ەل-ارنا قولفون نۇسقاسىنا ەنۋ Еларна қолфон нұсқасына ену


ەل-ارنا قولفون نۇسقاسى | "قولفون نۇسقاسىن ءتۇسىرۋ (Android)

Кірілше
جۇكتەۋ-البومىم-البومدار-جەلى
وسى توردى ساقتايمىن! | وسى توردى باس بەت ەتەمىن!

ءبىزدىڭ بايلانىس: elarna2012@gmail.com

Үш күнгы келушылер санағыКелген адам саны (IP)Көрілген бет саны (PWs)КомпйутерҚолфон
2019-07-14457388527 %73 %
2019-07-15525205545 %55 %
2019-07-16493288145 %55 %


تىركەلىڭىزدەر كىتاپحانا قوجالار تورابى البومدار قازاقتىڭ 1001 ەرتەگىسى

ءتۇرى: جۇلدىز جۋرنالى

جولدانعان ۋاقىتى: 16:30 - 2019/06/18



(اڭگىمە)

– بەك! بە-ە-ە-ك!

– اۋ؟

– شىقساڭشى. كەشىگەمىز عوي.

– ءقازىر.

فەننىڭ ىزىڭى ەستىلگەندە بارىپ بەكبول ءوزىنىڭ قارسىسىندا تۇرعان كىر ماشينە ۇستىندەگى بارماق جۋاندىعىنداي تسەللوفاننىڭ اۋىزىن بۋىپ، ۆاننانىڭ استىنداعى كىشىگىرىم بانكاعا جاسىردى. استىڭعى ەرىنىنە سالعان قوشقىل ءيىستىنى راكوۆيناعا تۇكىرىپ جاتىپ، شۇباتىلا سوزىلعان كوگجىلتىم سىلەكەيىنەن جيىركەنگەندەي جىلدام سۋ اعىزعان. ۇيرەنبەگەندىكى مە، جۇرەگى لوبلىپ، زاپىران كوتەرىلدى. جايشىلىقتا تىستەرىنە ششەتكا جۋىتۋى قيىن ەدى. وسى جولى ۇزاق ىسقىلادى. لوقسىعانىنا قاراماي، ششەتكاسىن ءتىلىنىڭ ۇستىنە دە ءبىراز سىرعاناتىپ العان. بۇل جۋىنىپ شىققاندا كاميلا دا شاشىن جەلپىلدەتىپ بولعان ەكەن.

– سونشا ۇزاق وتىرعانىڭ نە؟

– تەمەكى قويعالى بەرى قيىن بوپ قالدى...

– ۇيرەنىپ كەتەسىڭ. ءيىسى جاعىمسىز. – كاميلا تىجىرىنىپ كەلىپ، قۇلاعىنىڭ ءۇستىن ەبەدەيسىز جاپقان بەكبولدىڭ شاشىن تارادى. – بۇگىن قيدىرىپ تاستايىق.

– ءيىسىنىڭ جاعىمسىز ەكەنىن بۇگىن بايقادىڭ با؟

– كيىن ەندى. ەمتيحانعا كەشىگەمىز.

– قاي اۋديتوريا ەدى؟

اسحانادا قۋىرعان جۇمىرتقاسىن تارەلكەگە سالىپ جاتقان كاميلا:

– ءۇش ءجۇز سەگىز، – دەپ داۋىسىن كوتەرىڭكىرەدى.

– ەكەۋمىز ءبىر اۋديتوريادامىز عوي.

– ءيا. ...ايتپاقشى، بەك! قاي پيدجاگىمدى كيسەم بولادى؟

– تۇندە سۇرىڭدى دايىنداپ قويىپ ەڭ عوي، كامي!

تاعى دا تىجىرىندى.

– وسى نە ادەت؟

– ول تۇندەگى كوڭىل كۇيمەن تاڭدالعان.

– ءتۇس كوردىڭ بە نەمەنە؟

– ءيا. ايتپاقشى تويدى كۇزدە جاساساق قايتەدى؟

– ۇزاتۋىڭدى جاساعىڭ كەلسە... ال نەگىزى ۇيلەنۋ توي جازدا عوي.

قاستارىنىڭ تۇيىسكەن جەرى مەن مۇرنىنىڭ ءۇستى انتەك اجىمدەندى دە:

– قوي. قىزىلىمدى كيىپ شىعا بەرەيىن، – دەپ پيدجاگىن قولىنا ۇستاعان كۇيى سىرتقى ەسىككە بەتتەدى.

جول بويىنا شىعا قالعاندا ەكەۋىنىڭ قول كوتەرۋىن كۇتپەستەن قىزىل Tوyota توقتادى. باراتىن جەرلەرى جاقىن بولسا دا، كولىكتىڭ جاڭالىعىن ۇناتقان بەكبول ءتورت جۇزگە كەلىسكەن. ارتقى ورىندىعىنا جايعاسىپ، قوزعالعان كولىكتىڭ ءجۇرىسىن جۇرگىزۋشى ەكىنشىگە اۋىستىرعاندا بارىپ كاميلا باج ەتە قالدى:

– ويباي، ۇمىتتىم. كەشە تۇندە سۇر پيدجاگىمنىڭ قالتاسىنا سالىپ، دايىنداپ قويعان ەدىم.

– نەنى؟

– شپورگالكا.

– ۇيگە كىرسەك كەشىگەمىز. ۋايىمداماشى. بەرىلگەن پاراقتاردى تولتىرىپ شىقساڭ جەتەدى ەمەس پە؟

– ءتۇ-ۋ-ۋ، قيىن بولدى...

راديو سارناپ تۇر.

– سوعىس وتى سونبەگەن سيريادان وتانداستارىمىز ەلگە ورالدى. پرەزيدەنتتىڭ تىكەلەي تاپسىرماسىمەن جاسالعان «جۋسان» گۋمانيتارلىق وپەراتسياسىنىڭ ناتيجەسىندە 47 قانداسىمىز تۋعان جەرگە اياق باستى.

جۇرگىزۋشى راديونىڭ داۋىسىن كوتەرىپ:

– سوتتاۋ كەرەك. وتانىنان بەزدىرگەن قۋ ساقال... ءبىزدى قۇرتاتىن وسىلار، – دەپ نىعىرلاي سويلەپ، قوشتاماس پا دەگەندەي ايناسىنا قاراعىشتاي بەرگەن. بەكبول مەن كاميلا وقۋ ورنىنىڭ الدىنان تۇسكەندە جاڭالىقتاردىڭ سوڭىن تىڭداپ ۇلگەرگەن جوق. جۇرگىزۋشى بۇنىڭ ۇسىنعان اقشاسىنا قاراپ:

– باۋىرىم، قايتارىمسىز جوق پا ەدى؟ – دەپ ەبەدەيسىز ىرجالاڭداپ كولىك ەسىگىنىڭ قالتاشاسىن قارمانا بەردى. سىڭعىرلاعان تيىن داۋىستارى ەستىلەدى.

– ءوي، وسى بالا-شاعا دا تەمىر-تەرسەك سالىپ وينايدى، – دەپ بەكبولعا تاعى قاراعان. ارتىنداعى ماشينەلەر سيگنالداتىپ، جول بويىن ازان-قازان قىلدى.

– جاقسى، اعا. قاجەت ەمەس.

– رەنجىمە، باۋىرىم. جۇرگىزۋشى تاعى دا ەبەدەيسىز ىرجالاقتاپ اپ، ءجۇرىپ كەتتى. ەرەكشە سيگنالداتىپ تۇرىپ، بار گازىن باسىپ وتكەن اق Audi-دىڭ رولىنەن ساقالدى جىگىتتى بايقادى بەكبول.

– ولە مە؟.. ­– دەگەن كاميلا بەكبولعا بۇرىلىپ: – الدىڭ با؟ – دەدى.

– نەنى؟ ءا، جوق. مايدا جوق دەيدى.

– ءبارى وسى. الۋ كەرەك ەدى.

– مايدالانباي-اق قويشى ەندى.

***

– ...بەك، قاي پيدجاگىمدى كيسەم بولادى؟

– تۇندە سۇرىڭدى دايىنداپ جاتىر ەڭ.

كاميلا تىجىرىنا سۇر پيدجاگىن قولىنا الدى.

– كيەتىن كيىمىم جوق.

– ارتىڭنان كەلەدى عوي.

– جازعا دەيىن جۇرەم بە وسىلاي، – دەپ بۋىنى كەتكەندەي موينىنا اسىلا بەردى.

– كامي! جىلدام شىعايىق ەندى.

جول بويىنا جاقىنداعاندا بەكبولدىڭ كوزىنە ءوتىپ بارا جاتقان قىزىل Tوyota جىلى ۇشىرادى. «جاڭا سياقتى» دەپ ىشىنەن ءبىر ويلادى دا، جول بويىنا شىعىپ قولىن كوتەرگەن. اق Audi كەلىپ توقتادى دا، ساقالى وراق كورمەگەن قاراسورا سەكىلدى جۇرگىزۋشى كوزى شىڭىلتىرلانا يەك قاقتى.

– ۋنيۆەرسيتەت... – ماشينەسىن بايقاتپاي اڭداعان بەكبول: – ءۇش ءجۇز، – دەدى. جۇرگىزۋشى ەشبىر ىڭعاي تانىتپاستان سىرتقى تۇتقاسى سىنعان ەسىگىن ىشىنەن ءوزى اشتى.

– قازاق راديوسىندا تاڭعى جاڭالىقتار. سوعىس وتى سونبەگەن سيريادان وتانداستارىمىز ەلگە ورالدى. پرەزيدەنتتىڭ تىكەلەي تاپسىرماسىمەن جاسالعان «جۋسان» گۋمانيتارلىق وپەراتسياسىنىڭ ناتيجەسىندە 47 قانداسىمىز...

جۇرگىزۋشى راديو ارناسىن اۋىستىرىپ، اۋەن ەستىلگەنىنىڭ ەشبىرىنە ايالداماي، قايتا اينالىپ جاڭالىقتارعا توقتادى. باس ءمۇفتيدىڭ سوزدەرى وقىلىپ جاتىر ەكەن، جۇرگىزۋشى راديونى ءبىراق ءوشىرىپ تاستاعاندا بۇلار دىتتەگەن جەرلەرىنە دە جەتىپ ۇلگەرگەن ەدى. قايتارىم اقشاسىن بەرىسىمەن، اق Audi-دىڭ كارى موتورىن شىڭعىرتا ءجۇرىپ كەتتى.

– ولە مە؟

– شپورگالكاڭدى بەيبەرەكەت پايدالانبا. بىلەتىن سۇراعىڭ كەلسە بارىنشا ءوزىڭ جاز. جاراي ما؟

– باسىمدا وقىعاننان قالعان ەشتەمە جوق، – دەپ كاميلا تاعى دا بەكبولدىڭ مويىنىنا اسىلىپ الدى.

اۋديتورياعا كىرىپ، سىرت كيىمدەرىن شەشىپ ۇلگەرەمىن دەگەنشە ەمتيحان سۇراقتارى اشىلىپ، تاراتىلىپ جاتتى. ەكەۋى اۋديتوريانىڭ ەكى بۇرىشىنا ءتۇسىپتى. كەزەكشى ءمۇعالىم بەكبولدىڭ باكالاۆرداعى كۋرستاسى اراي ەكەن. ءقازىر وسىندا كىشى عىلىمي قىزمەتكەر.

– ماگيستراتۋراعا كەشىگىپ ءتۇسىپ، ەمتيحانعا دا كەشىگىپ جۇرگەنىڭ نە؟ – دەپ ازىلدەگەندەي بولىپ كوزىنىڭ استىمەن كاميلاعا قارادى. – شپورگالكا قولدانبايمىز. كامەرادان قاراپ وتىر. ەسكەرتۋ بولمايدى. بىردەن اكت تولتىرامىز.

بەكبول كۋرستاسىنا ازىلدەگىسى كەلىپ، كاميلاعا قاراپ توقتاپ قالدى. ءوڭى قاشىپ كەتىپتى. مۇلدەم تانىس ەمەس سۇراقتار كەلگەن-اۋ. ەمتيحان بارىسىندا بىر-ەكى رەت ىمداسىپ كورىپ ەدى، كەزەكشى كۋرستاسى مۇمكىندىك بەرمەدى.

– بەكبول! سەندەرگە بولا مەن جاۋاپقا تارتىلامىن.

«– و-وي، قانشىق! بىرگە وقىعان كەزدە ەمتيحان سايىن جىگىتتەردىڭ ءبىر كوزى جازۋىندا بولسا، ءبىر كوزى شپورگالكا جاپسىرىلعان سەنىڭ اق سانىڭدا بولۋشى ەدى عوي.

– توق سانى دەپ ايتىڭىز.

– قىزىل سۋعا قىزىپ كەلگەندە تاڭەرتەڭ ەكى بۇتىڭنىڭ ورتاسىنا تالاي سول توق سانىن قىسىپ جاتىپ ويانعانىڭدى قالاي ۇمىتارسىڭ.

– ءجا. ارىعا بارىسپايىق»، – دەپ دەنەسىن شىمىرلاتىپ باستاعان ويلارىن بەكبول تەز جيىپ الدى. كاميلانىڭ قويان كوزدەرى جاۋتەڭ-جاۋتەڭ ەتىپ بۇعان قاراعىشتاي بەرەدى. بۇل نە ىستەسىن؟ ويىمەن جاتاقحاناداعى وقۋ زالدارىن اداقتاپ ءجۇرىپ، وزىنە جاۋتەڭدەگەن ونىڭ كوزدەرىن كورگەن سايىن ءجۇزى كۇيىپ بارادى. بايقاسا كاميلا كامەرانىڭ ءدال استىندا وتىر. ونى تۇسىرۋگە مۇمكىندىگى شەكتەۋلى. ءوزى دە بايقاعان سىڭايلى. سۇر پيدجاگىنىڭ ىشكى قالتاسىنان قوبىراعان قاعازدارىن شىعارىپ، ىشىنەن ءبىرىن تاڭداپ الدى دا، جازىپ وتىرعان پاراعىنىڭ استىنا جاسىرىپ، كوشىرە باستادى. ءوڭى كىرەيىن دەگەن سياقتى. كوزدەرى تۇيىسكەن سايىن، جىمىڭ ەتىپ كوزىن قىسىپ قويادى. وتىرىگى وزىنە عانا ايان ادامعا سەنىم ارتا قاراعان كوزدەردەن ارتىق قانداي اۋىر جازا بولسىن؟

ەكى ساعاتتىق ەمتيحان ۋاقىتىنىڭ جارتىسىنا جۋىقتاعاندا شەكەسىندەگى كوك تامىرى بىلەۋلەگەن كەزەكشى اراي سىرتقى شىعىپ كەتتى. ارادا بەس مينۋت وتپەي تەكسەرۋشى كىرىپ، بىردەن كاميلانىڭ ورنىنا قاراي بەتتەگەن. بوتا كوزدەرى جاساۋراپ كەتكەن ونىڭ الدىنداعى پاراقتى جۇلىپ العاندا استىنان تىلىمدەي قاعاز ەدەنگە سالماق سالعىسى كەلمەي قاۋىرسىنداي قالىقتاپ ءتۇستى.

– بىزبەن ءجۇرىڭىز!

– اعاي، كەشىرىڭىزشى؟!

– بىزبەن ءجۇرىڭىز دەيمىن! ەمتيحان باستالعالى كوشىرىپ وتىرسىز. ۇيالمايسىز با؟

كاميلا توبەسىندەگى كامەراعا ءبىر، بەكبولعا ءبىر، تەكسەرۋشىلەرگە ءبىر قارادى. كومەك تىلەدى. قورعاۋشى تىلەندى. كىرپىگىن قاقسا جاساۋراعان كوزى بۇلاي كەتەتىنىن سەزىپ، تىنىسى جيىلەپ كەتكەن.

– ءبىز كوز جۇما قاراپ ەدىك. رەكتوراتتان حابارلاسىپ جاتىر.

ول تاعى دا كامەراعا ءبىر، بەكبولعا ءبىر قارادى. تەكسەرۋشىلەرگە جانارىن توقتاتپادى بۇل جولى.

– اعاي! ءبىر رەت ەسكەرتۋ بەرسەڭىزشى، – دەگەن بەكبولدىڭ داۋىسى شىقتى. كاميلا وسى ساتكە دەيىن تىستەنە ۇستاپ تۇرعان كوز جاسىن ەركىنە جىبەرە سالعان.

– اعاي، كەشىرىڭىزشى!

ەسىكتەن اراي كىرىپ كەلگەندە تەكسەرۋشى بۇرىلىپ:

– كەزەكشىسىز بە؟ نەگە قارامايسىز؟ – دەپ جەكىپ سويلەدى.

– بۇل قىز كوشىرىپ وتىرعان جوق ەدى عوي، – دەپ اراي بايەك بولىپ بارادى.

– ەسكەرتۋ بولمايتىنىن ايتىپ پا ەدىڭىز؟

– ءيا، – دەپ اراي شىن ىقىلاسىمەن كاميلانىڭ جانىنا كەلگەن.

– دۇرىس قاراماعان ءسىزدىڭ دە ۇستىڭىزدەن اكت تولتىرامىز.

تەكسەرۋشى كاميلانى ەرتىپ شىعىپ بارا جاتقاندا بەكبول دا ەرىكسىز ورنىنان كوتەرىلىپ، ەسىككە بەتتەگەن. اراي جالما-جان الدىنان شىقتى.

– قايدا باراسىڭ؟ سەنىڭ دە ۇستىڭنەن اكت تولتىرادى ءقازىر.

– تولتىرا بەرسىن، – دەپ يتەرە شىعىپ كەتتى.

– بەكبول...

كوريدورعا شىعىپ ەدى، كاميلا يىعى سەلكىلدەپ تەكسەرۋشىنىڭ ارتىنان كەتىپ بارادى ەكەن. جۇگىرىپ جەتتى دە قىرىقتاردان اسىپ قالعان ەركەكتى قولىنان تارتىپ توقتاتتى.

– اعا! ءبىر جولعا كەشىرىڭىزشى! قىزىڭىز بار شىعار ءسىزدىڭ دە!

– سەن الگى اۋديتوريادا وتىرعان جىگىت ەمەسسىڭ بە؟

– ءيا، اعا. بىلاي شىعىپ سويلەسەيىكشى.

– جىبەر قولىمدى!

– اعا! كىشكەنتاي قىزدى سونشا جىلاتقانىڭىز نە؟!

– شپورگالكا پايدالانۋ زاڭسىزدىق...

– تۇسىنەم، اعا! ءبىراق ول جۇمىس ىستەمەيدى. ستيپەندياسىمەن عانا... ءتۇسىنىڭىزشى! ادامبىز عوي!..

تەكسەرۋشى ەركەك ءسال ويلانىپ، جانى اشىعانداي كۇرسىنىپ الىپ:

– ءاي، جۇرىڭدەرشى، – دەپ قولىن سىلتەدى.

ۇشەۋى رەكتوراتتاعى جوعارعى قاباتقا كوتەرىلىپ كەلە جاتقاندا كاميلا جىلاۋىن دا، جالىنۋىن دا توقتاتتى. دۇرىسىنان شەشىلىپ كەتەدى دەدى مە، الدە جالعىز ەمەس ەكەندىگىن سەزىندى مە...

ۇشەۋى 12 قاباتتاعى كابينەتتىڭ الدىنا كەلگەندە ىشتەن داراقى كۇلكى ەستىلگەن. بۇلار كىرە بەرگەندە كۇلكىسىن تىيا الماي تۇرعان قارىندى قارا بۇلارعا قاراپ تىپتەن قارقىلداي جونەلدى.

– تاعى دا توستاعانىن جۋعاندار ما؟

– كەلىسەيىك دەيدى مىنا بىرەۋى. قىزدى قورعاعانىن قارا، – دەپ بۇلاردى ەرتىپ كەلگەن تەكسەرۋشى كابينەتكە كىرە تەلەفونىن الدى دا: – اراي، جاڭا شپورگالكامەن ۇستالعان قىزدىڭ دا، ارتىنان شىعىپ كەتكەن جىگىتتىڭ دە جۇمىسىن سىزىپ تاستا. جازعى وقۋعا قالادى.

– اعا!..

– نە اعا؟ زاڭ بارىنە ورتاق. بار، بار. سەندەرسىز-اق جۇمىسىمىز كوپ.

باعاناعى قارىندى قارا سەريالى كۇلكىسىن ءالى اياقتاماعان ەكەن، تاعى دا قابىرعالاردى دىرىلدەتىپ اكەتتى. بەكبولدىڭ كومەيىنە كەلگەن «ش» مەن «س» دىبىستارى تىستەرىنىڭ ارالارىندا قالىپ كەتىپ، كاميلانى ەرتىپ شىعىپ بارا جاتقاندا ەسىكتى بار كۇشىمەن جاپتى. بار كەلگەنى وسى بولدى ونىڭ قولىنان. بەكبولدىڭ ءتىس اراسىندا قالىپ كەتكەن دىبىستارىنىڭ بارلىعى ليفت ىشىندە توگىلگەن ەدى.

– مۇنىڭ بارلىعىن مەنىڭ كوزىمشە نە ءۇشىن ايتىپ جاتسىڭ؟ توكپەدىڭ بە الگىندە؟

– ولار ءسوز تۇسىنەر دەيمىسىڭ؟

– ا، سەنىڭ ايتىپ جاتقانىڭ ءسوز ەكەن عوي...

***

– اعاي! ءبىر رەت ەسكەرتۋ بەرسەڭىزشى، – دەگەن بەكبولدىڭ داۋىسى شىقتى. كاميلا وسى ساتكە دەيىن تىستەنە ۇستاپ تۇرعان كوز جاسىن ەركىنە جىبەرە سالعان.

– اعاي، كەشىرىڭىزشى.

ەسىكتەن اراي كىرىپ كەلگەندە تەكسەرۋشى بۇرىلىپ:

– كەزەكشىسىز بە؟ نەگە قارامايسىز؟ – دەپ جەكي سويلەدى.

– بۇل قىز كوشىرىپ وتىرعان جوق ەدى عوي، – دەپ اراي بايەك بولىپ بارادى.

– ەسكەرتۋ بولمايتىنىن ايتىپ پا ەدىڭىز؟

– ءيا، – دەپ اراي شىن ىقىلاسىمەن كاميلانىڭ جانىنا كەلگەن.

– دۇرىس قاراماعان ءسىزدىڭ دە ۇستىڭىزدەن اكت تولتىرامىز.

بەكبول قارا تەرگە ءتۇسىپ وتىر ەدى. ءقازىر كاميلانىڭ ارتىنان شىقسا، ەكەۋىنىڭ دە ۇستىنەن اكت تولتىرادى. ء«جۇز مىڭ ايلىقتى سوسىن قايدا جەتكىزەمىز؟ ونىڭ دا، مەنىڭ دە باسىمدا كرەديت. پاتەر، كرەديت...». بەكبول ويشا ەسەپتەپ، يىعى قۋشيىپ بارا جاتقاندا اپ-ساتتە جاسىن تىيىپ العان كاميلاعا كوزى ءتۇستى. وڭمەنىنەن ءوتىپ كەتەردەي تەسىلە قاراپ تۇر ەكەن، بۇل كوزىمەن دالبالاقتاپ بەيبەرەكەت بىرنارسەنى ىمدايىن دەگەنشە تەمىر ەسىك تارس جابىلعان.

– بيىل ەشكىمدى اياپ جاتقان جوق. قيت ەتسە اكت تولتىرىپ، جازعى سەمەسترگە قالدىرىپ جاتىر.

بەكبول دالباسالاپ تەرەزەگە قاراپ ەدى، الداعى جىلعى وتەتىن ۋنيۆەرسيتەت مەرەيتويىنىڭ باننەرىن ءىلىپ جاتىر ەكەن. نە جازىپ شىققانى ەسىندە جوق، تەك ەرتەرەك بىتىرۋگە تىرىسىپ، جۇمىسىن ارايدىڭ الدىنا اپارىپ وتكىزگەندە، قولىنا كىشىگىرىم قاعاز ۇستاتتى. تۇسىنبەگەن بەكبول بەتىنە قاراعان.

– مەنىڭ ءنومىرىم عوي. ءقازىر ەمتيحان ۋاقىتى بىتكەن سوڭ حابارلاس. بار كومەگىمدى ايامايمىن.

جاس تا بولسا ءمۇعالىم دەگەن اتى بار كۋرستاسىنىڭ ءسوزىن كوڭىلىنە دەمەۋ قىلىپ شىققان بەكبول كاميلانى ىزدەدى. تەلەفونىنا حابارلاسىپ ەدى، ءوشىرۋلى تۇر ەكەن. القىنىپ ءجۇرىپ، رەكتورات ارتىنداعى ورىندىقتاردان ازەر تاپتى. تاپتى دا، كىلت ىركىلىپ قالدى. نە بارارىن، نە بارماسىن ويلانىپ، تۇسالعان اتتاي جانىنا ءىلبىپ ازەر جەتىپ وتىرعان. توسەلگەن جانتاق ۇستىندە وتىرعان سەكىلدى.

– قالاي تاپسىردىڭ؟

– كامي! سەن ستيپەنديادان ايرىلدىڭ. ول سول جەردە-اق انىق بولدى. وزىمدىكىن ساقتاپ، بىردەمە قىلىپ جەتكىزەمىز عوي...

– مەن سەنەن اقشا سۇرادىم با؟ قالاي تاپسىردىڭ دەيمىن!

– بولاتىن سەكىلدى.

– مەنىكىن سۇراعىڭ كەلمەي مە؟

– كامي!..

– جوق. شىن سۇراشى.

– ...قالاي؟!

– جاقسى. مەن جازباي-اق 5 الاتىن بولدىم. قالاي دەيسىڭ عوي؟ مەنى رەكتوراتقا اپارىپ تەكسەردى. «شپورگالكا بار ما؟» دەدى. «بار» دەدىم. سودان يۋبكامنىڭ ەتەگىن كوتەرىپ، سانىما جاسىرعان بۋمانى ءبىر الىپ بەردىم. «تاعى بار ما؟» دەدى. «بار» دەدىم. ءتوستارتقىشىما قولىمدى سالىپ ەم، ءوزىم دە قۇلىن مۇشەسى جاڭا ءوسىپ كەلە جاتقان قىزداي قىلىپ تارتقان ەكەنمىن، الا المادىم. اعىتىپ جىبەرىپ... قولىم جەتپەدى. پيدجاگىمدى شەشىپ قارىندى كىسىگە تەرىس قاراپ تۇرا قالىپ ەم، ول دا ەپتى ەكەن، قارۋلى ساۋساقتارىمەن اعىتىپ جىبەردى. انارىمنىڭ ۇشى قاتايىپ، دەنەمنىڭ قۇسەتتەنىپ بارا جاتقانىن سەزدىرگىم كەلمەي، جىلدامداتىپ ونداعى بۋمانى تاعى ءبىر الىپ ۇستاتتىم. مەن سەنىڭ كوزىڭشە عانا كيىنىپ، شەشىنىپ ءجۇرىپ سەزىنبەيدى ەكەنمىن، سايقالدىقپەن وزگەنىڭ الدىندا شەشىنگەننىڭ دە وزىنشە ءلاززاتى بار ما، قالاي؟..

– كاميلا!..

– نە كاميلا؟ ىشىندە قارنى جۋان تەكسەرۋشى بار ەكەن. سول مەنى ۇناتىپ قالعان سەكىلدى. بۇگىن كەشكە كەزدەسۋگە شاقىردى.

– كەزدەسۋگە؟!

– ءيا. سونى ويلانىپ وتىرمىن. جو-جوق. سەن ويلاعانداي بارسام با، بارماسام با دەپ ەمەس. نە كيىپ بارسام ەكەن؟ سونى ويلاپ وتىرمىن. قالاي ويلايسىڭ؟

***

ەكەۋى ليفتتەن شىعىپ، جاياۋلاپ كەلەدى. ەكەۋى دە جاپالاقتاپ جاۋىپ جاتقان قاردان جىلدام قوزعالعىسى كەلمەي ءىلبىپ كەلەدى.

– كامي؟

– ا؟

– ءالى تالاي بۇلارمەن كەزدەسەتىن كەز تۋادى.

– مەن ونى ويلاپ كەلە جاتقام جوق.

– ەندى؟

– قايدان جۇمىس ىزدەيتىنىمدى ويلاپ كەلەم. اي سوڭىندا كرەديت تولەۋ كەرەك قوي. سەندە دە ستيپەنديا جوق، مەندە دە. بۇرىن دا جەتىپ قارىق قىلمايتىن ەدى.

– كامي!..

– جوق. راس قوي. نەگە، بىلمەسەم دە، ءوزىم جازا سالمادىم ەكەن. سەن دە بەكەر شىقتىڭ سوڭىمنان. سەنىكىن ءۇيتىپ-بۇيتىپ جەتكىزۋگە بولار ەدى مەن جۇمىس تاپقانشا.

– كامي دەيمىن؟!

كاميلا ارتىنا بۇرىلعاندا شىرشا بۇتاقتارىن قاعازعا وراپ گۇل ەتىپ سىيلاپ تۇرعان بەكبولدى كوردى.

– وسى ما بار ويلاعانىڭ؟ بار ۋايىمىڭ؟

– سەن ماعان رەنجىمەيسىڭ بە؟

– نەسىنە رەنجيىن؟ بەكبول كاميلانى جول بويىندا ۇزاق قۇشاقتادى. سۋىقتان مۇرنى ءيىس سەزبەسە دە، بەتىنەن يىسكەدى. شىنىمەن ءتاتتى ءيىسىن سەزدى مە، جوق، كوكىرەگىندە جاتتالعان ءيىستى ويلادى ما، تۇسىنىكسىز.

– ءجۇر، كافەگە بارايىق.

– سوسىن سەنىڭ شاشىڭدى الدىرايىق.

– تەمەكى دە تارتايىق.

– ۋادە شە؟

– بۇگىنشە بولادى، – دەپ قۋلانا كۇلدى بەكبول.

– تاعى باستاپ كەتەسىڭ عوي سەن...

***

جاپالاقتاپ قار ەمەس، قورعاسىن جاۋىپ جاتقانداي ەكەۋى ەڭسەسىن تىكتەي الماي قايتتى. ءسوز باستاسام دەپ تەرەڭ جيعان دەمى تەككە شىعىپ، شىلىمسىراپ كەلەدى. ۇيدەگى ۆاننانىڭ استىنداعى بانكانى ويلادى. تاڭەرتەڭگىدەي جيىركەنگەن جوق ءبىراق.

ۇيگە كىرە ۆانناعا كىرىپ، سۋىن اعىزىپ قويدى. بانكانىڭ ىشىندەگى بارماق جۋاندىعىنداي تسەللوفانعا تاعى قول جۇگىرتكەن. ايناعا قاراپ ەبەدەيسىز ءوسىپ كەتكەن شاشىن ءبىراز جۇلمالاپ تۇردى دا، تاڭەرتەڭگىدەي ءتىسىن جۋىپ سىرتقا شىقتى. كاميلا كيىمىن اۋىستىرماستان ديۆاندا تەرىس قاراپ جاتىر. ءولى تىنىشتىق. اسحاناداعى سۋ كرانىنىڭ بۇزىلىپ تۇرعانىنا كوپ بولعان. تامعان تامشىنىڭ تىرسىلى راكوۆيناعا ەمەس، تۋرا ميىنا تامىپ تۇرعانداي تەسىپ بارادى. كاميلا ءسال بۇرىلىپ:

– تۋھ! وسى كراندى جوندەيتىن دە ەركەك تابىلمادى عوي، – دەپ زارلانا ءۇن قاتتى.

بەكبول اسحاناعا كەلىپ كراندى شەتىنە قاراي ىسىرىپ قويىپ، تىڭ تىڭداپ تاعى ءبىراز تۇرعان. كرەسلوعا كەلىپ وتىرعان قالپى قالعىپ كەتكەن ول، كاميلانىڭ تىقىرىنان ويانىپ كەتتى. سىرتقا شىعۋعا دايىندالىپ، كيىنىپ جاتىر ەكەن.

– قايدا باراسىڭ؟

– ايتتىم عوي.

– كاميلا! سول جەردە مەنى نامىسسىزدىعىنان نەمەسە جىگەرسىزدىگىنەن قالدى دەيمىسىڭ؟ الدە اينالدىرعان الپىس مىڭعا قۇنىعىپپىن با؟ مىنا پاتەردىڭ اقىسى، كۇندەلىكتى ءجۇرىس-تۇرىس، اس-اۋقاتتىڭ اقشاسى موينىما قامىت بولعاندا قاي جاعىنا تارت دەيسىڭ؟

– ءوزىڭ ات تا، مەن اربا ەكەنمىن عوي. كەشىر، ءبىراق قالاي تارتساڭ دا ات تا ءولدى، اربا دا سىندى.

– سىندىرعىڭ دا، ولتىرگىڭ دە كەلىپ تۇرعان ءوزىڭسىڭ!

– ءيا، بار كىنانىڭ باستاۋى ءوزىم ەكەنىن بىلەمىن. ءبىراق اربا مەن ات ورتاسىندا قاشانعى قور بولۋعا بولادى؟

بەكبول ءۇنسىز قالدى. قالاي، نە تۇسىندىرەرىن بىلگەن جوق. ۆانناعا كىرىپ كەتكەن كاميلا قولىنا بارماق جۋاندىعىنداي اۋزى بۋىلعان تسەللوفاندى الىپ شىقتى:

– بەكبول! نە ۋادەڭدە، نە سوزىڭدە ءپاتۋا جوق ەكەن.

– بىردەن قويا سالۋ وڭاي دەيسىڭ بە؟

– بىرىنەن بىرىنە وتەيىن دەدىڭ بە؟ بولدى. شەگە بەر.

– قالاي بولسا دا تاستاسام بولدى ەمەس پە؟

– ەكەۋمىزدىڭ ايىرماشىلىعىمىز وسى جەر، بەكبول! سەن ءۇشىن ناتيجە ماڭىزدى. مەن ءۇشىن پروتسەسس، – دەدى دە كاميلا ەسىكتى سىرتىنان جاۋىپ شىعىپ كەتتى.

بولمەدە بەكبول مەن ءولى تىنىشتىقتان باسقا ەشتەڭە قالعان جوق. كرەسلودا شالقايا قيمىلسىز، ءتىپتى دەمسىز جاتقان بەكبولعا قاراپ تىنىشتىق بولمەدە ءوزىن تىپتەن جالعىز سەزىنگەن ەدى.

***

شاشتارازدان شىققان ەكەۋى ۇيگە كوڭىلدى قايتتى. بەكبولدىڭ قىسقا شاشپەن جۇرگەنى ەكەۋىنە دە ىڭعايسىز، قىزىق كورىنىپ كەلە جاتقانى تاعى بار. ءاربىر دۇكەننىڭ الدىنان، توقتاپ تۇرعان كولىكتەردىڭ جانىنان وتكەن سايىن بەكبول تەرەزەلەرىنە ءبىر قاراپ، ەسكى ادەتىمەن باسىن ءبىر سىلكيدى. بۇرىنعىداي جەلپىلدەگەن شاشى جوق.

كافەدەن جاڭا شىقسا دا ەكەۋى ەسكى ادەتتەرىنە باسىپ ءشايعا وتىرا بەرگەندە بەكبولدىڭ تەلەفونى بەزەك قاقتى.

– قالايسىزدار، ماما؟ مەندە ءبارى جاقسى. سول ۇيدەمىز. ەمتيحاننان كەلدىم. قاسىمدا تۇراتىن باسقا جىگىتتەر جۇمىستا. ءيا، ءيا. ايتا بەرىڭىز. قانشا كەرەك ەدى؟ جاقسى. قاڭتار سوڭىندا جىبەرەمىن عوي. جاقسى. اكەمە سالەم دەڭىز.

– نە دەيدى؟

– قاڭتاردا قارىنداسىمنىڭ وقۋىنىڭ اقشاسىن قۇيۋ كەرەك ەكەن. سوعان اقشا جيناي بەر دەيدى!

– مەنىڭ كرەديتىمدى جابۋعا مۇمكىندىگىڭ بولماي ما سوندا؟

– نەگە بولماسىن؟! تابىلادى عوي.

– تابىلادى عوي... – دەپ كاميلا كوڭىلسىز بوكالعا ءشاي قۇيا باستادى.

– نە بولدى ساعان؟

– ءجاي. بۇل ءسوزدىڭ سوڭى نەمەن تىنارىن كوزىممەن تالاي كوردىم ەمەس پە؟ – دەدى ءشاي ۇسىنىپ جاتىپ. – وسى جاڭا جىلدا اۋىلعا بارماي، قالادا قالىپ جۇمىس ىستەيىن بە؟

– نە جۇمىس؟

– مۇمكىن داياشى، مۇمكىن كاسسير...

– وسى جىلدى ۇيىڭدە قارسى الىپ، اتا-اناڭمەن بىرگە بولماساڭ، جازدا ۇيلەنىپ كەتەمىز. سوسىن قاشان باراسىڭ؟

– بىلمەيمىن. ءارقاشان وتباسىڭ، تۋعان-تۋىستارىڭا بۇيرەگىڭ بۇرادى دا تۇرادى. شىنىمدى ايتسام، ساعان كۇيەۋگە شىعۋعا قورقامىن. جەكە ءومىرىمىز بولمايتىن سياقتى.

– قارا اسپاندى توندىرمەشى.

***

بار ءۇيدى جالعىز بيلەپ-توستەپ وتىرعان تىنىشتىقتىڭ تەلەفون شىرىلى زارەسىن ۇشىردى. شاشى قوبىراپ كرەسلودا وتىرعان بەكبول بەيتانىس نومىرگە ۇزاق ءۇڭىلىپ، شىرامىتقانداي بولدى دا ەكرانىن ءتۇرتىپ قالدى.

– اللو! بەكبول قالايسىڭ؟

– جاقسى.

– ارايمىن عوي. كاميلا نە ىستەدى؟

– ەشتەڭە. سول كۇيى قالدى.

– نەگە حابارلاسپادىڭ؟ ءبىر جاعىنا شىعىساتىن ەدىك.

– ءجا، قاجەتى جوق. ەندى كەش، – دەدى بەكبول كوڭىلسىز.

– جوق، كەش ەمەس. سەن ءقازىر ءبىزدىڭ ۇيگە كەلسەڭشى. اقىلداسايىق.

بەكبول ەكىۇشتى ويدىڭ قۇيرىعىنىڭ قايسىسىن ۇستارىن بىلمەي وتىردى دا:

– ادرەسىڭ قالاي؟ – دەپ سالدەن كەيىن جاۋاپ قاتتى.

– بايتۇرسىنوۆ پەن قۇرمانعازى كوشەلەرىنىڭ قيىلىسى. سوندا كەلسەڭ ءوزىم كۇتىپ الامىن.

– جاقسى. ءقازىر شىعامىن.

بەكبول تەلەفون تۇتقاسىن تاستاپ، ەكرانعا قاراعاندا كاميلانىڭ كەتكەنىنە ءۇش ساعاتتان اسىپ كەتكەنىن اڭعاردى. جاڭا جىلدىق كوڭىل كۇيى جوق قالانىڭ ەسىگىندە اياز اتا بەينەلەنگەن دۇكەنىنەن تەمەكى ساتىپ الدى دا، تاكسي توقتاتتى. سۇرعىلت ءتۇستى Opel-گە وتىرىپ قوزعالا بەرگەندە جولدىڭ ارعى بەتىنە Land ءcruiser-دىڭ توقتاعانىن اڭدادى. تانىس سەكىلدى كورىندى كوزىنە.

راديو سارناپ تۇر.

«سيريادان ورالعان 47 قانداسىمىزدىڭ وتىزى 1-5 جاس ارالىعىنداعى بالالار، جانە ء11-ى ايەلدەر. سيرياعا ءبىر كەزدەرى ءدىني ساۋاتسىزدىقتىڭ كەسىرىنەن اسىپ كەتكەن قانداستارىمىز قاشاندا كومەككە ءزارۋ ەدى. پرەزيدەنتىمىز گۋمانيتارلىق وپەراتسيا جايىندا باستاما كوتەرمەگەندە، قانداستارىمىزدىڭ تاعدىرى نە بولارىن كىم ءبىلسىن»، – دەگەن تۇسىنان جۇرگىزۋشى راديو داۋىسىن باسەڭدەتىپ:

– ءيا-ا-ا، – دەپ بۇعان نازار سالدى. ال مۇنىڭ ساياساتقا زاۋقى جوق. اڭگىمەنىڭ وربىمەسىن تۇسىنگەن جۇرگىزۋشى راديو ارنالارىن اۋىستىرىپ وتىرىپ ورىس راديوسىنا توقتادى. ارعى جاقتان ميحايل ەفرەموۆتىڭ وقۋىنداعى گەننادي شپاليكوۆتىڭ ولەڭى باستالدى.

پو نەسچاستيۋ يلي ك سچاستيۋ،

يستينا پروستا:

نيكوگدا نە ۆوزۆراششايسيا

ۆ پرەجنيە مەستا...

دىتتەگەن جەرىندە اراي كۇتىپ تۇر ەكەن، ماشينەدەن تۇسە سالا:

– ءجۇر، – دەپ دەدەكتەتىپ دۇكەنگە الىپ كىردى. – نە ىشەسىڭ؟

– نە ىشكەنى قالاي؟

– مەنى نەگە ىزدەمەيدى دەسەم، قويىپ كەتىپ پە ەدىڭ؟

– جوعا!

– ءبىر 5 جۇلدىزدى كونياك. شوكالاد جانە كوفە، – دەدى دە بەكبولعا بۇرىلىپ: – مۇمكىن بالاۋىز شام الارمىز.

– قاجەتى قانشا؟ جاقىن ماڭدا ءدارىحانا جوق پا ەدى؟

– اۋىرىپ تۇرسىڭ با؟ – دەپ اراي قۋاقىلانا كۇلىپ، لەزدە كۇلكىسىن جيىپ الدى. – ءبىز كاميلانىڭ ماسەلەسى جونىندە سويلەسەمىز.

قىز بەن جىگىت اراسىنداعى بوتەلكەنىڭ ماقساتى بىرەۋ عانا. يىعىنا بەس جۇلدىز قاداعان بۇل دا سول ءىسىن ادال اتقاردى. ءتۇبى كورىنبەي جاتىپ اراي بەكبولدىڭ تىزەسىندە وتىرعان. وسى ساتتەن كەيىن ۇستەل ۇستىندەگى بوتەلكەگە ەشكىم نازار اۋدارعان جوق. بەكبولدىڭ ساناسىنداعى ءدارىحاناعا سوقپاعانى قىزدىڭ ىستىق دەمى شارپىعاندا سوڭعى رەت جارق ەتتى دە جوق بولدى.

***

– اللو! بەكبول قالايسىڭ؟

– جاقسى.

– ارايمىن عوي. كاميلا نە ىستەدى؟

– ەشتەڭە. سول كۇيى قالدى.

– نەگە حابارلاسپادىڭ؟ ءبىر جاعىنا شىعىساتىن ەدىك.

– ءجا، قاجەتى جوق. ەندى كەش، – دەدى بەكبول كوڭىلسىز.

– جوق كەش ەمەس. سەن ءقازىر ءبىزدىڭ ۇيگە كەلسەڭشى. اقىلداسايىق.

بەكبول ەكى ۇشتى ويدىڭ قۇيرىعىنىڭ قايسىسىن ۇستارىن بىلمەي وتىردى دا:

– قاجەتى جوق. وتكەن ءىس ءوتتى. كوڭىلىڭە راقمەت! – دەپ ارايدىڭ جاۋابىن كۇتپەستەن تەلەفون ەكرانىن نۇقىپ قالدى. كاميلانىڭ كەتكەنىنە ءۇش ساعاتتان اسىپ كەتكەن ەكەن. كرەسلودان تۇردى دا، نە ءۇشىن بەل جازعانىن ۇمىتىپ اڭتارىلىپ ءبىراز تۇرىپ، ەسكى كۋرتكاسىنىڭ قالتاسىن اقتاردى. جوق. كوستيۋمدەرىنىڭ قالتاسىنان دا تابىلمادى. بەتىن مۇزداي سۋمەن شايىپ، سەبەپسىز توڭازىتقىشتى اشتى. ءۇيدىڭ ءىشى سونشا كۇڭگىرت. لامپاسى كۇيىپ كەتپەدى مە دەپ ليۋستراعا قاراعان. ۇشەۋى تۇگەل جانىپ تۇر. كەڭ ءبىر بولمە مەن ءتورت ادام بەيمارال سياتىن اسحانانى ارلى-بەرلى كەزىپ ءجۇرىپ الدى. بالكونعا شىعىپ، جەردە جاتقان قوراپ ىشىنەن ءبىر تالىن تاۋىپ العاندا قۋانعانىن كورسەڭ. تۇتاتاردىڭ الدىندا ءوز تاۋەلدىلىگىنە جىنى كەلىپ، لاقتىرىپ تا جىبەرگىسى كەلدى. اتتەڭ، تۇتاتىپ قويعان ەدى. كوشەدەن ماشينەلەر اعىلىپ جاتىر. انە، سۇرعىلت ءتۇستى Opel ءوتىپ بارادى. بۇل ماشينەلەردىڭ ەسكىرگەنى سونشا يەسى جۋعا دا ەرىنەدى-اۋ. جولدىڭ ارعى بەتىنە Land cruiser كەلىپ توقتادى. كوزىنە تانىس. ۋنيۆەرسيتەتتىڭ اۆتوتۇراعىنان كورگەن بولسا كەرەك. جول جيەگىنە ىڭعايلانىپ توقتاماعانىنا قاراعاندا ءقازىر ءجۇرىپ كەتۋى ءتيىس. بۇل شىلىمىنىڭ سوڭعى تارتىمىن ىشىنە جۇتقاندا بارىپ، كولىك ەسىگى اشىلىپ كاميلا ءتۇستى. باعىتى – ءدارىحانا. Land cruiser ءجۇرىپ كەتە مە دەپ ەدى، جوق، جول جيەگىنە شىعىپ ابدەن وڭتايلانىپ تۇرىپ الدى.

– راس بولعانى ما؟ – دەپ ويلاۋى سول ەكەن، جان ۇشىرا سىرتقى ەسىككە بەتتەدى.

***

تاڭەرتەڭگى ارايدىڭ ءسۇت قاتقان شايىنا دا قاراماي ۇيىنە جەتۋگە اسىقتى. جۇرەگى اتقاقتاپ كەلەدى. ەسىكتەن كىرە سىرتىندا جيرافتاردىڭ سۋرەتى بەينەلەنگەن «ساۆاننا» پاكەتىنە تولتىرىلعان بوتەلكەلەرگە ءسۇرىنىپ قۇلاي جازدادى. ءىشى تولعان سىرا. ەشبىرى اشىلماعان. بولمەدەگى ۇستەل ۇستىندە تۇگەسىلگەن ۆينو مەن ورتالاپ قانا ىشىلگەن ءبىر بوتەلكە سىرا تۇر. تەرەزەنىڭ الدىندا بۇل شەكپەيتىن Winston. ەكەۋى بىرگە جاتاتىن كەزدەگىدەي ەتىپ قوس توسەك سالىنعان. ونىڭ ءبىر بۇرىشىندا كاميلا. كرەسلوعا سىلق ەتىپ وتىرا كەتتى. توبەسىنەن جاي تۇسكەن سەكىلدى. وزەگى ورتەنىپ بارادى. كاميلا كورپەسىنەن باسىن شىعاردى دا:

– ەرتەڭ سوڭعى ەمتيحاننان كەيىن اۋىلعا قايتام. مامامدى ساعىندىم. پاپامدى... اۋىلداعى ۇلكەن ءۇيدىڭ وت جاعىلاتىن جالعىز بولمەسىندەگى پەشتىڭ تۇبىندە وتىرعان شىعار ەكەۋى! – دەپ جىلاپ قويا بەردى. قىسىلىپ باستالعان جىلاۋى وكپەسى كەپكەن وكسىككە اينالدى. ۇرتىن تولتىرا بوتا سەكىلدى بوزداپ تا الادى...

***

شاشىن قىسقارتسا دا شالقالاپ قايىراتىن ادەتى قالماعان بەكبول ارقاسىنداعى قابىرعاعا باسىن سوعىپ الدى. كاميلا ەكى يىعى دىرىلدەپ، الاقانىمەن اۋزىن جابا ۇزاق كۇلدى.

– كامي! ادەت قوي ەندى.

– كەشە اناۋ تەكسەرۋشىنى توقتاتۋ ءۇشىن ارتىمنان جۇگىرىپ كەلە جاتتىڭ عوي. سول كەزدەگى جەلپىلدەگەن شاشىڭ كوز الدىمنان كەتپەيدى.

– وندا نەگە قيدىردىق؟

– سەن ءارقاشان جۇگىرىپ جۇرمەيسىڭ عوي.

– سونداي ساتتە مەنىڭ شاشىم تۋرالى ويلاپ ۇلگەردىڭ بە؟

– مەنىڭ ايەل زاتىنان ەكەنىمدى ۇمىتىپ كەتەسىڭ كوپ كەزدە.

– ەمتيحاننىڭ جاۋاپتارىن ءدال سولاي ەستە ساقتاۋعا بولماي ما؟

– ول جاۋاپتاردىڭ سەنىمەن قاتىسى جوق قوي، – دەپ كاميلا بەكبولعا كوزىنىڭ استىمەن قارادى. بىردەڭە ايتۋعا وقتالعانداي ىڭعايلانىپ وتىردى دا:

– بەك! مەن ءبىر جارىم ايداي اۋىلدا بولسام، مۇنداعى جۇمىستارىمدى ساعان سەنىپ قالدىرا بەرەيىن بە؟

– ارينە!

– ءبىراق، قورقامىن!

– نەدەن؟

– سەن جاۋاپسىزداۋسىڭ عوي! كەشەگى مەنىڭ ارتىمنان جۇگىرىپ شىققانىڭنىڭ ءوزى وتباسىلىق ماسەلەلەرگە جاۋاپسىزدىعىڭ سەكىلدى.

– سەنى قالاي جاۋتەڭدەتىپ، ەر ادامنىڭ الدىندا جىلاتىپ قويامىن؟

– اكەمدەي ادامنىڭ الدىندا جىلاعاننىڭ نەسى ايىپ؟

– ەگەر ارتىڭنان جۇگىرىپ شىقپاسام وسىلاي وتىرار ما ەدىك؟

– بىلمەيمىن. ساتتىك ەموتسيا مەن ونىڭ سالدارى ەكى بولەك دۇنيە عوي.

– قويشى! ءبارى جاقسى بولادى، – دەپ بەكبول كاميلانى باۋىرىنا باسىپ قۇشاقتاپ، ماڭدايىنان يىسكەدى.

– ىلايىم، سولاي بولسىن! ەرتەڭ شىعىپ كەتەيىن وندا اۋىلعا.

– ءوزىم شىعارىپ سالام عوي!

***

ول سىرت كيىمسىز ەنتىگىپ جولعا شىققاندا Land cruiser ءجۇرىپ كەتكەن ەدى. الاقتاپ جان-جاعىنا قارادى. ەشكىم كورىنبەيدى. بۇكىل دەنەسىنىڭ ىستىعى بەتىنە شاپشىعانداي بولدى دا، كوزىنەن جىلى بوپ باستالىپ، يەگىنە قاراي مۇزداپ جىلجىپ جەرگە تامدى. الاقانىمەن بەتىن ۋقالاپ ەدى، جىلاپ تۇر ەكەن. وكسىگىن تەجەگىسى كەلگەن جوق. سۋعا سالعان قام كىرپىشتەي بۇكىل كەۋدەسى شىم-شىم ەرىپ بارا جاتتى.

– بەكبول!

تانىس ۇنگە لەزدە جالت قاراعان ول اق پالتولى قىزدى باس سالىپ قۇشاقتاي العان. وكسىگىن باسا الماي سولىقتاپ كەپ جىلادى.

– نەگە جەلەڭ ءجۇرسىڭ؟ ءجۇر، ۇيگە كىرەيىك، – دەپ قولىنداعى ساقىرلاعان سىرا تولى «ساۆاننا» پاكەتىن مۇنىڭ قولىنا ۇستاتا سالدى. – ايتپاقشى، سەن نە شەگەتىن ەدىڭ؟ Winston بولا ما؟

– بولادى، بولادى.

كاميلا وزىنە ءبىر بوتەلكە ۆينو، بەكبولعا ون بوتەلكە سىرا العان ەكەن. باعانا ۇيدەن شىققان قىزعا ۇقسامايدى. كاميلانىڭ جارقىن سويلەپ وتىرعانىنا قۋانعاننان گورى، تاڭدانىسى باسىم. ال ول ءسوزىن تاۋىسىپ بىتەر ەمەس.

– وسى تاكسي بولىپ جۇرگەندەردى تۇسىنبەيمىن! كەلىسكەن باعاڭنىڭ ۇستىنەن تاعى پايدا كورگىسى كەلىپ تۇراتىن نە ادەت؟ «قايتارىم جوق»، – دەپ. دجيپىنە مىنسەڭ دە سول، قاراپايىمىنا مىنسەڭ دە سول. ءدارىحاناداعىعى اپكەگە راقمەت، سوزگە كەلمەي مايدالاپ بەرە سالدى.

– ...

– بەك! مەن ەرتەڭ اۋىلعا قايتامىن. شىعارىپ سالاسىڭ عوي، ءيا؟

بەكبول «بەك» دەگەن ەركەلەتۋىن كاميلانىڭ اۋزىنان قايتا ەستىگەنىنە جانى بۇرلەپ كەتكەن ەدى.

– ءيا. شىعارىپ سالامىن!

***

ساقىرلاعان بوتەلكەلەردى توڭازىتقىشقا بەيبەرەكەت سالدى دا، كاميلانىڭ جيناپ قويعان سومكەلەرىن سىرتقا الىپ شىعىپ كەتتى. ەكەۋى دە ءبىر، ايدالاداعى مولا دا ءبىر. ءلام دەپ ءتىل قاتىسپادى. اۆتوبۋس جۇرەردە عانا كاميلا:

– ماعان ەشتەڭە ايتقىڭ كەلمەي مە؟ – دەگەن.

بەكبول ايتقىسى ەمەس، سۇراعىسى كەلدى. ءبىراق باتىلى بارمادى. ءتىپتى ونى ويلاعىسى كەلگەن جوق. اۋزىنا تۇسكەنى:

– جولىڭ بولسىن! اۋىلداعىلارعا سالەم دە! – بولدى دا، قول بۇلعاپ قالا بەردى.

كوزى مولتىلدەپ اۆتوبۋستا بىرەۋى كەتتى. كوزىندەگى مولدىرلىگى ىزاعا اينالىپ ۆوكزالدا بىرەۋى قالدى.

***

قيدىرىپ تاستاعان شاشىن سىلكىپ قايىرامىن دەپ كاميلاعا تاعى كۇلكى بولعان بەكبول اۆتوبۋس قوزعالا سالىسىمەن ارزانداۋ پاتەر ىزدەۋگە كىرىستى. كاميلا دا، ءوزى دە ەندى ستيپەنديا المايدى. اي سوڭىندا سوعان سەنگەن دۇنيەلەر بار ەدى جانە الداعى ايعا دا وسى ستيپەندياعا جوسپارلار بار-تىن. اعاسى ايتۋشى ەدى: «قولىڭا تۇسپەگەن اقشا – سەنىڭ اقشاڭ ەمەس»، – دەپ.

پاتەر جىلدام تابىلدى جانە قىزىعى، ءدال ءوزى تۇراتىن ۇيگە قاراما-قارسى ءۇيدىڭ ءتورتىنشى قاباتىنان. تارلاۋ، ارينە. ءىشى دە كەرەمەت ەمەس. ءبىراق، تازا. حابارلاسىپ ەدى، پاتەر يەسى ورىس كەمپىر:

– ءبىر ايدان كەيىن بوسايدى، – دەدى قارلىعىڭقى داۋىسپەن.

– ءقازىر كەلىسىپ قويساق بولماس پا، اپا؟

– بولادى. ءبىراق ماعان بالالارى جوق وتباسىلى ادامدار كەرەك.

– جاس وتباسىمىز! – دەپ ەدى، كەمپىر ءازىلقوي ەكەن:

– وندا توعىز ايدان كەيىن باسقا پاتەر ىزدەيسىڭدەر، – دەيدى. الدىن-الا پاتەردىڭ از كولەمدە اقشاسىن تولەپ كەلىسىسىمەن، ءوزى تۇرىپ جاتقان پاتەر يەسىنە قارا اسپاندى ءتوندىرىپ حابارلاستى. ەرتەسىنە ءۇيدى بوساتىپ، جىگىتتەردىڭ پاتەرىنە سەگىزىنشى جىگىت بولىپ كوشىپ بارعان. ارتىلعان اقشانىڭ بارلىعىن ورىن-ورىنىمەن جۇمسادى. ەندى قالعانى كاميلاعا ەستىرتۋ عانا.

***

بەكبول توڭازىتقىشتاعى بوتەلكەلەردى كۇندە بىرتىندەپ بوساتا بەردى. قوسىمشا جۇمىستار شىقسا جىلدام بىتىرۋگە تىرىسىپ، كەيدە ءتۇن بالاسى كوز ىلمەيتىن. اقشاسى ارزىمايدى، ءبىراق. سوندا دا ىستەيدى. قولى قىشىعاننان ەمەس، كاميلانىڭ ءىسىن ويلاعىسى كەلمەگەننەن. سەنەيىن دەسە، كاميلانىڭ ارىن قيمايدى، سەنبەيىن دەسە، ىشىلگەن ۆينو، سىرا، بۇل شەكپەيتىن Winston، ەكەۋگە ارنالعان توسەك. كەي تۇندەرى ءوز-وزىن جۇلىپ جەپ قويا جازدايدى. اراي شە؟ نەگە بۇل وزگەنىڭ عانا كۇيەسىن كورەدى؟ ونى دا ويلاعىسى كەلمەيدى. كەيدە ء«بىرىنشى باستادى» دەپ باقاي ەسەپكە دە كەتەتىنى بار. ءبىراق ول ماڭىزدى ما؟ قالاي بولعاندا دا لاستانعان دۇنيە لاستاندى ەمەس پە؟

وسىلاي ءيىنى سالبىراپ بولىپ جۇرگەندە ارايدان حابارلاما ءتۇستى: «مەنىكى كەشىگىپ جاتقان سياقتى. كەزدەسەيىكشى».

وسى حابارلامانى العان كەزدە بەكبول ءوز-وزىن تاستاي سالدى. وعان دۇنيە بىتكەن مانسىزدىككە اينالدى. قۇر سۇلدەرىن عانا سۇيرەتىپ ارايدىڭ پاتەرىنىڭ الدىنا قالاي بارعانىن سەزگەن جوق. ال، اراي ەسىكتى جىمسيا كۇلىپ اشتى دا سارناي جونەلدى:

– بەكبول، الدىرمايمىن دەپ شەشتىم. ەندى مەنىڭ ءىشىم بىلىنبەي تۇرعاندا ەرتەرەك ۇيلەنۋىمىز كەرەك. ايتپەسە، ەكى جاقتان دا ۇيات بولادى.

– ەكى جاقتان دا؟ مەنەن ۇيات ەمەس پە؟

– سەنەن نەسىنە ۇيالام؟ قىزدىق ار-ۇياتىمسىز كەلگەنىمە مە؟

– ول دا مۇمكىن.

– بالا ءبىرىنشى اياق ارتقاندىكى ەمەس.

– سوڭعىسىنىكى دە ەمەس شىعار.

– ايدىڭ 5-10 ارالىعىندا كەلەتىن. مىنە بۇگىن 15-نە اۋىپ بارادى. قاسقالداقتىڭ قانىنداي بولسىن كەلسەشى...

بەكبولدىڭ ارى قاراي تىڭداۋعا شاماسى كەلمەدى:

– جارايدى. ء18-ى كۇنى بىرگە دارىگەرگە بارىپ قارالايىق.

– ولار العاشقى 4 اپتادا تولىق انىقتاي المايدى.

– ولار انىقتاي المايتىن دۇنيەنى سەن استىڭا قاراپ انىقتاپ وتىرسىڭ با؟ – دەپ بەكبول قالشىلداپ كەتتى. – ونىڭ ۇستىنە ءتورت اپتا ەمەس، ءبىر جارىم اي ءوتتى ەمەس پە؟

– ءااا، ءيا، ءيا. ء18-ى كۇنى بارايىق. بارايىق. بۇگىن قونىپ كەتەتىن شىعارسىڭ. انەل ۇيدە جوق. ءبىر اپتاعا ءىسساپارعا كەتكەن.

– جوق. ۇيگە بارامىن. – بەكبول ۇيدەن شىعىپ بارا جاتىپ: – ء18-ى كۇنى تاڭەرتەڭ دايىن وتىر، – دەپ ەسىكتى تارس جاپتى.

***

18-ى كۇنى تاڭەرتەڭ اراي بەكبولعا قارلىعىڭقى داۋىسپەن حابارلاسىپ، اۋرۋحاناعا بارا المايتىنىن ەسكەرتكەن. ال ەرتەسى كۇنى كاميلادان حابارلاما الدى. «20 اقپان. ءبىرىنشى ۆوكزال. ساعات تاڭعى 8:00. 9-ۆاگون. 1-ورىن».

بۇگىن 19-نان 20-سىنا اۋىسىپ بارادى. بەكبول ساندالىپ كوشەدە ءجۇر. ءجاي جۇرگەن جوق. كاميلانىڭ ءوزىن كۇتسە، ارايدىڭ «قوناعىن» كۇتىپ ءجۇر. ءبىراق سول ەكىنشىسىنىڭ كەلۋ-كەلمەۋى نەعايبىل. بار ىستەگەن كۇناسىن موينىمەن كوتەرۋگە بار. ءبىراق قايسىسىن كوتەرگەن جەڭىل؟ ءۇش جىلدان كەيىن كورىپ، جالعىز رەت جانىنا تۇنەپ، جاتىرىنا جان بىتىرگەن ارعى جاعى بۇلىڭعىر ارايدىڭ با؟ جوق الدە، جەتى جىل ءجۇرىپ، كەشە عانا سەنىمىنە سەلكەۋ تۇسىرگەن كاميلانىڭ با؟

تاڭعى ساعات بەس جارىمداردىڭ كەزىندە ويى ەكىگە جارىلدى.

قولىن بۇلعاپ كولىك توقتاتتى دا، ۇيقىسىراپ وتىرعان جۇرگىزۋشىگە قاراپ:

– شامالعان ستانتسياسى. بەس مىڭ، – دەگەندە جۇرگىزۋشى كەلىسە كەتتى.

– تاڭ اتپاي ول جاقتا نە جوعالتتىڭ؟

– جۇمىس قوي.

– نان تابۋ وڭاي ەمەس. مەن ءومىر بويى اۆتوبۋس ايداعانمىن...

ارى قاراي ەستىگەن جوق. قۇلاعىنا قۇلاققابىن كيىپ، مۋزىكانىڭ داۋىسىن بارىنشا شىعاردى. ايەل گرەك تىلىندە ءان شىرقايدى. «پويىز تاڭعى ساعات سەگىزدە كەلەدى». ءاننىڭ قايىرماسىندا قايتالاناتىن ءسوز وسى. ساعات 6:30-دا شامالعان ستانتسياسىنا جەتكەن بەكبول رەلستىڭ ورتاسىنا ءتۇسىپ الىپ الماتىعا قاراي جۇرە بەردى. قۇلاعىنداعى مۋزىكادان باسقا ەشبىر ءۇن ەستىلمەيدى. 7:16-دا بەكبولدىڭ قۇلاعىنداعى ءان تىندى. ءبىراق ءدال وسى پويىزدىڭ 9 ۆاگونىنىڭ 1-ورىنىنداعى قىز قۇلاعىندا بۇل ءان الماتىعا جەتكەنشە قايتالانادى.

***

تاڭعى ساعات بەس جارىمداردىڭ كەزىندە ويى ەكىگە جارىلدى.

قولىن بۇلعاپ كولىك توقتاتتى دا ۇيقىسىراپ وتىرعان جۇرگىزۋشىگە قاراپ:

– بايتۇرسىنوۆ پەن قۇرمانعازى كوشەلەرىنىڭ قيىلىسى. بەس ءجۇز، – دەدى.

ۇيىنىڭ سىرتىنان قاراپ ەدى، تەرەزەسىندە جارىق جوق ەكەن. بەتىن سيپاعان سايىن الاقانىن تىرناعان ساقالىن الۋعا دۇكەننەن ۇستارا ساتىپ الىپ، ورىنىنا قايتىپ كەلگەندە ءتورتىنشى قاباتتىڭ تەرەزەسىنىڭ جارقىراپ تۇرعانىن بايقادى.

ورتاڭعى ساۋساعىن بۇگىڭكىرەپ اقىرىن قاققان ەسىكتىڭ ارتىنان تانىس داۋىس ەستىلدى:

– كىم بۇل؟

– مەن، بەكبول.

– زارەمدى الدىڭ عوي، – دەپ اراي ۇرەيلەنە ەسىكتى اشتى: – قايدان ءجۇرسىڭ؟

– ساعىنعان شىعارمىن...

– ء«ۇف» دەشى قانە.

– شايىڭدى دايىنداساڭشى، – دەپ نىعىرلاي سويلەگەنىنەن بەكبولدىڭ ساپ-ساۋ ەكەنىن انىق بايقاعان اراي اسحاناعا جۇگىرىپ كەتتى.

بەكبول ۇزاق جۋىندى. «كوسە» دەگەن اتتان ادا قىلعاننان ارتىق اتاعى جوق سيرەك ساقالىن تازالاپ الىپ، ساماي شاشىنا دەيىن ۇستاراسىن وڭدى-سولدى سالا بەردى. بەتىن تازالاپ جۋىپ، قوقىس شەلەگىنە ەڭكەيمەي پەدالىن باسقان ساتتە ۇستارانى تاستاي سالامىن دەپ ويلاعان. ءبىراق قوقىس شەلەگىنىڭ اۋزى اشىلعاندا نە قۋانارىن، نە قايعىرارىن بىلمەي قالدى. ۆاننادان تەڭسەتىلە شىققان ول اسحانا ەسىگىنىڭ جاقتاۋىنا سۇيەنىپ تۇرىپ:

– ۇيگە كىم كەلگەن؟ – دەپ سۇرادى.

– كىم كەلگەنى نەسى؟ انەل ءىسساپاردان ەرتەڭ كەلەدى. نەمەنە قىزعانا باستادىڭ با؟

– قىزعانىپ ەمەس، قىزىل كورگەن بۇقاداي بوپ تۇرعانىم بار.

– بۇقاداي؟.. – قۋاقىلانا تاعى كۇلىپ جاقىنداي بەرگەندە بەكبول ارايدىڭ القىمىنان الا ءتۇستى:

– الداعىڭ كەلسە ارتىڭدى تازالاپ ءجۇرىپ الداعايسىڭ. ءتۇسىندىڭ بە؟ – دەپ يتەرىپ جىبەرگەن.

– بەكبول! كەشە عانا كەلدى. تۇسىنەسىڭ بە؟ بىلمەيمىن قالاي بولعانىن. شىن ايتام...

بەكبول ساعاتىنا قارادى. 7:45. ەندى ۇلگەرىپ جەتە الماسىن دا، ۇلبىرەگەن جانىن جۇباتا الماسىن دا سەزدى. سەزدى دە سول ەسىكتىڭ جاقتاۋىنا ارقاسىن تىرەي وتىرا كەتتى.

***

– قۇرمەتتى جاس جۇبايلار، مىنا جەرگە قول قويىڭىزدار! سونىمەن، بەكبول رىسقۇلبەك جانە كاميلا نۇرتاي. سىزدەردى زاڭدى نەكەلەرىڭىزبەن شىن جۇرەكتەن قۇتتىقتايمىن! باقىتتى بولىڭىزدار! نەكە كۋالىكتەرىن تاپسىرۋ ءراسىمى 25 ناۋرىزدا وتەدى.

– راقمەت سىزدەرگە! راقمەت! – دەپ بەكبول مەن كاميلا كەزەك-كەزەك العىستارىن جاۋدىرىپ نەكە سارايىنان شىعىپ بارا جاتتى.

بەكبول قالتاسىنان شىلىمىن الىپ جاتىپ:

– جۇرە بەرمەي، زاڭدى نەكەگە تۇرىپ العانىمىز دا دۇرىس بولدى.

– ءيا. توي كەزىندە سابىلىپ كەتەمىز! ءبىر ءىس بولسا دا تىندىرىپ قويدىق، – دەپ سۇر پيدجاگىنىڭ ىشكى قالتالارىن اقتارىپ تۇرعان كاميلانىڭ: – و، مىنانى قارا، – دەگەن قۋانىشتى ءۇنى ەستىلدى.

– بۇل نە؟

– ەسىڭدە مە، الدىندا ەمتيحان كەزىندە قىزىل پيدجاگىمدى كيىپ، سۇر پيدجاكتىڭ قالتاسىندا شپورگالكالارىم قالىپ كەتىپ ەدى عوي.

– ءيا.

– ءتۇ-ۋ. سول ەمتيحان كۇنى وسى سۇردى كيۋىم كەرەك ەدى. جالعىز سول ساباعىم عانا ءتورت بولىپ، جوعارى ستيپەندياعا ىلىگە الماي قالىپ ەم. شپورگالكام بولعاندا... – دەپ كاميلا ستيپەنديا ۇستىنەن قوسىلاتىن ونشاقتى مىڭدى ويلاپ كەتتى.

***

كاميلانى اقپاننىڭ 20-ى كۇنى تاڭەرتەڭگى پويىزدان كۇتىپ الۋعا كەتىپ بارا جاتىپ ءوزىنىڭ ءدال وسى جەردە جىلاعانىن ەسىنە الىپ، ەزۋ تارتتى. قىزعانىش دەگەن قيىن عوي.

بەكبول كاميلانى ۇيگە اكەلىپ تاستادى دا، جىلدام جۇمىسقا كەتىپ، كەشتەۋ ورالعان. كەشكى استى ەكەۋى ۇزاق ءىشتى. ءتۇن ورتاسى اۋا سىبىرلاسىپ قانا سويلەسىپ جاتىپ كاميلا:

– بەك، – دەپ باستادى.

– اۋ؟

– الدىندا ەمتيحاننان شىققان كۇنى، سەن كوشەدە جىلاپ تۇردىڭ عوي.

– ەسىمدە جوق...

– ءتۇ-ۋ!.. نەگىزى سەنىڭ تاپسىرىپ شىققانىڭ دۇرىس بولدى. تەك... مەن ءوزىمدى قورعانسىز سەزىندىم. اناۋ رەكتوراتتاعى ءداۋقارىنىڭ كۇلكىسى باتىپ كەتتى. سەنەن باسقا سۇيەنەتىن ادامىمنىڭ بولماعانىنا، وزىمە جىنىم كەلدى.

– سول ءۇشىن ۇرىستىق پا؟

– بىلمەيمىن. قۋانىشىمدى دا، قايعىمدى دا كوتەرەتىن سەنسىڭ عوي. باسقا كىمىم بار؟ مۇمكىن، مەنىڭ بارلىق جاعىما سەن جەتپەيتىن شىعارسىڭ. فيزيكالىق تۇرعىدان ۇلگەرە المايتىن شىعارسىڭ. مۇمكىن، سودان اشۋعا بەرىلەرمىن. ءبىراق، قالاي بولعاندا دا سەن مەنىڭ تاعدىرىم سەكىلدىسىڭ.

– تاعدىر دەگەن ءجاي عانا ءومىر ەمەس پە؟ – دەپ بەكبول تەمەكىسىن الىپ بالكونعا بەتتەدى.

***

كاميلا ءوزى جوقتا بەكبول كوشىپ العان پاتەردە ءبىرىنشى رەت جاستىققا باسى ءتيدى. جىگىتىنىڭ قوينىنا كىرىپ العان. بەكبول قىزدىڭ شاشتارىن ساۋساقتارىمەن تاراعىشتاپ، اۋىق-اۋىق يىسكەپ قويادى.

– ءۇي شىنىمەن جاقسى ەكەن. تازا. جايلى.

– تابىلا كەتتى، ايتەۋىر.

– ءدال قارسىداعى بالكون ءبىز تۇرعان ءۇيدىڭ بالكونى عوي، ءا؟

– ءيا.

– كىم تۇرىپ جاتىر ەكەن ءقازىر؟

– بىلمەيمىن. ساتامىز دەگەندەي قىلدى عوي پاتەر يەسى.

– ا-ا-ا.

– ۇيدەگىلەرمەن سويلەستىم. «ەرتەرەك توي قامىنا كىرىسە بەرەيىك» دەيدى.

– بىزدىكىلەر دە، – دەدى كاميلا جىگىت قۇشاعىنان بوسانىپ جاتىپ. – جەتى جىلدا نە وزگەرمەدى. مەن كەتتىم. سەن كەلدىڭ. سەن كەتتىڭ، مەن كۇتتىم. ادامداردى بىر-بىرىنە سونشا ماتاپ تاستاعان تاعدىر دەگەن وسى ما سوندا؟!

– تاعدىر – تاڭداۋ عوي. الدىمىزدا مىڭ-ميلليون جولدار بار. ءتىپتى، ءبىزدىڭ سانامىزدا كۇندەلىكتى قانشا تاڭداۋ تۋىندايدى – سىزىلعان سونشا جولىمىز بار سەكىلدى. ولاردىڭ بىر-بىرىمەن قيىلىسۋى قاجەت ەمەس. كۆانت سەكىلدى. ءبىر ساتتە بىرنەشە جەردە بولا الادى.

– تۇسىنىكتى تىلگە اۋداراسىڭ با؟

– مىسالى، مەنىڭ قۇداي جازعان جاستايىمنان سپورتقا بەيىم تاعدىرىم بولۋى مۇمكىن. ءبىراق مەن ونى تاڭداعان جوقپىن. مۇمكىن، قۇداي جازعان تاعدىرىمنىڭ كەيبىر تارماقتارىندا مەن مۇلدە باسقا ادام شىعارمىن. ءتىپتى، مەنىڭ قاسىمدا سەن ەمەس، باسقا قىز شىعار.

– سوندا ءتاڭىر ءبىزدى ءبىر-بىرىمىز ءۇشىن عانا جاراتپاعان با؟

– ارعى جاققا تەرەڭدەۋ مەن ءۇشىن اۋىرلاۋ بولادى، كامي! كۆانتتىق فيزيكا مەن ادام تاعدىرى تۋراسىندا جەتكەن جەتىستىكتەرىم ازىرشە وسى عانا، – دەپ بەكبول تەرەزە الدىنداعى شىلىمىن الىپ بالكونعا شىققاندا قاراما-قارسى بۇرىن ءوزى تۇرعان ءۇيدىڭ بالكونىنان دا ءوزىنىڭ شىعىپ كەلە جاتقانىن اڭداپ، توسىلىپ قالعان. ءبىراق، قايتا انىقتاپ قاراعان كەزدە بالكوندا جايىلىپ تۇرعان كيىمدەردەن باسقا ەشتەڭە تاپپادى. ساناسى تۇماندانىپ، دەجاۆيۋ تۋرالى ويلاپ تۇر.



ماتەريالدى كوشىرىپ جاريالاۋ ءۇشىن رەداكتسيانىڭ نەمەسە اۆتوردىڭ جازباشا، اۋىزشا رۇقساتى قاجەت جانە Adebiportal.kz پورتالىنا گيپەرسىلتەمە بەرىلۋى ءتيىس. اۆتورلىق قۇقىق ساقتالماعان جاعدايدا قر اۆتورلىق قۇقىق جانە ساباقتاس قۇقىقتار تۋرالى زاڭىمەن قورعالادى. Adebiportal@gmail.com 8(7172) 79 82 12 (ىشكى – 112)

ماقالا اۆتورىنىڭ كوزقاراسى رەداكتسيانىڭ كوزقاراسىن بىلدىرمەيدى.


(0)



كەلۋ قاينارى: http://www.elarna.net/koru.php?tur=30&id=1010985

پىكىرلەر:


جازعان لەبىزىڭىز300 ارىپتەن اسپاسىن!
ادام نەمەسە ۋيروس ەكەندىگىڭىزدى تۇراقتاندىرۋ سۇراعى، كاتەكشەگە ءجۇز دەپ سيفىرمەن جازىڭىز، راحىمەت!

ەڭ جاڭا ماقالالار


چتو ۆوزميوت س سوبوي ۆ ك 6 مينوت
تەننيس: دەنيس ەۆسەەۆ نۇ 6 مينوت
17 شىلدە، سارسەنبىگە ار 7 مينوت
وسى ارانى باسىپ كورىڭىز 7 مينوت
ەلوردا ارىستاعى ۇيلەردى 16 مينوت
جەلىدە يراكتاعى مۇناي ت 17 مينوت
كاپيتان سبورنوي انگلي: 21 مينوت
سالىققا سالعىرت وڭىرلەر 24 مينوت
ەلىمىزدىڭ ەڭ ۇزدىك پولي 26 مينوت
ەرمەك مارجىقپاەۆ: ءومىر 26 مينوت
ەستافەتا: گۇلشارا ءابدى 27 مينوت
الماتى وبلىسىنىڭ العابا 27 مينوت
قازاقستاندا 17 شىلدەدە 1 ساعات
Nur Otan كوپ بالالى انا 1 ساعات
الماتى اكىمى «باقىتتى و 1 ساعات
40 مىڭ ادامنىڭ سالىق اي 1 ساعات
اكىمدەر وبلىس ورتالىقتا 1 ساعات
ينفاركت العان كاسيلياس 1 ساعات
شي جينپيڭ ىشكى موڭعۇلدا 1 ساعات
قحا مەن قولجازبالار جان 1 ساعات
ۆ افريكە كازاحستانتسى ۋ 1 ساعات
قحا ەلىمىزدىڭ سيرەك كىت 1 ساعات
نۇر-سۇلتاننان شانحاي مە 1 ساعات
وسى ارانى باسىپ كورىڭىز 1 ساعات
جارتى جىلدا 850 ادام كو 1 ساعات
ەرىكتىلەر قوزعالىسىن قو 1 ساعات
ەرمەك مارجىقپاەۆ: ءومىر 1 ساعات
پارتيا مەن ۇكىمەتتىڭ نە 1 ساعات
بريتاندىق دارىگەرلەر سي 1 ساعات
الاكول جاعاسىندا اقىندا 1 ساعات