە تارتپاسا بولماس. اۋزىنان ءسوزى ءتۇسىپ تۇرعان جاناحمەتكە، سۋجۇقپاس قامبالايعا، تىرناق استىنان كىر ىزدەگىش ءاشىمحانعا دا جالىنىشتى بوپ ءجۇرمىز-اۋ! – دەپ ءماپىش كىتاپحاناشى وكىنىشپەن بىزدەي ساۋساقتارىن مايىستىردى. باسقا قىزدار اۋزىن اشىپ ۇلگەرمەدى، زالعا شاقىرعان قوڭىراۋ ءبارىن سىپىرا جونەلدى. ەسىك اۋزىندا قىزارعان شامداردان باسقانىڭ ءبارى ءوشتى. تىنشي قالعان جۇرت پاۆلودار تراكتور زاۆودىنىڭ كوتەرىڭكى مىندەتتەمەسى تۋرالى كينوجۋرنالدان جىلانباۋىر كوك تراكتورلارىن تانىپ اجەپتاۋىر سەرپىلىپ قالدى. نەبىر قىزىق سودان كەيىن باستالدى دەيسىڭ. ورتاڭعى قاتاردىڭ بەل ورتاسىندا وتىرعان ساۋلەتقان بريگادير وزىنە تانىس شومەلەلەردى كورگەندە قوپاڭ ەتە ءتۇستى.

- وسى تەگىن شومەلە ەمەس! – دەپ ايتىپ اۋزىن جيىپ العانشا بولمادى، ەلدىڭ كوزى ونىڭ ءسوزىنىڭ جانى بارلىعىنا بىردەن جەتتى... كينوفيلم فينالى كەرەمەت كادرلارمەن شىرايلاندى. ەل تاراپ جاتتى. كوپتىڭ اۋزىندا – ءبىر عانا ءسوز. قىز قانداي اسەم، جىگىت قانداي سىمباتتى. جىگىتتەر جاعى ءوز قوساقتارىنىڭ دجينا لوللوبريدجيدانىڭ تىرناعىنا دا تاتىمايتىنىن قالاي مويىنداسىن، ءاي قويشى دەپ بارادى، كەلىنشەك اتاۋلى ءوز كۇيەۋلەرىنىڭ قالقانقۇلاق جەرار ءفيليپتىڭ قاسىندا ءجىپ ەسۋگە جارامايتىنىن بىلسە دە، بىلمەگەنسىپ بارادى. بويداقتار توبى:

- شومەلەنىڭ قىزىعىن كورە الماي ءجۇر ەكەنبىز عوي وسى كۇنگە دەيىن، - دەپ بارماقتارىن تىستەدى. ءبىراق ەشتەن كەش جاقسى ەمەس پە، ەرتەڭىندە ەكى-ۇش جىگىت وزدەرى تىلەنىپ ءشوپ شابۋعا، سابان مايالاۋعا كەتتى. «ونەر الەۋەتى، ونەر پارمەندىلىگى دەگەن – وسى!»، - دەپ رەجيسسەر جىگىت شاتتاندى. «ونەردىڭ تىكەلەي وندىرگىش كۇشكە اينالۋى، مىنە، وسى»، - دەپ ساۋلەتقان بريگادير جيىنبەك اگرونمعا تاۋدا بايانداپ جاتتى...

...وركەنيەتتىڭ جالپاق تا شومبال دوڭعالاعى جوسالى اۋىلىنىڭ كەدىر-بۇدىرىن بارىنشا ارلەي، بارىنشا تەگىستەي كىرگەلى قاش-شا-ان. قارتتار جاعى قول سىلتەۋ تىرشىلىگىنە باس ۇرىپ، بويكۇيەز اتالىققا كوشكەلى نە زامان. جاستار جاعى پايداسى قارا باقىرعا تاتىمايتىن رومانتيزمگە ىلەسىپ، تالاي جەرگە دە بارىپ قالعان. ايتتى-ايتپادى، ىستىعى مەن سۋىعى دا بىردەي ءبىر ءولىارا شاق سياقتى.

اسكەر كينوسىن كورسەتەدى. جوسالىنىڭ ءۇش سۇلۋى كۇندە بولماسا دا كۇن ارالاتا كينوعا كەلەدى. ءمۇعالىم قىز وقۋشىلاردى تەكسەرەم دەپ كەلەدى. دارىگەر زەرىكتىم دەپ كەلەدى. كىتاپحاناشى كىتاپ وقۋدان جالىقتىم دەپ كەلەدى. العى جاقتا قارلىعاشتاي ءتىزىلىپ وتىرادى دەيسىڭ. كينودان قالمايتىنداردىڭ ءبىرى – ساۋلەتحان بريگادير مەن قامبالاي پوشتاشى. ولار اسىرەسە دەتەكتيۆكە اۋەس، شپيون مەن ءبانديتى قاپتاعان كينولارعا قۇمار. سوندىقتان بولار، ساراپتاۋ مەن تالداۋعا كەلگەندە، الدارىنا جان سالمايدى. ەكراننان بوس جاتقان كەسپەكتى كورسە بولدى، وسى، نەعىسادا تەگىن ەمەس دەپ مالىمدەيدى جارىسا. ايتقاندارى ايداي كەلەدى. الگى كەسپەك اقىرىندا دومالاپ تىنادى.

كينودان كەيىن دراما ۇيىرمەسى دايىندىعىن باستايدى، ەكىنشى ستۋدياداعى ەستراداشىلار جاپون اۋەندەرىن سالا الماي اۋرە بولىپ جاتادى، ءۇشىنشى ستۋديادا ۇلت اسپاپتار وركەسترى تورت-بەس كۇي ويناپ ولار كەتەدى. كوبىنەسە ەل بيگە كەلەدى. سونداعى «چارلستوندى»، ء«تۆيستى»، «بۋگي-ۆۋگيدى» جارىتىپ بيلەيتىن جەتى-سەگىز ادام. جوسالىنىڭ ءۇش پەريزاتى، اسكەر، جاناحمەت، ءاشىمحان. كەيىنگى ەكەۋىمەن قىز بايقۇستار امالدارىنىڭ جوقتىعىنان بيلەيدى. ونى بۇلار دا سەزەدى، سەزسە دە تۋرا ءبىر اينالىمعا شاقىرۋدان جالىقپايدى. اسكەر كەيىنگى كەزدە كۇلارا مۇعالىممەن عانا ۆالس بيلەيتىندى شىعاردى. وسىدان كەيىن تۋرا ءبىر اي بيلەدى.

قامبالاي پوشتاشىنىڭ كورىپكەلى بار ەكەن ناۋقان-ساۋقان، تىعىز جۇمىس سايابىرسىعان سوڭ كولحوزدىڭ جالپى جينالىسىندا جيىنبەك دىرداي باسقارماسى بوپ شىعا كەلدى. ەلدىڭ الدىن الا، كوپشىلىك كوزىنشە شلياپالارىن اسپانعا اتقانداردىڭ بىردە-بىرىنىڭ قولى كوزدەگەن قىزمەتتەرىنە جەتپەدى. تاۋى شاعىلىپ قايتقانداردىڭ ىشىندە قامبالاي پوشتاشى دا بار. ونىڭ قولى باس ەكونوميستىككە ەكى-اق ەلى جەتپەي قايتىپتى، جيىنبەك وعان «كولحوز مۇشەسى ەمەسسىڭ، بىرىنشىدەن. ەكىنشىدەن، سوڭعى كۋرسىڭ قالدى عوي، الاڭداماي ءبىتىرىپ ال. ارعى جاعىن كورەرمىز» دەپتى-مىس. ول ءبىراق جۇرت قۇساپ جاڭا باستىقتى كۇستانالاپ قايتپادى، جۇرگەن-تۇرعان جەرىندە، قايتا، ونىڭ ادىلدىگىن، پرينتسيپشىلىگىن، ءبىلىمدارلىعىن جاريا ەتۋمەن بولدى.

جاناحمەت پەن ءاشىمحان سالىپ ۇرىپ كەڭسەگە بارعان جوق. جاقىن ادامىنىڭ كوتەرىلگەنىنە شۇكىرشىلىك ەتكەن دە قويعان. وزدەرى بارماسا دا دامدەس بولعان بۇلاردى جيىنبەك ۇمىتپاپتى. باسقارما باسىمەن ءوزى ىزدەپ كەلدى، وكپە-نازىن ايتا كەلدى. تامام قايمانا قازاق جالپىلداپ كەلىپ جاتقاندا، ەكەۋىڭنىڭ تىم-تىرىس جاتىپ الۋلارىڭ مەنى ويلاندىرىپ تاستادى. سونىڭ توركىنىن بىلەيىن دەپ كەلدىم دەپ ءسوزدىڭ تۋراسىنا كوشتى.

مىنا ەكەۋى قوپالاقتاپ، ساسىپ قالدى. جوسالىنىڭ بەل بالاسى باسقارما بولىپ جاتقاندا جاقتىرماعانداي ومالىپ وتىرىپ قالعاندارى استە جاراماعان ەكەن. «اعاسى باردىڭ – جاعاسى بار، ءىنىسى باردىڭ – تىنىسى بار» دەمەۋشى مە ەدى ۇلكەندەر. اقىر-اياعى كوپپەن بىرگە قوپاڭداپ قايتەمىز، ەل اياعى باسىلعان سوڭ، ەكەۋارا بارىپ قۇتتى بولسىن ايتپاق ەدىككە سالىپ قۇتىلدى.

كوزىن جۇما كۇلكىگە شاشالعان جيىنبەك باسقارما ەندى بۇيىمتايىن العا جايا باستادى. سالعان جەردەن جاناحمەتكە اۋىر جۇك ارتتى. ەكىنشى بريگادانىڭ بريگاديرى وسالداۋ، سوعان جەتەكشى بولاسىڭ، ويلانۋعا ءبىر جەتى ماۋلەت بەرەمىن دەدى. انا ساۋلەتحانداي دوڭگەلەتىپ الىپ كەتسەڭ، جۇرتىڭ دا، وكىمەتىڭ دە الاقانىنا ساپ ايالايدى. ءوزىڭ دەپۋتاتسىڭ. مەنىڭ دە تابان تىرەر مىقتى تياناعىم بولۋ كەرەك. «اعزام اينالاسىمەن ارداقتى» دەۋشى مە ەدى انا رەجيسسەرلەرىڭ. ايتەۋىر، سونى ەستەن شىعارماساڭدارشى. ال، مىنا كورەگەن ءاشىمحاندى حالىقتىق باقىلاۋ كوميسسياسىنىڭ ءتوراعالىعىنا ۇسىنعالى وتىرمىز. مال دارىگەرلىگى ەشقايدا قاشپايدى، قايتا، مال وتارلارىن تەكسەرگەندە پايداسىن كورەدى. ءارقايسىڭا جۋان-جۋان پوترفەل ۇستاتىپ، جىلى-جۇمساق ورىنعا جايلاستىرايىن دەگەن مەن جوق. جاقسىلاپ جۇمىس تالاپ ەتەمىن، ءبىر اي ىشىندە سىلىنىپ تۇسەسىڭدەر. ەلىم-جەرىم دەسەڭدەر، كيىڭدەر وسى قامىتتى. مىسىڭا ساي ءىسىڭ بولسىن دەپ ءبىر قويدى.

اشىمحان ويلانىپ-تولعاناتىن كەز ەمەس، ءبىز قاتارداعى سولداتپىز، ماعان سول ايتقان جۇمىسىڭىز ءداپ كەلەدى دەپ كەلىسە كەتتى. جاناحمەت ۇيرەنگەن تراكتوردان قول ءۇزىپ كەتە المايتىنىن ايتىپ وتىرىپ الدى. ەكى قولعا – ءبىر رۋل، قۇمىرسقا ءالىڭدى بىلدەن ءبىر تانبادى. ءاشىمحان انە بۇلار سەنىم كورسەتسەڭ ءوستىپ كەرگيدى دەگەندەي الاقانىن جايىپ، جيىنبەككە قارادى. جيىنبەك ىشتەي جەتەككە ەرگەن تازىنىڭ تۇلكى المايتىنى راس شىعار، وسىنى بەكەر قينادىم-اۋ دەسە دە، سىرتتاي:

- جىگىتتەر، قيال مەن قياليدىڭ اراسى ءبىر-اق ءارىپ. قيال ادامعا قانات بىتىرەدى، ناقتى ىسكە باسشى بولادى. قيالي جان ەلەس قانا قارمايدى. ەكونوميكا ناقتىلىقتى سۇيەدى، ونى وركەندەتۋ باعدارلاماسىن ءوزىم رەتتەرمىن. ال، تسيفرعا كونبەيتىن، ولشەۋگە بولمايتىن كوڭىل-كۇي ماسەلەسىن قايتەمىز؟ – دەپ ۇستەلگە بىر-بىرىنە مىنگەسە قونعان شىبىندى گازەتپەن سوعۋعا وقتالعان ءاشىمحانعا، ونىڭ قيمىلىنان كوز جازباي وتىرعان جاناحمەتكە كوز تاستادى. – جۇرتتى جاسار ىسىمىزگە ناندىرا المىز با، سوڭىمىزدان ەرتە الامىز با؟ باستى ماسەلە – وسى. ايتپاقشى، سەندەر «توپازدى» ءالى دايىنداپ جاتىرمىسىڭدار؟ ازىرگە سەندەردى پاريجگە گاسترولدىك ساپارعا ەشكىم جىبەرە قويماس. ينتەللەكتۋال رەجيسسەرلارىڭنىڭ تاڭداپ العانى عوي، ءسىرا. مەن قارسى ەمەسپى، ءبىراق الەۋمەتتىك سۇرانىستى ەسكەرمەگەن باتىرىڭ. تاپ ءقازىر بىزگە سيپاتى وزگەشەلەۋ شىعارما كەرەك. مەن سەندەرگە مىنا ءبىر نارسەنى اپ كەپ ەم، كورەرسىڭدەر. «ون ءۇشىنشى پرەلسەداتەل»، «ون ءۇشىنشى ءتوراعا» دەسەڭدەر دە بولادى. بىزگە وسىنداي تارتىستى دراما لايىق ءقازىر.

جيىنبەك ء«اشىمحاننىڭ» قولىنا جۋان جۋرنالدى ۇستاتتى دا «ۆولگاسىنا» ءمىنىپ اتتانىپ كەتتى.

- وسى سەنىڭ نە ويلاعانىڭ بار؟ – ءاشىمحان جاناحمەتكە قارادى. – ەلدىڭ كوبى ات ارقاسىنا بۇت ارتۋعا زار بوپ جۇرسە، ىلعي كەرى سيەسىڭ. بۇ نە كەرگىس. سەن كەتسەڭ، قارا تىراكتىر قاراڭ قالا ما، الدە كۇلارا سۇلۋ سولياركادان باسقا ءيىسمايدى جاقتارماي ما؟

- ءاي-اي، باس جاققا بارىسپالىق. نە دەسەڭ، و دە – ءبارىن قۇپ الام. ءبىراق كۇلارا تۋرالى شايپاۋ ءسوز ايتپا! ول پەرىشتە عوي، پەرىشتە...

- ءايبۇي، شيكىناي، كوزسىز كوبەلەك... قويدىم-قويدىم، تويدىم-تويدىم. ەي، قۇرداس، جاڭاعى جيىنبەكتىڭ ايتقانىنا يمانداي ۇيىدىڭ با؟..

- سەنبەگەندە شە، ول جانىن ساپ كىرىسسە، ءبىز دە قابىرعاسۇيەۋ بولارمىز. سەن انا جاقتان، مەن مىنا جاقتان. ىرگەدەگى الدابەرگەنوۆ پەن گولوۆاتسكيدەن قاي جەرىمىز كەم؟

- سولاي دە، جاناحمەتىم. مەنىڭ نانىڭقىراماي تۇرعانىم. قۇرعاق قيال ەمەس پە، ا؟ ەكونوميكانى، ءال-اۋقاتتى شۇعىل ورگە باستىرۋ بىر-ەكى جىلدىڭ شاراسى ەمەس. «ۋرا-ۋرا!» دەپ ءجۇرىپ... وماقاسىپ جۇرمەسەك... ءبىراق اڭگىمەسىنىڭ ءبىرازى كوڭىلگە ۇيالايدى. ۇيالايدى، سايتان ۇيالايدى... ھا-ھا-ھا! تىكتىم باسىمدى بايگەگە، ەردىم سوڭىنان. ەر سوڭىمنان، كەتتىك! رەجيسسەرىمىزدى تابايىق.

رەجيسسەر جىگىت اۋەلى قاتتى شامىرقاندى. بىتۋگە تاياۋ دۇنيەنى تاستاپ، جاڭانى باستاۋعا بولا ما، اركىمنىڭ وزىندىك ءتاسىلى، شىعارماشىلىق ءادىسى، حالىققا اسەر ەتۋدىڭ وزىندىك جولى بار. ول، ماسەلەن، باتىسەۆروپالىق ۇلگىنىڭ ىشكى دراماتۋرگياسىمەن تولعاندىرعىسى كەلىپتى. تۆورچەستۆو ديكتاتقا كونە المايدى دەپ ءبىرشاما كۇيىپ-پىستى. ءبىىراق كولحوز باسقارماسى ايتقان سوڭ، نە امال، ونىڭ ۇستىنە مىنا ەكى بەدەلدى ارتيست تە قوس قولدارىن كوتەرىپ جاقتاپ وتىر. امالىن تاۋىپ، باستى ءرولدى جيىنبەكتىڭ وزىنە ويناتسام. انشلاگ دايىن. پرەدسەداتەلدى وينايتىن پرەدسەداتەل! قاتىپ كەتپەي مە؟ تەلەۆيزيا مەن گازەت قىزمەتكەرلەرىنەن اياق الىپ ءجۇرىپ كور سونسوڭ. اتاق تا، داڭق تا... پەرس-س-س-پەكتيۆا!

وز ىزدەنىسىن وسىلايشا الەۋمەت قالاۋىنا يكەمدەي بىلگەن رەجيسسەر جىگىت جاڭا سپەكتاكل دايىنداۋعا قۇلشىنا كىرىسىپ كەتتى. وسى پەساداعى پرەدسەداتەل رولىنە قامبالاي جارماسىپ كورىپ ەدى، پرەدسەداتەلدى پرەدسەداتەل وينايدى دەگەن سوڭ بەتى قايتىپ قالدى. ءبىراق قادالىپ ءجۇرىپ ءستاتيستىڭ ورنىن سۇراپ الدى. قىزدار جاپاتارماعاي ماقتاعان اسكەرگە رول دە تيمەدى. ونىڭ ونسىز دا جۇمىسى باستان اسادى. وسى اۋىلدىڭ قىز-جىگىتىنىڭ شەتىنەن ءبيشى بولىپ شىعۋىنا ونىڭ ەداۋىر ەڭبەگى ءسىڭدى. ول ەندى ءۆالستى تەك ءماپىش كىتاپحاناشىمەن دوڭگەلەتىپ ءجۇردى، بۇدان ءبىر اي بۇرىنعى كۇلارا ءمۇعالىم مۇلدە ۇمىتىلدى. كۇلارا دا سول بي كەشتەرىن ەستەن شىعارىپ الىپتى. كوپ ۇزاماي ول جاناحمەت دەپۋتاتقا تۇرمىسقا شىقتى دا كەتتى. وبلكەڭەستىڭ دەپۋتاتى ۇلان-اسىر توي جاسادى. وسى دۇرىلدەگەن جيىندا ساۋلەتقان بريگادير ۇزاق-سونار ءسوز سويلەدى، جاس جۇبايلاردىڭ قۇرمەتىنە ەل ورىندارىنان قوپارىلا كوتەرىلىپ، ەكى رەت الىپ تاستادى. اي اياقتالا بەرە ءاشىمحان مەن ءماپىش تە ارعىماق باسىن اۋىلدىق كەڭەس كەڭسەسىنە تىرەدى.

- سەن ماعان كۇلە بەرۋشى ەڭ. ءقازىر دە سول قىلىعىڭنان ارىلا الماي كەلە جاتىرسىڭ-اۋ دەيمىن. – ءاشىمحان تىزگىنىن ىركە بەردى.

- ەندى ىركىلمەيىك. ساعان دەگەن كوڭىلىم تازا، پەيىلىم اق. داق تۇسپەگەن. تۇسەيىك اتتان، كۋالار دا ءتۇسسىن، - دەپ ءماپىش ءاشىمحاننىڭ قىزىل بەلبەۋىنەن مىقتاپ ۇستادى. ءاشىمحان دا ۇلان-اسىر، اعىل-تەگىل توي جاسادى. بۇنىڭ تويىندا جيىنبەك باسقارما كوسىلە دە، شەشىلە دە ءسوز سويلەدى. كوپشىلىك جاستاردىڭ شاڭىراعى بيىك، بوساعاسى بەرىك بولۋى ءۇشىن ءۇش قايتارا الىپ جىبەردى.

توي-تومالاقتان كەيىن ءاشىمحان افيشا جازۋىن كىلت توقتاتتى. كينونىڭ ءاتى-جونى ەندى قيقى-جيقى قارىپتەردى مىسە تۇتتى. العاشىندا ەل تاڭقالىپ ءجۇردى، بىرتە-بىرتە كوزى ۇيرەنىپ كەتتى، ءومىر بويى وسىلاي جازىلىپ جۇرگەندەي جۇرت بۇل كەرى كەتكەن قۇبىلىسقا سامارقاۋ تارتتى. وندا تۇرعان نە بار. ءمان-ماعىناسى كەلىسسە بولعانى، سىرت ءپىشىندى كىم ەلەپ-ەسكەرەر دەيسىڭ. ونىڭ ەسەسىنە مۇعالىمدەر جوعارى كلاسس وقۋشىلارىن كەشكى سەانسقا جىبەرەتىن بولدى. كوپتەن بەرى شەتجۇرتتىق فيلمدەر دە بوي كورسەتپەدى. نە دەسەڭ دە، قالاي سىلتەسەڭ دە، ەرەسەك وقۋشىلار كەشكى سەانستان قالمايدى. جوسپار اسىپ-توگىلە ورىندالىپ جاتىر. اسكەر نەگىزگى جۇمىسىمەن قوسا ەسترادا وركەسترىنىڭ جەتەكشىسى رەتىندە دە كوزگە ءتۇسىپ ءجۇر. ەندى ول التىنجامال دارىگەردى ارگەنتين تانگوسى ىرعاعىمەن ءۇيىرىپ الدى. التىنجامال سۇلۋ ساۋلەتحان بريگاديردىڭ تۋعان قارىنداسى ەمەس پە؟ سول سەبەپتەن بولۋ كەرەك، اسكەردىڭ تايپالىسى ءبىر ايعا دا جەتپەدى. تۇپ-تۋرا جيىرما كۇننەن كەيىن التىنجامال مەن اسكەردىڭ تويعا شاقىرۋ قاعازى تالاي ادامنىڭ قولىنا ءتيدى. وسى تويدا اۋداندىق كينوفيكاتسيا ديرەكتورى، كولحوزدىڭ حالىقتىق باقىلاۋ كوميسسياسىنىڭ ءتوراعاسى ءاشىمحان، وبلىستىق كەڭەس دەپۋتاتى جاناحمەت سىي-سياپاتتارىن جاساپ، ءتاۋىر-تاۋار تىلەك ايتتى. ءوز جەتەكشىسىنىڭ تويىندا ويناماعاندا، قايدا ويناسىن – ەسترادا وركەسترىنىڭ تاڭ اتقانشا جاعى سەمبەدى. اسكەر ءوز تويىندا تانگو-فوكستروتتى ءوز قوساعىمەن عانا بيلەدى. كوشەلى سوزدەردەن كەيىن باس قوسقان جۇرتشىلىق جاستارعا كول-كوسىر باق تىلەپ، ءتورت قايتارا الىپ-الىپ تاستادى.

رەجيسسەردىڭ ماقساتى ءىشنارا ورىندالدى، ءىشنارا ورىندالا قويمادى. ءتوراعا ءرولىن ءتوراعا وينامادى. ونىڭ ساناۋلى، ەسەپتەۋلى ۋاقىتى نەگە جەتسىن. اقىرى پوشتاشى قامبالاي ءوز دەگەنىنە جەتتى، ون ءۇشىنشى پرەدسەداتەلدىڭ ءرولى سوعان ءتيدى. قاراپايىم ستاتيستەن باستى كەيىپكەرگە دەيىن كوتەرىلگەن ونىڭ قۋانىشىنا پوشتاعا كەلگەن شال-شاۋقان ورتاق بولىپ جاتتى. رەجيسسەر جىگىت قامبالايدى ەرتىپ گاسترولگە كەلىپ جاتقان لەنينگراد ۇلكەن دراما تەاترىنىڭ ەكى-ۇش سپەكتاكلىن الماتىعا بارىپ كورىپ قايتتى.

ناۋقاندىق جۇمىستىڭ ءبارى اياقتالىسىمەن، «ون ءۇشىنشى پرەدسەداتەلدىڭ» پرەمەراسى قويىلار كۇنى كولحوز حالىقتىق باقىلاۋ كوميسسياسىنىڭ ءتوراعاسى مەن وبلىستىق كەڭەس دەپۋتاتىنىڭ اۋىلدىڭ الەۋمەتتىك جاعدايى مەن مادەنيەتىن كوتەرۋ تۋرالى ماقالاسى وبلىستىق گازەتتە جارىق كوردى. سپەكتاكل پرەمەراسىنا وبلىستان، اۋداننان ءبىرتالاي ىعاي مەن سىعاي كەلدى. ۆەستيبيۋلدە قىدىرىپ جۇرگەن ىعاي مەن سىعايدىڭ ءبىرى باسقارماعا قاراپ:

- بيىل استىقتان دا، مال ونىمىنەن دە كورسەتكىشتەرىڭ جامان ەمەس. وبلىستىق كەڭەستە اتتارىڭ اتالدى. تاسىڭ ورگە دومالاپ كەلەدى، بالا، - دەدى.

- قولىمىزدان كەلگەندى اياماي جاتىرمىز، اعاسى. وبلىس پەن اۋداننىڭ دا كومەگى زور. ءسوزىمىزدى سويلەپ جاتىرسىزدار، - دەپ جيىنبەك جان-جاعىنا قارادى. ىعاي مەن سىعاي:

- سونى ءبىلىپ جۇرسەڭدەر بولعانى دا... دەگەنمەن بار عوي، اۋرەسى از، ۇيرەنشىكتى فولكلورلىق شىعارمالاردان باستاۋ كەرەك ەدى. جۇرت سونىسىمەن-اق حالىق تەاترى اتاعىن الىپ جاتقان جوق پا. مىنا پەسا الماتى تۇگىل موسكۆادا جاڭا قويىلىپ جاتىر دەپ ەستيمىن، - دەپ يەك قاقتى. اناداي جەردە تۇرعان اۋداندىق مادەنيەت ءبولىمىنىڭ مەڭگەرۋشىسى ءدال سولاي دەپ تاق ەتە ءتۇستى.

- الماتىنىڭ الدىنا ءتۇسىپ كەتكەنىمىز قالاي بولار ەكەن؟.. وسى كىمنەن ەستىدىم، باستى ءرولدى باسقارمانىڭ ءوزى وينايدى دەپ؟ – الگى ىعاي مەن سىعاي جيىنبەككە كوزىن سىعىرايتا قارادى.

- رەجيسسەرىمىزدىڭ العاشىندا سونداي ويى بولعانى راس. ول رولگە مەنىڭ تالانتىم دا، ۋاقىتىم دا جەتىڭكىرەمەدى. تىزگىندى جىگىتتەردىڭ وزىنە بەردىك. ەركىن سىلتەسىن. الماتىلىقتار بىزگە رەنجي قويماس. ءبىزدىڭ دە ۇلكەن كوشكە قوسىلساق دەگەن ماقسۇتىمىز بار. ونەر كوزى حالىقتا ەمەس پە، اعاسى؟ – دەپ جيىنبەك بارىنشا بايىپپەن جاۋاپ بەردى.

- ەركىندىك دەيسىڭ، ءا؟ ونىڭ ءوزى بىلاي نەلەۋ عوي... تالانتىم جەتپەدى دەيسىڭ، ءا؟ قايلايشا جەتپەيدى؟ سەنىڭ اكتەرلىك دارىنىڭ جوق پا ەدى؟ – ىعاي مەن سىعاي ۇناتپاي قالعانداي بولدى.

- جوققا جۇيرىك جەتپەيدى. ساحناداعى ءرولدى قامبالاي ويناسىن. ال، مىنا ون ءۇشىنشى پرەدسەداتەل قىزمەتىن وعان بەرە قويماسپىن. ساناي كەلسەم، شىنىندا دا ون ءۇشىنشى باسقارما ەكەنمىن، - دەپ كۇلىپ قويدى.

وسى كەزدە ىعاي مەن سىعايدىڭ كوزى قابىرعادان اپىل-عۇپىل الىنىپ جاتقان پورترەتتەرگە ءتۇستى. موينىن بۇرىپ قاسىن كەردى. ونىسىن جيىنبەك ايتقىزباي ءتۇسىندى.

- رەجيسسەرمىز ءبىر وريگينالنىي جىگىت. انا كىسىلەرگە قاراما-قارسى ءبىر قابىرعاعا تۇگەلدەي عالىمدار مەن اعارتۋشىلاردىڭ پورترەتىن ىلگىزىپ قويىپتى. مادەنيەت ءۇيى عىلىم اكادەمياسى ەمەس قوي، مەن الىپ تاستاڭدار دەگەنمىن. كەشە تىندىرار ءىستى بۇگىن قولعا الار ءبىزدىڭ حالىق قوي، - دەپ جيىنبەك ازىلگە اۋداردى.

- اباي، شوقان، ىبىراي تۇرا بەرسىن، - ىعاي مەن سىعاي رۇقسات ەتكەندەي سۇق ساۋساعىن جازىپ-بۇكتى..

- اباي، شوقان، ىبىرايعا تيمەڭدەر! – دەپ جيىنبەك بالا جۇگىرتىپ جىبەردى.

- مىنا ارۋاقتاي قاتپاڭ كىم؟ – ىعاي مەن سىعاي جاعىنا پىشاق جانىپ العانداي ارىق ادامنىڭ پورترەتىنىڭ كوزىن شۇقىپ الا جازدادى.

- يوگانن كەپلەر. بۇدان 349 جىل بۇرىن دۇنيە سالعان، - رەجيسسەر جىگىت مىرس ەتە ءتۇستى.

- دوڭگەلەك داتا ەمەس ەكەن. سونشا قاستەرلەيتىن كىم ءوزى؟ – ىعاي مەن سىعاي رەجيسسەر جىگىتكە جىلتىراي قارادى.

- جۇلدىزدار مامانى. وسى كىسىنىڭ ءۇش زاڭىنا سۇيەنە كەلە جانە ايدىڭ مەرزىمدىك قوزعالىسىن باقىلاۋى ارقاسىندا نيۋتون بۇكىلالەمدىك تارتىلىس زاڭىن اشىپتى، - دەدى رەجيسسەر جىگىت پورترەتتىڭ بەتىندەگى داقتى ورامالىمەن سۇرتە بەرىپ.

- ە-ە، وندا تۇرعان نە بار؟! – ىعاي مەن سىعاي قاباق شىتا زالعا تارتتى.

- وندا تۇرعان نە بار! ءجونسىز اقىلگويسۋدى قاشان قوياسىڭدار! – ساۋلەتحان رەجيسسەرعا جازعىرا قارادى دا، ىعاي مەن سىعايدىڭ سوڭىنان ەرگەن توپقا ىلەسە پارتەرگە جايعاستى.

جەر شارى ءوز ەسەبىنەن جاڭىلار ەمەس. تەاتر ساحناسىنداي اسپاي-ساسپاي اينالىپ جاتىر. مۇندا دا سۋسىلداپ تورعىن شىمىلدىق اشىلدى. دۇركىرەتە قول سوعىلدى. مىنا ىعى-جىعى تىرشىلىكتىڭ سىباعالى وقيعالارى مەن قاقتىعىستارى جوسالى مادەنيەت ءۇيىنىڭ ساحناسىندا جايدارلى شەشىمىن تاۋىپ، ادەمى دە اسەرلى ويىن الەمىنە كوشتى.

الماتى، 1982.



ماتەريالدى كوشىرىپ جاريالاۋ ءۇشىن رەداكتسيانىڭ نەمەسە اۆتوردىڭ جازباشا، اۋىزشا رۇقساتى قاجەت جانە Adebiportal.kz پورتالىنا گيپەرسىلتەمە بەرىلۋى ءتيىس. اۆتورلىق قۇقىق ساقتالماعان جاعدايدا قر اۆتورلىق قۇقىق جانە ساباقتاس قۇقىقتار تۋرالى زاڭىمەن قورعالادى. Adebiportal@gmail.com 8(7172) 79 82 12 (ىشكى – 112)

ماقالا اۆتورىنىڭ كوزقاراسى رەداكتسيانىڭ كوزقاراسىن بىلدىرمەيدى.




كەلۋ قاينارى: http://www.elarna.net/koru.php?tur=30&id=1034153

پىكىرلەر:


جازعان لەبىزىڭىز300 ارىپتەن اسپاسىن!
ادام نەمەسە ۋيروس ەكەندىگىڭىزدى تۇراقتاندىرۋ سۇراعى، كاتەكشەگە ءجۇز دەپ سيفىرمەن جازىڭىز، راحىمەت!

ەڭ جاڭا ماقالالار


پاۆلودار وبلىسىندا 2-3 2 مينوت
اباي داڭقى اسقاقتادى &# 8 مينوت
ساۋدا ىستەر مينيسترلىگى 8 مينوت
ونكولوگ قاتەرلى ىسىكتىڭ 8 مينوت
قىزىلوردادا جوعالىپ كەت 14 مينوت
تيانشان تورى 18 مينوت
توقاەۆ: ء"بىز ۋاقى 19 مينوت
تەڭىز جاعاسىنان 50 جىل 19 مينوت
ءۇندىستاندا ء«ال-فارابي 28 مينوت
KASE قورىتىندىسى: $1 = 29 مينوت
تۇركىستان وبلىسىندا ەسك 29 مينوت
تولەن ابدىك. قوناقتار | 1 ساعات
قاسىم-جومارت توقاەۆ جەز 1 ساعات
الەۋمەتتىك سەرتيفيكات ا 1 ساعات
ابايتانۋشىلار: ەۋروپالى 1 ساعات
تيانشان تورى 1 ساعات
تۇركيا باتىس ەلدەرىن زا 1 ساعات
امازون ورمانى ورتەنىپ ج 1 ساعات
باتىسقازاقستاندىق دويبى 1 ساعات
تيانشان تورى 1 ساعات
ەرلان نىسانباەۆ مارقاكو 1 ساعات
24 تامىز، سەنبىگە ارنال 1 ساعات
قازاقستان ارالدى قۇتقار 1 ساعات
الماگۇل شيمالوۆا. قارا 1 ساعات
شەتەلدەگى مۇھاجىرلار سا 1 ساعات
قازاق قوعامى ابايدى تول 1 ساعات
ەلوردادا كوز جۇمعان ادا 1 ساعات
تيانشان تورى 1 ساعات
ساپارباەۆ ەلباسىنىڭ ماق 1 ساعات
23.08.2019 - اقپارات - 1 ساعات