سوڭعى جىلدار تاجىريبەسىنە سۇيەنسەك، جەكەمەنشىك مەكەمەلەر اقتوبە، قوستاناي جانە وزگە دە وڭىرلەردە سپورتتىق نىسانداردى كوپتەپ ىسكە قوسقان.

ەلىمىزدە سوڭعى 4 جىلدىڭ بەدەرىندە مەملەكەتتىك-جەكەمەنشىك ارىپتەستىك اياسىندا 550-دەن استام جوبا جۇزەگە اسىرىلدى. سونىڭ قىرىعى – دەنە شىنىقتىرۋ جانە ساۋىقتىرۋ كەشەندەرى. بۇل رەتتە ينۆەستورلاردىڭ ىسكە بەل شەشە كىرىسكەنى بايقالادى.

نۇرداۋلەت بەكسارى، قازاقستاندىق مەملەكەتتىك-جەكەمەنشىك ارىپتەستىك ورتالىعىنىڭ ساراپشىسى:

– ەلباسىمىز 2020 جىلعا دەيىن 50 دەنە-شىنىقتىرۋ، ساۋىقتىرۋ ورتالىعى ەمەس، 100 داناسىن سالۋعا بۇيرىق بەرگەن. ءبىزدىڭ ويىمىزشا، جەكەمەنشىك ارىپتەستىكتىڭ مەحانيزمىن قولدانا وتىرىپ، وسى 100 جوبانى جۇزەگە اسىرعان دۇرىس دەپ ويلايمىز. ويتكەنى سپورتتىق ينفراقۇرىلىم وتە ۇلكەن كاپيتالدى قاجەت ەتەدى.

ار ەلدى مەكەندە سپورت نىساندارىنىڭ بولۋى – سالاماتتى ۇرپاق كەپىلى. بۇل ءوز كەزەگىندە جاستاردىڭ بويىنداعى بۇلا كۇشتى دۇرىس باعىتتا پايدالانا ءبىلۋ دەگەن ءسوز.

اسىلى وسى ۇدەدەن شىعۋ قوس تاراپتىڭ دا مۇددەسى. ماسەلەن، بوس تۇرعان نىساندى دەنە شىنىقتىرۋ مەكەمەسىنە اينالدىرىپ، سپورتشىلاردى تاربيەلەۋگە مۇمكىندىك بار. نەمەسە جەكەمەنشىك ۇيىم جوبانى باستان-اياق جۇزەگە اسىرا الادى. اقتوبەدەگى 500 بالاعا ارنالعان تەننيس ورتالىعى مەملەكەتتىك-جەكەمەنشىك ارىپتەستىك اياسىندا سالىندى. قۇرىلىسقا 1 جارىم ميلليارد تەڭگە جۇمسالدى. زاماناۋي كەشەندە 8 بىردەي الاڭ بار. مۇندا 5-تەن 13 جاسقا دەيىنگى بالالار تەگىن جاتتىعادى.

اناتولي سولداتەنكو، اقتوبە وبلىستىق تەننيس فەدەراتسياسى ديرەكتورىنىڭ ورىنباسارى:

– بۇل تەننيس ورتالىعىندا ءبىز بالالار اراسىنداعى دا، ەرەسەكتەر اراسىنداعى دا جارىستاردى قابىلداي الامىز. حالىقارالىق ستاندارتتارعا ساي بولعاندىقتان الەمدىك بىرىنشىلىكتەردى وتكىزۋگە دە مۇمكىندىك بار. بۇعان دەيىن 4 رەت جاسوسپىرىمدەر اراسىندا اشىق بىرىنشىلىك وتكىزدىك. بۇل وڭىردە تەننيس سپورتىن كوپشىلىككە دارىپتەۋگە مۇمكىندىك بەرەدى.

قوستاناي وبلىسى دا سوڭعى 2 جىلدا 4 سپورتتىق نىساندى ىسكە قوستى. مەملەكەت پەن بيزنەس بىرلەسىپ تاعى 2 كەشەن قۇرىلىسىن باستاپ كەتتى. ءبىرى – 2 جارىم مىڭ ادامعا ارنالعان مۇز سارايى، ال ەكىنشىسى – ۇزىندىعى 50 مەترلىك باسسەين.

جانبولات بەكەنوۆ، مەملەكەتتىك-جەكەمەنشىك ارىپتەستىك جوباسىنا قاتىسۋشى كومپانيا وكىلى:

– بىلتىر ىسكە قوسىلعان نىسانداردىڭ ءبىرى – قوستاناي سپورت كەشەنى. وندا مىڭ كورەرمەنگە ارنالعان ورىن جانە جالپى اۋماعى 2 مىڭ شارشى مەتر بولاتىن سپورت زالى بار. ءقازىر ۆولەيبول، باسكەتبول جانە توعىزقۇمالاق ۇيىرمەلەرى جۇمىس ىستەپ تۇر.

توبىل وڭىرىندەگى سپورت نىساندارىنىڭ ساپاسى دا جوعارى. «باسكەتبول، ۆولەيبول الاڭدارىنىڭ ەدەن جابىندىلارى زامان تالابىنا ساي»، – دەيدى جاتتىقتىرۋشىلار. دەمەك بايراقتى باسەكەلەر وتكىزۋگە مۇمكىندىك مول. ال وسىنداي جوبالاردى مەملەكەت باستاپ بيزنەس قوشتاي بىلسە، بۇقارالىق سپورت سالاسىنىڭ دا دامۋ قارقىنى ارتا تۇسپەك.

اۆتورى: راۋان مىڭباەۆ