ەل-ارنا قولفون نۇسقاسىنا ەنۋ Еларна қолфон нұсқасына ену


ەل-ارنا قولفون نۇسقاسى | "قولفون نۇسقاسىن ءتۇسىرۋ (Android)

Кірілше
جۇكتەۋ-البومىم-البومدار-جەلى
وسى توردى ساقتايمىن! | وسى توردى باس بەت ەتەمىن!

ءبىزدىڭ بايلانىس: elarna2012@gmail.com

Үш күнгы келушылер санағыКелген адам саны (IP)Көрілген бет саны (PWs)КомпйутерҚолфон
2019-08-18525278840 %60 %
2019-08-19580345151 %49 %
2019-08-20418207263 %37 %


تىركەلىڭىزدەر كىتاپحانا قوجالار تورابى البومدار قازاقتىڭ 1001 ەرتەگىسى

::::ماشحۋر ءجۋسىپ كوپەيۋلى. ەرتەگىلەر ::ەرتەگىلەر

كىتاپحاناعا قايتۋ

ەرتەگىلەر -> ەر توستىك
اپتورى: ءماشھۇر ءجۇسىپ كوپەيۇلىەرتەگىلەر
ەرتەگىلەر - كورىلىم: (3447)


: PDF Download - Жұктеұ - Скачать - ءتۇسىرۋ

ەر توستىك

ەرتەدە ءبىر مۇتىشاق دەگەن باي بولىپتى. ونىڭ 8 ەركەك بالاسى بولىپتى. جىلقى مالى وتە كوپ بولىپ،جەرگە سىيمايتىن قالىڭ بولادى. ءبىر جىل قىس قاتتى، جىل اۋىر بولعاندىقتان، جىلقىنىڭ قونىسى باسقا الىس جەر، جات ەلدەرگە كەتەتىن بولعاندىقتان،سەگىز ۇل جىلقىمەن باسقا الىس جەرگە كەتەتىن بولىپ، اكە-شەشەسىنە سوعىمىنا ءۇش جىلعى قارا تۋ بيەنى سويىپ بەرىپ كەتىپتى. كەمپىر-شال قارا بيەنىڭ ەتىن ءۇش جىل وتەمگە جەتكىزىپ، ۇنەمدەپ جەيدى. قازى-قارتا، جال-جايالارىن ۇنەمدەپ جەپ تاۋىسىپ، ەڭ سوڭىندا قارا بيەنىڭ ءتوس ەتى قالادى.

مۇتىشاق باي بايبىشەسىنە ايتادى:

– وسى توستەن باسقا قارا بيەنىڭ ەتىنەن بالالارعا ارناپ ساقتاعان سىباعامىز جوق. وسى ءتوس ەتتى بالالارعا ارناپ ساقتايىق! - دەسە دە، بايبىشە ءتوس ەتكە قىزىعىپ، جەرىپ، سىپىرىپ-سيىرىپ جەپ قويىپتى.

سونان كەيىن ەركەك بالا تاۋىپ، اتىن توستىككە جەرىپ تاپقاندىقتان، ەر توستىك قويادى. بۇل بالا تۋعاننان-اق ەرەكشە ەر بالا بولىپ تۋادى. ءوزى قۇربى بالالاردان جاراتىلىسى كۇشتى، قۋاتى وزگەشە ارتىق بولىپ بالالار ويناپ ءجۇرىپ، ۇرىس-توبەلەس، جانجال بولاتىن بولسا، ەر توستىك بالالاردىڭ بىرەۋلەرىن باستان ۇرىپ، بىرەۋلەرىن كوتتەن تەۋىپ، بىرەۋلەرىن شالقاسىنان، بىرەۋلەرىن ەتپەتىنەن (ەكپەسىنەن) ءتۇسىرىپ، بىرەۋىنىڭ قاق شەكەسىن، بىرەۋىنىڭ مۇرنىن قاناتىپ، ەڭ بولماسا، اسىپ-ساسىڭقىراپ جىلدامداتاتىن بولسا، ەكى بالانى ەكى قولىمەن ۇستاپ الىپ، ەكەۋىنىڭ باسىن بىرىنە-بىرىن ءسۇزىستىرىپ ء[جۇرىپتى]. ەر توستىك بالانىڭ بۇل سياقتى مىنەزدەرىن كورگەن بالالار قىرعيدان بۇققان تورعايداي، بۇركىتتەن بۇققان قويانداي، قاسقىردان ۇرىككەن قويداي ۇركىپ جۇرەتىن بولىپتى. توستىك بالا وسى رەتپەن جۇرگەندە، ءبىر كۇنى ءبىر كەمپىردىڭ بالاسىن دا ۇرىپ سوعادى. كەمپىر توستىك بالاعا ۇرسىپ، ءتىلى ءتيىپ:

– بۇل شىركىن مەنىڭ بالامدى ساباپ، مەنى جىلاتىپ، ماعان ءالى جەتكەنشە، قاڭعىپ حابارسىز، جولسىز كەتكەن سەگىز اعاسىن تاۋىپ الساشى! - دەگەن سوزدەر ايتىپ، كەمپىردىڭ ءتىلى تيەدى. كەمپىردەن مىنا ءسوزدى ەستىگەن سوڭ، توستىك ۇيىنە، اكە-شەشەسىنە كەلىپ:

– مەنىڭ سەگىز اعام جوعالىپ كەتىپ پە ەدى؟! ولار قايدا، قاشان، قانداي؟ - دەپ، سۇراپ قىسقان سوڭ، اكە-شەشەسى شىداي الماي، ايتىپ قويىپ، سونان كەيىن توستىك بالا بەلىنە جۇگەن بايلاپ الىپ، 10 جىل جوعالىپ كەتكەن اعالارىن ىزدەپ جولعا تۇسەدى. بىرنەشە اي، جىلدار ارادا جۇرگەننەن كەيىن، سول ۋاقىتتىڭ ادەت-عۇرپى بويىنشا قۋانىش مەرەكە توي جاساپ جاتقان ءبىر جويقىن قالىڭ ەلگە كەز بولىپتى. توستىك تويعا كەلىپ، ارالاپ ءجۇرىپ كورسە، ءبىر ۋاقىتتاردا ەت جاساپ، تاباق تارتىپ، توي باسقارىپ جۇرگەن كىسىلەر ايتىسادى:

– مۇتىشاق بايدىڭ سەگىز سەرىسى كەلەدى، سولاردىڭ تاباعىن، كىرەتىن ءۇيىن دايىنداۋ كەرەك!-دەگەن سوزدەر ايتىسادى.

توستىك بالا بۇل ءسوزدى قۇلاعى ەستىپ، كوزى كورىپ، جۇرەگى قۋانىپ،ىزدەگەن جوعى تابىلعانداي كوڭىلىنە اجەپتاۋىر مەدەۋ بولادى. مۇنان كەيىن سەگىز سەرىنىڭ كەلىپ تۇسەتىن ءۇيىنىڭ ماڭايىن كۇتىپ تۇرادى. ءبىر مەزگىلدەردە كۇتىپ تۇرعان سەگىز سەرى مىرزالار كەلىپ ءتۇسىپ، شايىن ۇرتتاپ تامساپ، باستارىن شايقاپ، قىمىزدارىن ءىشىپ، ەتىن جەپ قۇسىپ، وزدەرىمەن وزدەرى ماس، باسقانىڭ ويىن-كۇلكى، دۋ-شۋىن كەرەك قىلماي:

– جىلقىعا جاۋ تيمەسە يگى ەدى! - دەپ، تويدىڭ ارتىنا قاراماي شۋ دەپ جونەلە بەرەدى. ويپاڭ جەرلەردەن ورعىتىپ، قىراڭ جەردەن قارعىتىپ، سايلى جەردەن سىرعىتىپ، جىلعالى جەردەن جىلجىتىپ، ايشىلىقتى التى اتتاپ، ايلىق جەرلەردە جاتقان جىلقىلارىنا كەلىپ، بۇلاردىڭ ارتىنان جاياۋمىن دەپ جالىقپاي، جالعىزبىن دەپ تارىقپاي، شاپقان اتتان قالىسپاي، توستىك بالا دا كەلىپ جەتەدى. باعانا اعالارى تويعا بارعاندا، توستىك بالا جولىعىپ جايىن ايتقاندا:

– ءبىزدىڭ سەن سياقتى قالعان ءىنىمىز جوق-تى. ايتقان ءسوزىڭنىڭ ءتىپتى ءدامى جوق-تى! - دەپ، بالانى بالاسىنىپ سويلەسپەي كوڭىلگە الىپ، كوزگە ىلمەي ءجۇرىپ كەتكەن بولاتىن. بالا:

– تانىماساڭ، تانىرسىڭ! شاڭىما ەرە الماي قالارسىڭ!.. [دەگەن].

مۇنان كەيىن سەگىز سەرى جىلقىعا كەلىپ جەتكەندە، توستىك بالا دا ارتتارىنان ىلەسە بىرگە كەلدى. جىلقىلارىن ارالاپ جۇرگەندە، بۇرىن باسقا جانداردىڭ قاراسىن كورگەندە، ماڭىنا دارىتپاي، قاراسىن كورسەتپەي كەتەتىن اساۋ تاعى جىلقىلار ەر توستىككە قاراي اينالىپ ورالىپ، جاقىنداپ، ايۋان دا بولسا، سەزىنىپ، الدارىنا ءيىلىپ، باستارىن ءيىپ شۇلعىپ، كوپ جىلقىدان باسقا ەرەكشە بولەك التى قۇلاش الا ايعىر، جەتى اياقتى جيرەن بيە باستارىن يزەپ، ەر توستىككە قۇرىقسىز قولعا ۇستاتىپ، ەرسىز ەركىندىكپەن مىنگىزىپ، ات بولا باستايدى. اعالارى ەر توستىكتىڭ مىنا سياقتى تاجىريبەلەرىن كورگەننەن كەيىن، تانىسىپ، ءبىلىسىپ، تۋىسقان بولىپ، ءبارى بىرلەسىپ ەلگە قاراتا جىلقىلارىن ايداۋعا بەت قويىپ، باياعى ەلدەن كەتكەندە، سەگىز ۇلعا اربىرەۋىنە ءبىر مىڭنان جىلقى تيگەن بولسا، جىلقىلاردىڭ وسكەندىگى سونداي،توعىزىنىڭ اربىرىنە توعىز مىڭنان - توقسان مىڭ جىلقى تيگەن بولادى. بۇلار امان-ەسەن جىلقىلارىن ايداپ، ەلىنە: اكە-شەشەسىنە كەلىپ قوسىلادى. توعىز ۇل توقسان مىڭدى توعىز قوس قىلىپ توڭكەرىپ، سونى باعۋدان-قاعۋدان باسقا جۇمىستارعا قولى تيمەي، سونىڭ الەگىمەن جۇرگەندە، وزدەرىنىڭ سول زاماندارىنداعى حالقىنىڭ قاراپ باعىنىپ تۇرعان حانى شىنعىشحان ەستىپ، مۇتىشاق بايدىڭ بايلىعىن، توعىز ۇلىن ەستىپ، كورمەكشى بولىپ كەلگەندە،توعىز ۇلعا قالىڭ بەرىپ قاتىن اپەرمەگەنىن ەرسى كورىپ، بايعا ايتادى:

– بايەكە، مال-باسىڭ ساي، ۇلدارىڭا ءالى قالىڭ بەرمەگەننىڭ ءمانىسى قالاي؟ - دەگەندە، مۇتىشاق ايتادى:

– ۋا، الديار تاقسىر حان،

مال اياپ جۇرگەم جوق بالامنان;

مۇڭسىز ادام وتكەن بە ادالىنان؟!

ويلاعان ويىما لايىقتى

جەر تابا المادىم عالامنان!

سىز مىناۋ ايتقانداي،

كوڭىلىمدە قاتتى سانام بار:

كوپ ەكەن دەپ كوپىرمەن،

توقسان مىڭداي قارام بار!

توپتانعانداي نەسى كەپ،

توعىز عانا بالام بار!

وسىدان ارتىق داۋلەتتى

باعار مەنىڭ قانشا شامام بار؟!

وسى از عانا داۋلەتتى

ار جەرگە شاشىپ توكپەي-اق،

بىر-اق جەردەن ورىنداسام

دەگەن مۇراتىم بار! - دەگەندە، حان ايتادى:

– ويىڭدى ءبىلدىم، بايەكە! ويىڭ وڭ، تىلەۋىڭ دۇرىس بولسىن! وي تۇبىنە ەشكىم جەتە المايدى. سەنىڭ ۇيدە وتىرىپ ويلاعان ويىڭدى كىم بىلەدى؟ جاتقانعا جان جۋىمايدى، // قيمىلداعان قىر اسادى. // ىزدەگەن ميقان اعاشىن تابادى، - دەگەن بار ەمەس پە؟! ەلدەن ەلدى قىدىرىپ، ىزدەسەڭ بولماي ما؟ - دەپ، اقىل بەرەدى.

مۇنان كەيىن مۇتىشاق باي توعىز ۇلعا ءبىر-اق جەردەن قۇدا بولاتىن توعىز قىزى بار كىسىنى ىزدەيدى. ەل قىدىرىپ،سۋ سىدىرىپ ءجۇرىپ، ءبىر ۇيگە كەز بولسا، ءبىر ۇيدە قىزدىڭ ءىلۋلى تۇرعان سەگىز قۇندىز بوركىن كورەدى. «ياپىرم-اي، توعىز بولار ما؟» - دەپ دامەلەنەدى. باي اۋەل كورگەندە، بورىكتىڭ بىرەۋى جوق بولادى. سەگىز-اق بورىك تۇرادى. مۇتىشاق باي توعىز بولماي، سەگىز بولعان سوڭ، قۋانباي مۇڭايىپ وتىرادى. مۇتىشاق باي العاش ۇيگە كىرىپ كەلگەندە، بورىكتىڭ سانىنىڭ كوپتىگىنەن ءۇمىتتى بولىپ قۋانىپ قالسا دا، توعىزدان بىرەۋى كەم بولعان سوڭ، مۇڭايىپ، تومسارىپ رەنجىگەن قالىپپەن وتىرعانىن كورىپ، توعىز قىزدىڭ تاپقان شەشەسى بايبىشە سۋسىن قۇيىپ بەرىپ وتىرىپ، مۇتىشاق بايعا قاراپ:

– جانىم، بۇرىن كورمەگەن جات ەلدىڭ ادامى ەكەنسىڭ. «قىرىقتىڭ ءبىرى - قىدىر»، - دەپ ەدى. «قىدىرعان قىدىردىڭ ءىزىن باسادى»، - دەۋشى ەدى. ەل ارالاعان سىنشى، اعاش ارالاعان ءۇيشى. ءبىر جوقتى ءبىر جوق تابادى. «ىزدەگەنگە سۇراعان كەز بولادى»- دەگەن ءسوز بار ەدى. «ەردى كورسەڭ، قىدىر تۇت. // استى كورسەڭ، ءقادىر تۇت!» ءقادىرلى مەيمانىم، ايىپقا بۇيىرماساڭىزدار، سىزدەردەن ءبىر ءسوز سۇراعىم كەلىپ وتىر. مانا ءبىزدىڭ ۇيگە العاش كىرىپ كەلگەن بەتىڭىزدە شاتتىق شىرايمەن كەلگەن ءتارىزدى ەدىڭىزدەر. قازىردە ۋايىمداعان، ۋايىم ويلاعان ادام سياقتى بولىپ وتىرسىزدار. الدە ءبىزدىڭ سىزدەرگە ۇناماعان جات مىنەزدەرىمىز بولدى ما؟ بۇرىنعىلار ايتقان: «ەل-ەلدىڭ زاڭى باسقا، يتتەرى قارا قاسقا»، - دەگەندەي، ۇناماعان جات مىنەزىمىز بولسا، كوزىمىزگە ايتىپ كەتىڭىزدەر. قاتەمىز بولسا، مويىنعا الايىق. مۇنان بىلاي ەسىمىزگە الىپ ساقتانايىق! - دەگەن سوڭ، مۇتىشاق باي باستان-اياق جۇرگەن جۇمىسىنىڭ ءمان-جايىن ايتىپ، بايانداپ، ۇيگە كىرىپ كەلگەندە، كوپ بورىكتى كورىپ قۋانسا دا، بورىكتىڭ توعىز بولماي، سەگىز بولعانىنا رەنجىپ وتىرعانىن ايتتى. سوندا بايبىشە:

– ە،قادىرلى مەيمانىم، كامىل بولسىن يمانىڭ، ادال بولسىن جيعانىم! «اۋىردى جەر كوتەرەدى، كوڭىلدى دوس كوتەرەدى» - دەگەن. بورىكتەردى كورىپ قۋانعان بولساڭ، قۋانعان كوڭىلدى قايتادان رەنجىتپەڭىز. ىزدەگەنىڭىز توعىز بولسا، توعىزى دا تابىلار. قۇدايدىڭ بەرگەن تىندىرىمدارى بار. بەر دەگەنگە - ءبىرىنشى قىزىم بار، ەگەسكەنگە - ەكىنشى قىزىم بار، وشتەسكەنگە - ءۇشىنشى قىزىم دايار. توبەلەسۋشىگە - ءتورتىنشى قىزىم دايار. بەلدەسۋشىگە -بەسىنشى قىزىم دايار. اتالاسقانعا - التىنشى قىزىم دايار. جەتەلەسۋشىگە - جەتىنشى قىزىم دايار. سەرتتەسەتىن بولساڭ، سەگىزىنشى قىزىم دايار. بارىنەن دە ارتىق تولعان ايداي قىزىم بار. بۇلاردىڭ ءارقايسىسىنىڭ قالىڭ مالدارى - قالىڭ مال، قارا مالدارىنان باسقا، ءسۇت اقى،توي مالى، يت ىرىلداتار; باقان اتتارىنا،بولەك ۇيگە ەنگىزەر، ۇرىن كەلەر، شىمىلدىق قۇرار، شاش سيپارىنان بولەك توعىز-توعىزدان توعىز جاقسى، توقسان جامبى تەڭگە بولماق. سىزگە، بايەكە، ەسكەرتەيىن، «بالالارى جامان شىعار، توعىزى بىردەي ۇيىندە نەگە وتىرادى؟» - دەپ ويلارسىز. مەنىڭ بالام جاماندىعىنان وتپەي وتىرعان جوق. تەگىن بەرەتىن تەڭى كەلمەي، الۋشىنىڭ ءالى كەلمەي وتىرعان جايى بار. ءبىرىنىڭ ەرى، ءبىرىنىڭ جەرى، ۋاقىتىمەن ساعات كەزى كەلمەي وتىر. جانە دە، بايەكە، سىزگە اقىرعى رەت ەسكەرتەمىن. بالالارىڭ سانى توعىز بولعانمەن، ەرتەدەگى توعىز توڭقىلداقتاي بولىپ جۇرمەسىن. بۇرىنعىلار ايتقان ءسوز بار ەدى: «ەشكى ەگىز تابادى، يت سەگىز تابادى، شوشقا دا توعىز تابادى»، - دەگەندەي، سانى توعىز بولعانمەن، نە دوڭىز، نە قوڭىز بولىپ جۇرمەسىن!

بايبىشە مۇتىشاق بايعا تاعى مىنانى ايتادى:

- ەي، مۇتىشاق باي، مۇتىشاق باي،

مال-باسىڭ سايما-ساي.

جەتەر بولسا داۋلەتىڭ،

قيمىلداپ باك ايانباي!

سونان كەيىن مۇتىشاق باي ۇيىنە كەلىپ، ەل-جۇرتىن جيناپ، اقىلداسىپ، توعىز ۇلدىڭ قايىنى ءبىر جەردەن ءتابىلىپ،وز ويىنداعى ويلاعانى بولعان سوڭ، نە جانىن اياسىن، قۇداي بەرگەن كوپ جىلقىنى اياماي شاشىپ-توگىپ بەرىپ، توعىز وتاۋدى ءبىرجولاتا كوشىرىپ الىپ، قايتىپ كەلە ءجاتىپ،بىر جەرگە كوشتەرى تۇنەپ جاتسا، سوندا توعىز قىزدىڭ ەڭ كەنجەسى بيكەش سۇلۋدى ەر توستىك الادى. سوندا بيكەش سۇلۋ توستىك باتىرعا ايتادى:

– اكەم مەن شەشەم بىزدەن بار دۇنيە، بار مالىن اياماس. ءۇش نارسەسىن قيماس. سول ءۇش نارسەسىن ۇمىتپاي: «بەرمەسەڭ، ىرزالىعىم جوق!» - دەپ، قويماي سۇراپ العايسىڭ! ءبىرى -اقجال ات، ءبىرى - قۇبا ىنگەن، ءبىرى - سىرمالى شاپان.

ايتقانىنداي، بۇل ۇشەۋىن باي وزىنە، ەر توستىك ەركىنە قويماي، سۇراپ الادى. قىزدار ۇزاتىلىپ كەلە جاتىپ، جولدا ءبىر جەرگە قونىپ جاتقاندا، مۇتىشاق باي مىستان كەمپىرگە جولىعادى. قورىققانىنان بارلىق مال-جانىن بەرمەك بولىپ، اقىرىندا ەر توستىكتىڭ التىن ساقاسىن بەرمەك بولىپ قۇتىلادى. ارتىنان التىن ساقاسىن ىزدەپ، ەر توستىك كەلىپ كەمپىرمەن سويلەسىپ تۇرعاندا، التىن ساقا جەردە جاتقانىن كورىپ، ەر توستىكتىڭ استىنداعى اقجال ات اۋزىمەن تىستەپ الا قاشادى. كەمپىردەن قاشىپ كەلە جاتىپ، باتىرعا وي ءتۇسىپ: «مەن باتىر بولا تۇرىپ، كەمپىردەن قاشقانىم نە بولعانىم؟!» - دەپ، اتىنىڭ باسىن بۇرىپ الىپ، قايتا ۇمتىلعاندا، كەمپىر قاشىپ كەلىپ، ءبىر قۇدىققا تۇسە بەرگەندە، ەكپىنىمەن ات تا، باتىر دا بىرگە ءتۇسىپ كەتەدى. مۇنان كەيىن باتىر كوپ ۋاقىت زىنداندا قالىپ، بىرنەشە ۋاقىتتار وتەدى. مۇنان كەيىن كۇلمەس حاننىڭ بەرمەس قىزىن الىپ كەلۋگە كەمپىرمەن كەلىسىپ، جەر بەتىنە شىعىپ، كۇلمەس حاننىڭ بەرمەس قىزىن ىزدەپ كەلە جاتىپ، ءبىر سىڭاراياق جۇيرىك ادام جولدان كەزدەسىپ، جولداس قىلىپ الىپ، ەكەۋى كەلە جاتىپ، ساۋىسقاننىڭ جۇمىرتقاسىن بىلگىزبەي ۇرلاپ الاتىن ەپتى ۇرىنى كورىپ، ونى دا جولداس قىلىپ الىپ، ۇشەۋى جولداس بولىپ كەلە جاتىپ، ءبىر مەرگەن كەزدەسىپ، ونى ەرتىپ الىپ، تورتەۋى جولداس بولىپ كەلە جاتىپ، ءبىر بالۋاندى تاۋىپ - ءبىر تاۋدى ءبىر تاۋعا سوعاتىن - ءبارى جولداس بولىپ كەلە جاتىپ، ءبىر جالماۋىزدى تاۋىپ الىپ، ءبىر كولدى ۇرتتاپ الىپ اۋزىنا سىيعىزاتىن -كۇلمەس حاننىڭ ەلىنە كەلەدى. كوپ قۇمىرسقانى ارتىپ الىپ،بۇلاردىڭ ءبارى ءوزى ايتىپ، وزدەرى ەرە باستايدى. جەر تىڭداعىش تاعى كەز بولاتىنى بار. بۇلاردىڭ ءبارى دە امان قايتادى. بەرمەس قىزدى الىپ قايتادى. ۇيدە قالعان ەلى، بيكەش سۇلۋ قايعىرىپ، بەلىندەگى جىبەك بەلبەۋىن شەشپەي جاتىپ: «نە ەر توستىك كەلگەندە، نە ءولدى دەگەن انىق حابارىن ەستىگەندە، شەشەم!» - دەپ، قۇبا ىنگەن دەگەن تۇيەسىن: «ەر توستىكتىڭ نە ءولى، نە ءتىرى - دەگەن حابارىن ەستىگەندە، بوتالاتام!» - دەپ ساقتايتىن بولىپ...

(اياعى جوق)



تالەيىڭىزگە كەز كەلگەن كىتاپتار لەگى

         
1 باۋبەك بۇلقىشەۆولەڭدەراۋدارمالار
2 فەدور دوستوەۆسكيالەم ادەبيەتى
3 قاراۋىلبەك قازيەۆپوۆەست
4 گۇلجاۋھار سەيىتجاناڭگىمە
5 ولەڭدەر جيناعى
6 جىر
7 جىر
8 داستان
9
10 داستان

پىكىرلەر:


قوناق: #6، ۋاقىتى: 11:27 - 2016/03/03

كەرەمەت.


قوناق: #2، ۋاقىتى: 09:52 - 2016/03/03

كوپ راقىمەت.


جازعان لەبىزىڭىز300 ارىپتەن اسپاسىن!
ادام نەمەسە ۋيروس ەكەندىگىڭىزدى تۇراقتاندىرۋ سۇراعى، كاتەكشەگە 99 دەپ جازىڭىز، راحىمەت!
98 + 1 = ? sozsiz sifermen tolteringiz.